Aizawl | April 24, 2019: Mizo Students Union (MSU), General Headquarters, Aizawl chuan vawiin chawhnu dar 1 khan Chief Minister Pu Zoramthanga chu a office-ah President Pu Vanlalliana Khiangte hovin an kawm a. He hunah hian MSU, Shillong leh MSU, Sub-Hqrs Bairabi hruaitute an tel bawk a ni.
MSU chuan kum 30 zet zirlaite an zirna kaihhnawih zinna tur a STUDY TOUR budget awm tawhlo, kumin budgetah Study Tour atana cheng nuai 50 dah a ni chu lawmawm a tih em em rualin Mizoram a zirlaite leh college hrang hrangte ngaihtuahin beitham a ti hle a. Zirlaite mamawh phuhru zo turin a tlem berah cheng nuai 150 dah turin CM zahawm tak chu a ngen a. Chief Minister chuan thil theih a nih thu leh ruahmanna siam a nih tur thu MSU hruaitute a hrilh a ni. MSU chuan Mizo zirlaite chu kumin a an zinna tur STUDY TOUR sum chungchangah thlaphang lo turin a chah nghal a ni.
MSU chuan Bairabi khua a Kawnpui lui lei (Bailey bridge) Mizoram tana lei pawimawh tak, a awngrawp tawh em avanga nunna atan a hlauhawm tawh chu October thla ral hma ngei a RCC Bridge a thlak turin CM a ngen a.
MSU Shillong hruaitute'n Asst. Residence Commissioner chungchang a ngenna an siam ah CM in hmalak a intiam avangin MSU chuan lawmawm a ti hle bawk.
MSU chuan mipui rinngam sawrkar leh zirlaite tan innghahna tlak sawrkar a awm reng theih nan Chief Minister Pu Zoramthanga chu duhsakna a hlan a ni.
Post a Comment
He post chungchanga i ngaihdan lo sawi ve rawh: