ZOPHAI BUAI KUM KHATNAAH MZP IN ZOFATE CHAWLHBUK SAK CHUNGCHANG REL LEH, MZP IN MARCH THLA RAL HMAIN ZOFATE CHAWLHBUK SAKNA TUR ENFEL TUM

Aizawl | March 11, 2019: Mizo Zirlai Pawl General Headquarters Executive meeting an pawl president  Tv. L Ramdinliana Renthlei, kaihruaina hnuaia vawiina neih chuan Bairabi Zophai hmuna Zofate chawlhbuk sak chungchang,  Sikul naupang tan chess-a in elna, College zirlaite tan hnamlam intihtihsiakna leh Quiz intihsiakna neih te an rel.

MZP in Zophai Chawlhbuk sak a tum vanga Zirlaite tawrhna ni kum khatna chu nimin kha niin, kum khat a vei hnu vawiinah Zofate chawlhbuk leh ramri chungchang hi rel lehin sak leh ngei an tum a, a sakhna hmun tur endik turin March thla chhunga Zophai kal an tum

Meeting chuan Bairabi Zophai a MZP-in Zofate Chawlhbuk sak a tum chu a la thulh lo a, MZP chu a dinna ngaiah a la ding reng a, Zofate Chawlhbuk sak chhunzawm leh ngei turin a rel a ni. Ni 8 leh 10 March,2018-ah Bairabi Zophaia Zofate Chawlhbuk sak tum a ni a, Assam Police nen innawr buaina avangin thisen tam tak a luang a, Sawrkar lamin hma lak tum anga an lan vangin tun thlenga sak theih a ni ta rih lo a ni. 

MZP chuan an pawl thuchhuah ah, "Sorkar hmasa lakah MZP a beidawn hnuah Sorkar thar a lo piang a, MZP chuan beiseina sang tak a neih avangin Mizoram Sorkar thar a lo pian ve leh Chief Minister leh Home Minister hnenah lehkha pek a nih bakah tawngka ngei pawhin  vawi tam tak a sawipui a, Bairabi bialtu MLA pawh sawipui a ni tawh nghe nghe a ni. Assam leh Mizoram ramri enfeltu tur committee sang Core Committee pawh din thar leh turin ngen a ni a, tun thlenga ramri ngaihtuahtu tur Core Committee din thar a la ni lo hi MZP chuan kan Sorkar hian ramri hi a vei lo hleah a ngai a ni." tiin a tarlang.

MZP chuan Mizoram Sorkar chu zirlaiten vuak an tawrhna, Silai hial a kah an tawrhna leh thisen hial a luan tawhna Assam leh Mizoram ramri hi tun ai hian vei se a duh hle a, hemi chungchangah hian chak taka hma la turin Mizoram Sorkar chu a ngen nawn leh a ni. Tun March, 2019 thla chhung hian Bairabi Zophaiah Zofate Chawlhbuk sakna tur enfel turin MZP chuan kal nise tiin a rel a ni.

MZP chuan Thangtharteah hnam ziarang leh hlutna a tlakhniam zel avangin kan hnam rohlu leh nun dan mawite vawnnun zel tha a ti a, thangthar zawk ten kan hnam lam ngei  pawh kan thiam mumal tawh loh avangin Mizoram pumhuapin hnamlam intih siakna neih  tha a ti a,  Mizo hnam lam tuipui leh chawi vula a lo awmzel theih nan College zirlai zawng zawngte chu he intihsiaknaah hian tel vek turin MZP chuan a sawm a ni.

MZP chuan, College zirlaite  an zirna mai piahlamah hriatna zau zawk leh thiamna tak tak anneih theihna tur atan leh hmasawnna an neih nan Mizoram puma College zirliate tan Quiz Competition buatsaih nise a ti a, he competition a tel tur hian College zirlai te inbuatsaiha tel vek turin MZP chuan a sawm nghal a ni.

Meeting-ah hian Chess Competition neih chungchang relin, Zirlai naupang zawkte  lehkhazir mai piah lamah thluak tha tak tak an awm tih a hria a, chung mite chu an talent pho chhuahsakna atan leh an hun lo kalleh zel tur atan chona anneih theihna turin Mizoram puma zirlai naupangte tan Chess competition siam nise a ti bawk a, Chess thiam leh tui zirlaite  inbuatsaih turin MZP chuan a sawmin  tel ngei turin a ngenin a sawm nghal bawk a ni.