DOCTOR-TE HI MIN LO HRETHIAM HRAM TEH U

- Dr C Lalhrekima

Kolkatta a vai doctor thenkhat, tun hnaia misualin an khawih nat avanga Mizo damlo lo en ve duh lo kan ni ngawt lo e.

India ram hmun hrang hrangah hian, doctor te thiam lohna ni miah loah,  mihring sual hrim hrim hian doctor-te hi vawi tam tak kut an thlak tawh a. Vawi tam tak _black badge_ belin kan dem thu ram pum doctor ten kan lo lantir tawh thin. Mahse doctor kutthlak hi a reh hlei thei lo. A thleng zing lutuk tawh. Tun hi a hnaivai ber a ni chauh zawk.

Tun țumah pawh hian kolkatta doctor junior ho chauh rei fe an nuar a. Ni 14.6.2019 khan doctor-te chunga kutthlak a ni fo duh loh entir nan ram pumah _badge_ dum kan bel vek tawh a.

Mahse sawrkar lam ațangin hmalakpuina aiin demna thu an dawng ta hlauh zawk a. Duty na lama nunna hial chan thin Police leh sipai nuar ve lote nena tehkhinte an hlawh daih nia!!

Doctor te hian kan _line of duty_ ah hliam kan tuar fo a, nunna kan chan ve fo asin! Mahni enkawl mekte natna kai ve tate tam tak an awm. Damlo enkawl hah rimtawng lutuk avanga lung tha lote an awm asin! Chumi avang chuan vawi khat mah kan nuar ngai lo. Duty pawh kan țhulh phah hek lo. Kan hnain a ken a ni. Damlo mangang tupawh, natna kaichhawn hlauhawm nei pawh, a theih chen chena inveng fimkhur ve chungin kan enkawl zel dawn. Hah rimtawng sawi hleihtheih loh chang a va tam em! Kan thawk zel dawn tho tho.

Mahse damlo chhungte hnek leh vuak laka inven dan lam kan zir ve lo. Kan thiam lo. Beih let dan pawh kan hre lo. Kungfu thiam kan tlem lutuk!! Hmelmate tina thiam tura inzir Police nena khaikhin chi kan ni lo e.

Police leh sipaite chu an hmelma do ten an tina a, an that hial fo. Chutiang huam tura thutiam an ni. Chutiang avang chuan nuar ta se an demawm ngawt ang. Chumi 'chhan' avang chuan an nuar ngai lo reng a ni.

Keini ve zawng, kan duhsak mek, kan enkawl mek ten min tina duh ta hial a nih hi. Chutiang huam turin thu kan tiam ve si lo. (Mizoram chanchin ka sawi lo e, India ram pum doctor zinga pakhat angin a ni ka sawi ni)

Tunah hian, "Mizo mipui te hian min tina ve a, i nuar ang u," kan ti reng reng lo. Ram puma hetiang a thlen tawh loh nan ram pum huapin țanrual a ngai si a. Mizo mipuite zah tak chungin kan zawm ve a ngai tlat a ni. *Min lo hrethiam hram teh u.* India ram zau pui maia mi fel tam tak kara misual țhenkhatte thil tih dik lo hi a ram pum anga kan do a ngai tlat si a.

*Doctor nih hi a hrehawm ve țhin asin!* Doctorte hi Pathian kan ni lo, Pathian hmanraw chhete ah kan inngai. Pathian hnena zing chhun zan zawma kan dil pawhin thihna hi a thleng tho. Pathian rem ruat tho a nih avangin doctor-te enkawl lai ngei hian kan thi zel mai si chu a nih hi. Hetianga dan rual loh thihna a lo thlen hian mi țhenkhatin doctor kan han puh ta daih a!!

Damlo an thih hian an chhungte tuar tluk zetin hrehawm kan ti. Daktawr thatchhe ber pawh hi kan damlote an thih chuan hrehawm titak kan ni!! Chutih laia damlo thihtir lui  ang mai leh an thih pawiti lo ang maia min han sawi thin hi a na ve!! Doctor nih hi nawmna tam tak awm mahse a hrehawm ve țhin asin! Damlo an dama lawm ber pakhat chu a enkawltu doctor kan ni a, an thiha hrehawm tiber pakhat chu a enkawltu doctor kan ni. Thawpuite pawn min hnem thei lo fo a nia. Chu rilru chu min hriatthiampui ve teh u. 

