Khawthlang tuipui len vanga chhiatna tawk Tlabung leh a chhevel Minister leh health teamin tlawh

Aizawl | July 23, 2019: Tun hnaia Khawthlangtuipui lianin Tlabung leh a chhehvel khaw hrang hranga harsatna a thlenna hmun te chu nimin khan Agriculture changtu Minister Pu C Lalrinsanga'n chuan Chief Minister Pu Zoramthanga aiawhin a hmunah tlawhin a enfiah. 

Agriculture Minister chuan, Mizoram Sorkar-in tuilian vanga Tlabung mipuite harsatna tawh a hriatpui thu leh, tun hma atanga khawpui hmasa a nih avanga ngaihthah chi a nih loh thu a sawi. Pumpelh theih loh thil chi hrang hrang avangin, khaurel chhiatna chu thleng zel thei a ni tih, Pu C Lalrinsanga chuan sawiin, chumi avanga tawrhna thleng thei laka inralrin a tul thu a sawi a, Tlabung mipuiten tuilian avanga harsatna an tawrh fo sutkianna tura rawtna leh ruahmanna an neih te thawhkhawm tura khawthlang hruaitute chu sawmin, chumi hlawhtlin theihna tur chuan theihtawp chhuah a tiam bawk a ni. 

Agriculture Minister chuan, khuarel chhiatna vanga mipuiten harsatna an tawh sukiang tura Sorkar hnathawkten mawhphurhna lian tak an neih thu sawiin, chumi hlenchhuah chu kan tihmakmawh a ni, a ti a, mipuite pawhin kawng hrang hranga Sorkar an thawhpui a tul thu sawiin, dik leh felfai taka thil tih a nih theih nan Sorkar leh mipui tha taka an thawhho a tul thu a sawi.  

Tlabung khawtlang chuan, lei vung leh thil dang avanga lui mawng sang tial tial chu Khawthlangtuipui len thut thinna chhan nia an hriat thu leh, lui kuangin tui a pai tam zawk theihna tura lui mawng hai thuk a tul thu an lo thlen a ni. Hei bakah hian sub-divisional rapid response team changtlung tak din te, vantlang hmunhma pawimawh sawnchhuah tul an tih thu te, kawlphetha lakluh nan 132 kv an mamawh thu te bakah thil chi hrang hrang an lo thlen a ni. Tlabunga department hrang hrang thutchilhtute pawhin, tuilian vanga department kaihhnawih chhiatna thlen dan an tarlang bawk. 

Pu C Lalrinsanga hian meilawngin Khawthlangtuipui lian chim chin pawh tlawhin a thlir kual nghal bawk.

Khuarel chhiatna alo thlena a nghawng kal chho zel mihring hriselna tichhe thei hri (disease) te laka mipuite an him theinan Health and Family Welfare Department chuan tun hnaia Khawthlangtuipui lianin Tlabung leh a chhehvel khaw hrang hranga harsatna a thlenna hmunah te chak takin hma an la mek zel a. Medical Rapid Response Team (RRT) –te Tlabung SMO Dr LP Malsawma hova thawkchhuak nghalin a tul angin enkawl ngai te an buaipui bakah damdawi leh ORS-te an sem a, khaw hrang hrangah zin kualin tuilian avanga hriselna lama harsatna tawkte an tanpui a ni.

He hmalakna kal zelah naktuk 24th July, 2019 (Nilaini) hian Health and Family Welfare changtu Minister Dr R. Lalthangliana hmalaknain Lunglei atangin Doctor rual leh paramedical staff ten Tlabung an pan dawn a. Medical team-te hi Lunglei District Medical Superintendent Dr SR Ngurchamliana hova kal tur niin Tlabungah Free Clinic an hawng dawn a, Tlabung leh a chhehvel khaw hrang hranga mipuite hriselna dinhmun an zir chiang dawn bawk a ni.

A hnuaia tarlan te hian naktuk ah Tlabung panin Lunglei an chhuahsan ang:

1. Dr SR Ngurchamliana, MD (Medicine)   - Medical Superintendent

2.    Dr Catherine Lalmuanawmi, MD             - Senior Specialist

3.    Dr Lalramsanga Khiangte, DCH               - M.O (Pediatric)

4.    Dr. David Lalsangliana, MBBS                  -M.O(Surgery and Endoscopy)