THLALÂK

          

                        ~ Centenary C. Lalzahawma

          Zing dar 3:22 a lo ri a, zing dang ang thovin Whatsapp ah ka lût hmasa ber a, Instagram ah ka lût leh a, Facebook ah ka lût leh a. A hma zawng pawh a 'Thlalâk' ka lo hmuh fo tawh ṭhin 'Vanglaini Thlalâk Group'-a 'Thlalâk' te chu ka hmu nawn leh a. Nia, post tharlâm pawh ni miah si lo, mahse tukin zing ang êm êm a ka hmuh mawi awm ka hre hauh lo! Nia, "Kan hmangaih ber berte pawh hi a hma zawnga kan tâna hlutna nei an ni bik lo, kan hmangaih nî aṭâng chauha kan tâna hlu ta viau te an nih kha maw?," tiin ka ngaihtuah neuh neuh a! Engkim mai hian 'hun lai bîk' an lo nei a nih dawn hi ti chung zêl chuan 'Thlalâkte' chu ka enthla zêl a!

          Chu velleh ka rilru ah thil pakhat ka lo tih ve fo ṭhin chuan ti turin min tur leh tlat a! Tichuan, ka Phone a Memo ah chuan lûtin ka rilrua thil awmte chu ka'n thai tla leh ta mawlh mawlh a! Thlalak chu ka en hnuhnun zâwk apiang mai chu a nalh in ka hria! Lehkhabu chhiar ang mai niin ka hria, lehkhabu pawh hi kan chhiar hnuhnun zâwk apiang hi an ziak thiam in an ziak ṭha emaw tih mai tur khawpin an lo ziak thiam fo ṭhin! Tichuan, thlalak chu ka enthla zêl a, pipute sulhnu lenglen thlak tak tak te, khawvêl awm tirh ata Siamtu Pathian thilsiam Zoram chhûng leilung mawina te, nungcha leh sava ten leilung awm tirh ata an lo tih fo ṭhin anga ni tin an chaw zawn dân leh hmân ata tawh tun thlenga Siamtu'n, ni tura a siam ang anga an nih dânte chu a lo lang zêl a!

          Ka thlalâk hmuh a zir chuan a chângin ka nui a, a chângin ka lungngai a, a chângin ka lung a leng a. Ka thil hmuh apiang mai chuan a hmunah suangtuahna in min hruai zêl bawk a. A tak aia a a tak loh bîkna a awm chuangin ka hre love! Mak ka tih êm êm chu, "Engkim a nih dân tur an thlapa hmân ata tawh tun thlenga ni tina thil thlengte hian Siamtu Pathian a awm ngei zia an finfiah chiang hle a ni," tih hi!

       Lui tui luang lai thlalâk a lo lang a, kha ti zat kum pui lingleta ni tin, zan tin a tui luang kha a la ngai reng a. A lo luan chhuahna hi nge mak zâwk a luan chhuahna lui mawng lam hi ni ang? Lui tui luang chuan lui dang a fin zêl a, chhui chhuah sên a ni love! Tichuan, ruah sur lai thlalak a lo lang leh a, lunglenna lamah min hruai lûtin kan naupan lai min hriat chhuahtir a. Naupang rilru ka pu leh ta dêr mai!

          Tichuan, suangtuahna a kal zêl a, "Tuite chu tuihu ah changin vân lamah a hip chho a, chhum chhah tak takte-ah a insiam a, chu chu ruah malah insiamin ruah tuiah a insiam leh a, ruah a lo sur leh ṭhin. Mahse, thla tam ni eng hmu lovin ruah sur mahse a kuang chin bak a awh chuang si lo," ka ti a. Tichuan, "Sik leh sa inthlâkte, rannung kan hmuh a hming kan hriat si loh te, tlai chi hrang hrang kan hmuh an ṭangkaina kan hriat miah si lo tamziate chu ka ngaihtuahna ah chuan a lo lang zêl a, khawvêl mi kan tam tehrêng nen pakhat mah kan hmel inang lo a a siam thiam maite chu ka ngaihtuahin mak ka ti bang theih meuh lo a ni."

          Tichuan, ka suangtuahna chuan mipa hausa nikhua lo deuh deuhten hmeichhe awm ṭha duh lo deuh deuhte an duh duhna hmuna an hruai kual zung zung ṭhin ang hian hmun hrang hrangah min hruai kual zung zung ni berin ka hria! Nia, thlalâk hian nunhlui min ngaihtir fova, a thlalak a zirin min ti chak in min ti zawi fo bawk. Hmân ata tawh vawiin ni thlenga Evidence atâna ṭha ber chu thlalak hi a ni si a! "Thlalâk hi a hun lai a zir zêlin mihring nundân pholangtu awmchhun a ni bawk."

          Thlalâk hian leilung mawina nasa takin a puang chhuak a, leilung mawina puang chhuak tura beitu Photographer tam takte hi mi bîk an ni. A bîk takin keini ang mi retheite tân an ni leh zual. A chhan chu dam chhûnga kan la hmuh ve ngai loh tur hmun mawi tak tak min hmuhtir si a! Thilsiam mawina chu Siamtu mawina vêk a nih angin thilsiam mawina puang chhuaktu chu Siamtu mawina puang chhuaktu a ni! Naute hmeṭha deuh i hmuh chuan a nu leh pate hmu miah lo mahla a nu leh pate chu an hmelṭha a ni tih i hrethiam mai ang. Hetiang tho hian kan mawinate kan in puan chhuah sak tawn a ngai fo ṭhin.

         A chhan chu hringnunah hian, "Midang chanchin mahni chanchin anga sawi a ngaih chângte, mahni chanchin midang chanchin anga sawi a ngaih chângte hringnunah hian a thleng fo ṭhin." A chhan chu mahni chanchin kan sawiin miten mi chapo enin min en a, midangte chanchin kan sawi lahin mi rêl kan hlawh leh si a! Hei vâng hian fimkhur a ngai a, kan chanchin lungchhiat thlâk takte pawh midangte tawn anga sawi chhuah a ṭul chang a awm fo rêng a ni.

          Eng pawh nise, thlalâk hian mihringte dinhmun nih mêkna aṭângin dinhmun sâng zâwka awm thei turin phurna min siam sak fova, kan chauhna bulpui niin kan chakna hnar a ni tel a, ni tina kan hip luh, hming nei si, a awm ngei a ni tih kan hriat bawk si, mahse khawvêl awmtirh a ta tuman an hmuh ngai miah si loh 'boruak' mah a ṭângkai si chuan fan ngai loh ram min fanpuitu, hriat ngai loh min hriattirtu, hmuh ngai loh min hmuhtirtu 'Thlalâk' phei hi chu mihring nunah hian a lo va'n ṭângkai leh zual dawn êm!