RAMTHAR NI

       

                        RAMTHAR NI

Kum 1972 Synod Inkhawmpui chuan Synod Mission Board in 'August Ni 31, Rev.D.E Jones ( Pu Zosaphluia) Mizoram a rawn thlen ni hi 'Ramthar Ni' atan hman ni se' ti a a rawtna chu a pawm a. Kum 1973 aṭang in Mizoram Presbyterian Kohhran Chuan August Ni 31 chu Ramthar Ni atan a lo hmang tan ta a ni.

Kumin 2019 hi Pu Zosaphluia'n Mizoram a rawn luh champha kum 122 na a lo ni ta a. Ramthar Ni kum 47 na a ni bawk.

Rev. D.E. JONES chanchin tawi:

Rev. David Evan Jones hi Ni 15.2.1870 ah Brynmelyn, Llandderfel, Wales ram ah a lo piang a, Bala Grammar School ah zirna bul a ṭan a. Liverpool Institute, Bala College leh Presbyterian United Theological College, Aberystwich ah a Zirna hun tawp a hmang thung.

Bettws Montgomery ah kum 2 chhung Pastor hna a thawk a.

Kum 1897 khan Pastor puitling ah nemngheh a ni.

Kum 1897 vek hian India ram chu Lawng hmang in a rawn pan a. An in leh lo a chhuahsan hi Ni 26.6.1897 niin kum 27 mi a ni. Thla khat zet kal kawng ah a thang hnu in Aizawl chu Ni 31.8.1897 ah a lo lut ta a ni.

Mizoram a lo luh hnu hian Missionary lo awm sa Rev.F.W.Savidge leh Rev.J.H.Lorrain te hnen aṭang in Mizo ṭawng a zir nasa hle a. Pu Buanga te țhian dun hi Thla 3 lai a rawn hrawn hman nghe nghe a ni.

Mizo ṭawng leh Lakher ṭawng a Bible lehlinna ah pawh a thawh hlawk hle a ni. Tun a Mizoram Presbyterian Kohhran leh Mizoram Baptist Kohhran Kristian Hlabu hman mek ah hian a kut hnu Hla 38 zet a awm a ni.

Kum 1903 ah Katherine Ellen William nen Sylhet (tun a Bangladesh) ah an Innei a. A țhian nu hian a rawngbawlna ah a pui bawm ve ta char char a. Kum 4 chhung zet chu Missionary dang awm lovin an nupa hian Mizoram ah rawng an bawl a ni.

Kum 1898 December 31 khan Rev.Edwin Rowlands (Zosapthara) a'n a rawn zawm ve ta a. A hming Zosahluia hi Pu Zosapthara rawn chhuah hnu a put chauh a ni a. Mizoram a lo awm hmasa zawk a nih avang a a hlui leh a thar an sawina mai a ni.

A nupui Katherine hian kum 1926 khan chhungkaw thil ah a haw san ta rih a. Rev.Jones erawh kum 30 vel rawng a bawl hnu in kum 1927 khan an ram ah a haw thla ve thung a. Liverpool leh Prestatyn ah a in beng bel zui ta a ni.

Mizoram Hmar Bial ah chuan Missionary awm rei ber Pi Zaii dawttu a ni.

Kohhran rawngbawlna mai bakah Zirna lamah hian sulsutu pawimawh tak a ni bawk a. Mizoram a Sikul hmasa ber ah khan Zirtirtu hna a thawk char char a. Aizawl Theological School (tun a Aizawl Theological College ni ta) hi kum 1907 khan a ma ho va din a ni.

Mizote tan a Pathian thu leh Zirna kawng a thawh hlawk tak Rev.D.E.Jones chuan Ni 10.8.1947 khan kum 77 mi niin Chatuan ram a lo pan ta a. A nupui Katherine pawh Ni 20.5.1950 khan a chawl hah dam ve ta bawk.

Rev.D.E.Jones (Zosaphluia) rawngbawlna chhuanawm tak hi Mizo Kristian te History ah chuan a chuang reng tawh dawn a ni.