MUMANG RÂPTHLÂK

WRITTEN BY, CENTENARY C. LALZAHAWMA
APRIL 30, 2019
2:55 AM

          Mi zawng zawngte chu an buai nuaih nuaih mai a. A pawl tete in an awmkhawm a, kei erawh keimah chauhin hmun hrang hrangah ka kal kual a. Chumi lai chuan Balhla ka ei a, chu balhla pakhat chu vawihnih ka ei hnuah a chanve chauh a ṭha tih ka hre ta a!

        Chu ka balhla ei na hmun lam pan chuan YMA hruaitu hlui Pu Ropuia te leh a naute ho chu an lo phei a, ka hlau hle mai! Tichuan, ka ṭhian hlui Lalruatkima te ṭhianho awmnaah chuan ka va lût rawk rawk a, ka balhla ei kâwr chu an awmna in bang awng laiah chuan ka zep vat a! Ei lo ang maiin ka awm a, chutia ka dah chu ka bul lawka Elizabeth-i chuan min lo hmu reng chu niin, min nuih deuh tlat hian ka hria. Nuih chhan tur a awm loh tehrêng nen. Nimahsela, a hmun thleng pawh chuan YMA hruaitu hlui Pu Ropuia leh a naute chuan min lo umzui hauh lo mai! Chutih laia ka mit hmuhah chuan mi tin mai chuan an duh dân dânin thil an ti a, midang an lo dah pawimawh lo ni loin an mahni leh mahni chauh an inngaihsak a ni ber mai!

          Tichuan, chu hmun chu chhuahsanin ka pên chhuak leh a. Tumah awmlohna Phairam ang maia kalkawng ṭha, nuam êm êm mahse, tlang ram kalkawng ni si ah chuan ka kal a. Chu kalkawng bul ding lam leh vei lamah chuan hnim hring nalh êm êm mai hi a awm phei duai mai bawk a. Chu hnim hringte chu thliin a chhem heuh heuh a, an ding awn deuh vek a, an che siau siau mai bawk a. Chu kalkawng mawi tak hnimina a mawina ti belhchhah a, ti ropui belhchhah êm êm ah chuan ka kal zêl a. Chutia ka kal lai chuan ka hmaah Bung kung lianpui mai, a zar nalh êm êm si hi kawng sir ding lamah chuan a ding thluah mai a. A mawi bik êm êmna pakhat chu a awmna hmunin a zir vâng ni berin ka hria! Ti chuan, ka tum ram pan chuan ka kal zêl a.

          Tichuan, reilote ka kal leh hnuah chuan ka ṭhiante eirawngbawl lai ka va hmu a. Tute mai pawh chu an thiltih ah an buai êm êm vek ni berin ka hria ka hmuh dân chuan. A chhan chu an bulah ding reng chung siin tuman min ngaihsak lo chu sawi loh a hmuh hian min hmu lo hrim hrim a lo ni. Tichuan, ka awm ngei a ni tih min hriat theih nan hritlang chuang si lovin ka khuh deuh ṭhawt ṭhawt a, tichuan hlim takin min lo lawm a. An hlim hmel hlawm hle mai a, an hmel landân chu sawrkar hnathawkte'n thla tâwpa hlawh an lak zawha hlim hmel an put ang mai hi niin ka hria. Kei ngei pawh chu ka hlim lo bik lemin ka hre love!

          Tlai dar 5:00 bawr vel a ni a, nî pawn min liamsan ṭep tawh a. Ka rilru tete chuan chaw kan ei har dawn niin ka hria a. Ka hne in ka thinrim deuh titi tawh a. Ka rilru ngaihtuahna hre thei awm hlawm se chuan min ngei viau pawh ka ring. Tichuan, tlai 6:00 a lo ri a, eirawngbawltu ka ṭhiante, a hmei a pa chuan an tihtûr ṭheuh buaipuiin an che sup sup a! Nimahsela, vanduaithlâk tak maiin chawhmeh pakhat chu an eirawngbawlna hmasaah an theihnghilh hlauh mai! Chu mi la tur chuan ka phei nghal vat a. Mahse, min kohkir leh a. Kan thiannu pakhat, kei aia upa Lalruakdiki chuan Fascino Scooty (Blue Color) chu a nei hlauh mai a, ke a kal a ngai lo, Scooty in kal la i lo thleng hma zâwk ang min ti a. Tichuan a Scooty chabi min pe a, a hmaa ka kalna thleng ka va kal ti ah ka ṭhianpa Marema chu lokalin, "Ka lokal ve ang e," tiin min dil a. A pawina a awm êm êm loh avâng chuan ka lo phalsak mai a.

