Bike in su hlum ; A ruang Kolasib panpui dawn

Aizawl | September 2, 2019:  Kolasib Diakkawn mi H Lalnunpuii(39) chu zanin dar 9 vel khan Durtlang Leitan Pu Solfathanga in bulah Bike in a su hlum niin thu kan dawng.

Kan thu dawnnain a sawi danin Pi H Lalnunpuii hi  Kolasib khua niin, diakkawn venga awm a ni a, a hna vangin Durtlang Leitan T Section huamchhunga Pu K.Tlangkhuma in chu luahin a khawsa a ni.

Hetia chhiat a tawh hnu hian Synod Hospital ah phurh a ni a, mahse chhan hman a ni ta lo a ni.

A ruang hi Chaltlang, Aizawl panpui phawt a ni ang a, Kolasib lamah phurh tura ruahmanna siam a ni.

Nunpuii hi Pu Biakhluna, Govt Kolasib College driver pension fanu a ni a. Nunpuii thihna chungchangah hian Bialtu MLA leh Supply minister ni bawk K Lalrinliana chuan Synod Hospital ah a kalchilh nghal a ni.

Bike hi a tlan chak hle nia hriat a ni a, a sut hlum hi thui tak a su leng niin an sawi. Damdawi in Panpui a nih hnuah a boral zui ta a ni. Boral ta hi H Lalnunpuii Kolasib khua,Leitan  a in luah thar hlim zan khat  emaw chauh a in luaha la riak hman a ni. 

Durtlang Leitan YMA ten thlahna hun an hma zawh hnua Chaltlangah a ruang hi lakthlak a ni anga, Chumi zawhah an khua Kolasib lam panpui zui tur a ni.

Thudawnnain a sawi zel danin, Durtlang khawchhung ah kawng zauh leh kawng siam that a nia, Kawng ṭhat hnu hian mipui tana hlauhawm khawpin lirthei an tlan chak ṭhin a.  Kawng an siamthat hnu hian nunna chan lirthei sut avang hian mi pali lai an awm tawh niin kan thu dawnna chuan a sawi bawk.

Hemi vang hian Mipui him zawk nan speed breaker siam nual a ni nghe nghe a.
Social media ah chirh theh leh fiamthu thawhnana hmang an tam hle a. Heta zawhna awm chu Lirthei khalhtute tlan chak lo  ngai lo se speed breaker hi an dah dawn em ni?


#I LIRTHEI CHUAN SPARE PARTS A NEI, MIHRING NUNNA ERAWHIN A NEI VE LO. LIRTHEI KHALHTUTE FIMKHUR ANG U.