Zohmangaiha leh Rintluangi hnuah a lungthu kim nan Johny Laltlanmawia

Aizawl | May 29, 2019: Zofate zingah David Zohmangaiha leh Lalrintluangi te pahnihin Khawvel tlangsang ber Mount Everest ngama an chuan chhuah hnu-ah a lungthu kim nan Mizo tlangval chhuanawm Johny Laltlanmawia (28) chuan khawvela tlang sang ber Mount Everest chu May 16, 2019 zing dar 7:05 khan a lawn chhuak.

Johny Laltlanmawia hi Pu Zothanmawia leh Pi Nuntharmawii te fa 4 zinga upa ber niin an unau hi hmeichhia 2 leh mipa 2 an ni. Aizawl Ramhlun North Biak In mualah an cheng.

Johny hian kum 2010-ah 1st Assam Regiment a zawm a, 2015 kum bul lamah an regiment atanga commando training tur thlanchhuah tlemte zingah a tel. Hemi kum vek hian commando a training zo a, kum 2016-ah India sipai tha zual an post thin na, National Security Guard training tura thlan a ni. National Security Guard training pawh tha takin a zo leh ta mai a. NSG a zawm hnu reiloteah Mount Everest lawn tura thlan chhuah zingah a tel leh ta a ni.

Johny hi a post tak chu Kolkata a ni a, Everest lawn turin training hrang hrang beih chhoh reng a ngaih tak avangin an hotuten Delhi lamah an awm tir ta rih a. Training hrang hrang neiin India ram hmun hrang hranga tlang sang an lawn thin. Everest lawn tura thlanchhuahte hi an hotute nen mi 12 an ni.

Hun rei tak training course hrang hrang an neih hnuah, April ni 1, 2019 khan Mount Everest lawn turin Delhi atangin an chhuak a, April ni 15, 2019 khan tluang takin Mount everest tlang bulthut, Base Camp an thleng.

Base camp an awm lai hian thli a nain vur a sur nasa em em thin a, an riah buk (tent) thliin a lak hial chang a awm. An vai deuhthawin hritlang awmna ni chiah si lovin an khuh nasa em em hlawm mai a, an thian thenkhatte phei chu luhai leh lunain a ti buai hle. Boruak that hun nghaka hun engemaw chen an awm hnuah May ni 12 khan tlang chhip lawn chhuak turin Base Camp atangin an chhuak tan leh ta a, an zinga pakhat taksa lama harsatna nei tih loh midang 11 te chuan tluang takin khawvela hmun sang ber Mount Everest chhip chu May ni 16, 2019 zing dar 7:05 khan an lawn chhuak ta a ni.

Johny hian a tum ang ngeiin khawvela hmun sang ber (Top of The World) ah hian Holy Bible leh YMA flag thla a lakpui a ni.

- with Inputs from Vanneihthanga Vanchhawng