          Tichuan, Scooty awmna hmun kan thlen chuan keimah ni lovin ani zâwk chu ka khalh turin ka ti a. Chumi lai chuan a khua a thim deuh riai tawh a. Mak tak maiin chu mi lai tak chuan TAXI a lo tlân thut mai a! Tumah a khaltu an awm si lo! Mak kan ti hle mai a! Kan ṭhian dun chuan chu Driver awm lo TAXI kan bula ding chu kan en reng ringawt mai a. Chutia kan en lai mêk chuan a tlân thut a, a ri chu hlauhawm tham khawpa ri lungchhiatthlâk a ni. Tichuan, kawng kuala a kual dawn hret chuan ka ṭhianpa Marema ka bula ding ve reng kha Driver seat-a a ṭhu ka hmu thut mai a, ka hlau kher mai! (Mumang mai a ni tih kha ka harh hma zawngin ka hre si lova, damlaia thilthleng ang mai a ni! Ka harh hnua ka ziah lai mêk pawh khan ka hlau ru riau mai, mitthlaah a châm reng mai!) Marema chu ka mi rin ber a ni a, kha tia min phatsan kha a mak ka ti bang lo a ni. KAN TÂNA MI RINAWM BER BER LO NI TAWHTE HI A HNUA KAN TÂNA MI HLAUHAWM BER BER TE AN LO NI ṬHIN A NIH DAWN HI! A lo va'n râpthlâk ngai em!

          Tichuan, mihring ka nihna anga hma lam pan tur ka nihzia leh mahni inti phur chawpa huaisenna neih hrâm hrâm tur ka ni tih inhre rengin hlau tak chung si chuan ka awmna a ṭânga khaw dang awm chu ka va pan a. Chu khua chu khaw tereuhte a ni. Dawr pakhat a awm a, chu dawr chu Main road bul chiaha sak a ni. Chu dawr thlen hmaah chuan in pahnih a awm ve bawk a. Chu dawr chu in 3-na a ni. A piah lamah chuan in dang hmuh tur a awm lo. An dawr chung lamah chuan Street Light fiah kelhkawlhin a eng pup mai bawk a.

          Chu dawr pawna ṭhutthleng seiah chuan tlangval ho an ṭhu tlar dual a, a bul vêla ṭhutna danga ṭhute ka en zêl a, chung zingah chuan ka hmelhiat pakhat, kei aia naupang hret Valtea chu naupang hmeichhia kum 4 vel, kawr senduk ha pawma ṭhu ka hmu a. Ka lawm rilru hle mai. A chhan chu tun lai khawvêlah hmelhriat nei leh nei loh inkâr a hla si a! Tichuan, ka thil tawn chu a mal mala hrilh ka duh viau nain Valtea rinchhan chuan a mal mala hrilh aiah an zavaia hriatah thil awmdân zawng zawng chu hmeichhe zurui ina a bo a bang awm lova a thu hriat a sawi chhuah vek ṭhin ang chuan ka sawi chhuak ta vek a. Mak an ti ve hle chuan ka hria, an mitmengah hlauhna a awm ṭan ta tlat mai! Tichuan, chu TAXI chu dawr kawta chang tur chuan thu kan titlu ta a.

          Zân reh a ni tawh a, chutia, reife kan chan/nghah hnu chuan Bus (Night Service) tiah zeta lian chu a hmaa TAXI ri ang maia ri, hlauhawm namen lova hlauhawm leh lungchhiat namen lova lungchhiatthlâk chuan a rawn tlân leh a. Mahse, Bus ri leh TAXI ri a danglam chuang miah lo chu mak ka ti bang thei lo. A driver ka va en chian chuan a hmaa ka ṭhianpa TAXI Driver Marema tho kha a lo ni. Tichuan, kan awmna dawr thlen hma ah chuan kalkawngah kan ding tlar ṭhup mai a. Min hmu ni ngei tur a ni. Tichuan, a lokalna lam pan chuan a lêt leh ta duai duai a!

          (Note : He 'Article'-a an mihring hmingte chauh lo chu phuahchawp (figment) a awm lo, ka hmuh ang anga ziah a ni. An hming diktak khi chiang takin hria, mahse mumang a ni a, thudik tam zâwk awm mahse dawt a tam zâwk fo ṭhin. Mite tân ho lam viau mahse, rilruah ziaka dah ṭhat atân a pawi chuang lo vang e, mi pawisawina a nih loh phawt chuan a thu kalhmang a mawi loh ang angin dah ṭhat a ṭha e tih avânga dah ve mai chauh ka ni e. Thutak khuka khukpui tur a ni lo tih erawh kan hriat a ṭha awm e)