Hmeichhe hlawhtling chawimawina Devi Awards Vakiria neitute hlan

Aizawl | September 2, 2019: The New Indian Express-in hmeichhe hlawhtlingte hnena chawimawina an pek thin, Devi Awards chu August 31, 2019 zan khan Kolkata-a ITC Royal Bengal hotel-ah sem a ni a, Vakiria dawr neitute - Laldinsangi, Lalsangzeli leh Lalrinpuii te hnenah hlan a ni.

 

Tun tumah hian Mizoram aṭangin Vakiria neitute leh India rama hmeichhe dang pariatte hnenah hlan a ni a, Union Minister Smriti Irani-in a hlan.

 

Textiles Minister  baka Women and Child Development Minister a ni bawk Smriti Irani chuan, "Hmeichhiate hi kan hlawhtling thei a ni tih a chiang a, kan theihna hi kan inringhlel ngai tur a ni lo," a ti. 

Devi Awards hi an sem chhuah vawi 17-na a ni a, he award hi mahni kalna kawnga hmeichhe hlawhtling leh midangte nuna danglamna thlentute hnenah hlan thin a ni a, India ram khawpui hrang hrangah an sem thin a, a tum khatna atan Kolkata-ah sem a ni.

Vakiria hi kum 2005-ah unau pathum Laldinsangi, Lalsangzeli leh Lalrinpuii-te din a ni a, an pathum hian Aizawl Venglaia cheng an ni. A tirah chuan embroidery khawl pakhata bul tanin Computerised Embroidery tih hming puin an dawr hmasa ber an hawng tan a. Dawr hming hi Vakiria tiin an thlak a,  fashion lam zirna Vakiria Institute of Fashion Technology (VIFT) ni zui ta chu kum 2009-ah khan bul tanin Mizorama designer tha tak takte hi VIFT atanga inzir chhuak an ni.

Tunah hian hmun hrang hrangah dawr neiin hmeichhe thawmhnaw chi hrang hrang an thuiin an zuar a, mipa thawmhnaw dawr an siam bakah school uniform leh sports wear lamah ke an pen bawk a, hnathawktu 120 chuang an nei a ni.

Devi Awards dawngtu dangte chu -Indian classical dancer lar Alokananda Roy, social entrepreneur leh environmentalist Ekta Jaju, filmmaker Pritha Chakraborty,  fashion lama kawng thar sialtu Sujata Chatterjee,  entrepreneur leh fashion visionary Madhu Neotia, environmental activist Temsutula Imsong, educator and social entrepreneur Parmita Sarma leh lifestyle entrepreneur Ritu Agarwal-te an ni.