*Doctor-te hnenah thu ka chah ve duh.* Daktawrte pawh hian inzir leh hmasawn kan ngai khawp. Kan thiamna piah lamah damlo leh an chhungte biak dan kan thiam lo fo. Mize nawi ve tak doctor-te pawh kan awm ngei ang. Doctor zingah, mi dawr dan thiam loh vang ni lo, chapo leh inchhuan vanga damlo leh an chhungte chunga lo inlek deuh kan lo awm a nih vaih chuan _pianthar_ ngei tur a ni. Kan hna hi chapopui leh inchhuanpui chi a ni lo. Pathian rawngbawlna, inngaitlawm tak leh thahnemngai taka thawh chi a ni. Mi dang hnehsawh nan leh diriam nan leh tihnat nana hman chi a ni lo. Mizia pawh hi hmasawn tum ve tur a ni. Damlo tana biak nuam nih tum ila,  biak nuam vak lo tan (mizia a awm ve) pawh damlo tana tha ngaihtuah a, damlo ngaihsak em emtu nih tum tur a ni. Inpekna thuk lehzuala mizo mipui damlote enkawla theihtawp chhuah thar turin ka thawhpuite ka sawm che u.

*Mizo mipui chunga lawmthu kaxsawi duh.* Mizo mipui hi kan tha em em a. Daktawr laka kan han lungawi loh ve deuh pawh hian doctor-in kut thlak kan tawng ve ngai lo. A va Kristian ram tehlul em!! Ngaihdamna nena doctor-te min dawh hram hramtu in ni. Kan lawm e. Kan fel loh ang anga min pawm a, hma kan sawn theih nana min fuih a, zaidam taka hmai chhana min zilh a, thahnemngai taka min tawngtaipuitu in ni. Kan lawm takzet e. 

*Mipui hnenah ngen duh ka nei ve.* Doctor lakah lungawi lohna kan neih chuan kut inthlak zawng ni loin, dan angin hma a lak theih tih mipui ten hriat tur a ni. Hlauh tur a ni lo. Daktawr inthlahdah chu dan pawhin a hrem na thei khawp. Kut inthlak erawh tih hauh loh tur a ni. Tu chungah pawh lungawi lohna kan neih chuan, thuneitute hnenah thlen theih a ni.

Thuneitute hnen kan thlen hreh a nih pawhin Mizorama Doctor ho pawl pahnih, Indian Medical Assn, Mizoram leh Mizoram Govt. Doctors' Assn ah thlen thin turin mipuite ka ngen duh. Kan inpawngpaw chhan ngawt ngai lo a nia.  Damlo ngaihsak lo, hna thawk tha lo chu kan lo inzilhhau fo tawh thin zawk. Mi dik lo na na chuan an tuar mai ang chu. Mi dik lo kan inchhan ngawt dawn lo e.

Kut min thlakin min vau ve lo hram teh u. Kungfu thiam kan tlem si, kan dawih bawk si!! Kan khur chhia ang a, hlau leh khur chunga in chhungte damlo kan en a, kan zai a nih chuan a zai chah loh tur lai laite kan zai chat pheng phung palh ang e!!

Min fuih ula, theihtawp chhuah zel kan tum bawk ang e.

Mimal inhuatna leh politics dik lo vanga Doctorte dik lo taka hek leh puh hmingchhiat kan nih erawh chuan kan inchhan tlat thung dawn tih erawh chu min lo hriatpui hram teh u. Hetiang hi kan tawng zeuh zeuh a nia. Kan sual man tuar kan huam a, kan phu loh hremna erawh kan pai dai thei bik lo a ni. Mihring kan la nih ve miau bawk si hi a..

Naktuka Doctor-te kan nuar lawk tur  hi min lo hrethiam hram hram teh u.

(Hei hi pawl thuchuak a ni lo e, mimal thuziak a ni e☺☺)