YMA LEH TLAWMNGAIHNA

- Vidpuia Hrahsel

Kum 1935 khan Sap Missionary te leh Kohhran hotu thenkhat chuan Thalai Pawl din an rel a.An Pawl din hming chu rei fe an ngaihtuah hnuin, Rev.David Edward (Zorema Pa) chuan 'Kristian tan bik anga kan tih chuan mi kan hip tawk lo vang a; 'Young Lushai Association' ti mai ang u tiin a rawt a, Hemi hnu Kum 1947 October ni 7 a Central YLA Committee chuan Lushai tih chu Mizo tiin a thlak a,  YLA ni thin chu YMA tih a lo ni ta ani.Sap Missionary te thahnemngaihna vangin Mizo hnam in pawl ropui tak leh chak tak kan lo nei ta hi kan vannei hle.‌Mizo hnam hi kan vannei em em a, Kristian ni ngai lo kristian a min siamtu Sap Missionary te khan thil tam tak  min hnutchhiah a, pawl ropui tak min hnutchhiah a, nun kawng dik zawk thalai ten kan zawh theih nan te, Mizo hnam lokal zel tur tan  leh thalai te tan an vanglai nun hlim tak, leh puitlin kawng an zawh theih nan YMA min din sak a, mizo thalai te hi kan vannei tak zet a,hnam dang ten an neih ve loh 'Tlawmngaihna' chhawm nung tu YMA kan nei hi tha thlah mai lovin, YMA meichher hi a  kangkai zel theih nan keini Mizo thalai hi kan va pawimawh em.

YMA hian thupui pathum a nei a, hun awl hman that, zofate hmasawnna ngaihtuah leh kristian nundan tha ngaihsan te a ni. Kan thupui YMA leh Tlawmngaihna hi thil inkawp tlat , leh kan mizo kan nihna ti langtu ber a ni a, tlawmngaihna chu midangte tana inhlan emaw inpek tiin kan sawithei awm e. Mizo te hi inlawm hnam kan ni a, chhiatni leh thatni ah inlawm tawnin, khual te chungah that chhuah hnam kan ni a, mi tu emaw in chhiat tawk se, a khaw pumin awmni khamin hnatlang in an thawkchhuak a,  chhiat tawk te tan tiin midang tan a  inpe hnam kan ni thin a, a tul tul an thawh sak thin a ni. Kan pipu te hunlai khan mi tlawmngai chawimawina sang ber chu 'Chawimawina Nopui' an hlan thin a, nopui dawng tur chuan mi tlawmngai leh mi entawn tlak, mi zahawm tak nih a ngai ngei ang.

Tlawmngaihna hi inphut chi anilova, mizo hnam a piang i nih chuan tlawmngai thei; Yma motto tanpui ngaite tanpuitu anih ang ngei a, eng hun ah pawh a che chhuak ngam thalai nih tum ang che, amaherawhchu mihring hi Pathian in min siamdan hi a in ang lova, kan tih theih zawng leh kan thiam zawng a in ang vek lo hi Pathian min siam dan ropuina ani.Heng pawl a hruaitu chin te leh member active tak tak te, leh member senior zawk te hian kan nau te kan kilkawi na ah hian, an tih theih ang tawk theuh ah hian hrethiam tawn zel ila, ava duhawm em. Mi thenkhat chuan kan nau rawlthar leh tleirawl inhmang tan tir te a phut in kan phut chhuak thin chawk.

Heihi ilo ngaihtuah ve ngai em; vengchhung ah chhiattawk chhungkua an awmin eng kawng ah nge ka tangkai ve ang, emaw chhiattawk chhungkua te tan a kan tih ve theih chhun te kan hlan phal thin em?

Mizo nun ze mawi tak, mizo nun a bet tlat tawh tur Chhiatni leh thatni a kan inpui tawn thin na hi, chhawm nung zel tur chu keimah ka ni a, he tlawmngaihna hi a bo mai loh nan ka theih tawk, leh ka tih theih chin hi ka ti zel dawn tiin i lo in ngaihtuah ve thin em? Mihring hi kan inmamawh tawn vek a, nakin ah chuan kan chungah a thleng vek dawn a, tun atang hian ka theih ang tawkin, YMA ah  hian kan inhmang ve ange, tih na rilru hi kan pu em le? Mizo nun ze mawi tak kan chhawm nun a, thangthar lokal leh zel tur te pawhin min dem loh nan kan kut leh ke te hi kan ram tan, mizo hnam tan, kan pen chhuah chuan Mizo hnam hi kan chawinung mai dawn a lo ni. YMA dinchhan (motto) tanpui ngaite tanpui, zofate hmasawnna ngaihtuah leh hunawl hman that te hi kan nun ah lantir i tum ang u.Mizo Kristian te min ti kristian tu he pawl din zel nan hian nang leh kei hi kan pawimawh hle.

He kan zo nun ze mawi tak Tlawmngaihna hi tun dinhmun ah hian a tlakhniam tak em em nachhan hi tiin i lo ngaihtuah ve tawh em? Khawvel changkanna in mizo te min rûn a, mahni hna theuh ah kan buai a, buai kan in ti hma em em a, midang tan kan inpe thei lo thin, mahni in theuh ah kan tlei a, midang mamawh lova inhriatna a tam tial tial a, kan mizo nun ze mawi tak tlawmngaihna

te, aia upa zahna te a hniam tial tial a, a chhan ni ber a lang chu kan inti changkang a, thil thing sawi nan 'zo' tih kan ching a, hnamdang culture in min run a, kan nula ten nalh an duh a, kan tlangval ten nula hip nan inlak 'korean' an zak ta lo, hnam ah kan chiang lo tial tial a, thawmhnaw ah chiah kan sang leh lawi si!

Changkanna hi thawmhnaw leh kan thil neih ah chauh hian ti lang lovin, mizo nun ze mawi tak aia upa zahna te, taimakna te, rinawmna te, tlawmngaihna te a inthuam in, kan thawmhnaw changkanna piah a, nunze mawi tak nei chungin, midang te neih ang awt zel lovin, mahni dinhmun ah lungawi ila, kan ram hian hma a sawn ngei ang.YMA ah kan inhmang anih chuan, kan hnam nihphung ah kan chiang tur a ni a, tlawmngaihna hi midang te tih tur ah dah mai lovin, mahni theuh in kan nunpui a, kan tihtur theuh kan hlen angai a, he kan zo nun ze mawi tak tlawmngaihna hi changkan san chi a ni lo, tlawmngaihna hi inlak senior san chi a ni lova, kan zavaia kan tih tur theuh kan hlen hian kan chhawm nung zel mai dawn a lo ni.

Mizo kan nihna hi zahpui chi ani lo a,in chhuan tur zawk ani.Hnamdang hian

Tlawmngaihna kan neih ang hi an nei ve lo.Hawh u mi tih ah dah mai  kan

tih tur ani tih hria in he Tlawmngaihna hlu tak hi chhawm nun zel i tum ang u.