Sikul tan hun sawi a tul leh ta!

- K Zothanpara

Zinga tho tlai thin tak hian thawh hma i'n sawi mawi leh chiam teh ang! Mizo thalaite nuna eng emaw ti taka awmzia nei ve tlat Valentine's Day - kumin February 14 hi tehna atana hmangin www.timeanddate.com in ni chhuah leh tlak hun a tarlan hi en ta ila.

Khawpui   Chhuah hun   Tlâk hun

Aizawl 5:53 AM 5:13 PM

Delhi 7:00 AM 6:10 PM

Mumbai 7:07 AM 6:38 PM

Ni chhuak - sikul tan

Mizoram sorkarin hmân kum lawka sikul tan a tihhma hma khan Mizorama sikul tan hun chu zing dar 9:00 leh 9:30 inkar a ni tlangpui. Zing dar 9:00-a sikul tan angah ngai ta ila, kumin February 14-ah chuan Mizoramah zing dar 5:53-ah ní a chhuak dawn a, ni chhuah leh sikul tan hun inkarah darkar 3:07 a awm tihna a ni a. Nipui lai, zing dar 5:00 rîk hmaa ní a chhuah hunah phei chuan darkar 4 chuang a awm dawn a ni. Tuna sikul tan hun hman mek, thlasikah zing dar 8:30 leh nipuiah zing dar 8:00 atanga chhût chuan, ni chhuah hun leh sikul tan hun inkar tlemin a zîm ve hret thung ang.

Hetih lai hian, India ram khawpui ber Delhi-ah chuan zing dar 7:00 leh 7:30-ah sikul an tan tlangpui niin Delhi University hnuaia zirtirtu pakhat chuan a sawi. Chuti a nih chuan, kumin February 14-a Delhi-a zing ni chhuah hun 7:00 AM leh sikul tan hun inkarah a tam berah minute 30 bâk a tla lo a, thenkhatah phei chuan ni chhuah hun leh sikul tan hun a inrual tihna a nih chu. Mumbai khawpuiah phei chuan ni a chhuak tlai leh zual a, sikul thenkhatah chuan ni chhuah hmain sikul an tan hial awm e.

A chunga kan sawi atang hian India ram khawpui liana zirlai naupangte aiin Mizorama zirlaite'n ni chhuah hun leh sikul tan hun inkarah hun an inneih tam hleih hle tih kan hre thei a. Ni chhuah ruala sikul an tannaah phei chuan an naupangte chu ni chhuah hma darkar khatah tal an thawh a ngai tawhin a rinawm. Chutiang taka hmaa tho thin naupangte chu khawngaih tur nge, khawngaih loh tur, ka hrethiam chiah lo a; kan Mizo naupangte chunga thleng ni se, engtia ngaih tur nge tih pawh ka hrethiam lutuk lo!

Tûkthuan leh ni êng hun

Mizote hi tun hma deuh chuan kut hnathawk vek kan ni a, lo neia eizawng kan ni tlangpui a, Aizawl leh district khawpui danga chhungkaw tam takte pawh an ni. Hmá taka chaw eiin, dar 6-7 ah chuan an feh chhuak tawh thin. Hetiang hi tunah pawh thingtlang hmun tam takah chuan an awm dan a la ni. Zing dar 7 vela feh chhuak tur chuan dar 6 velahte chaw ei a ngai.

Sikul tan hma duh lote'n Mizote chaw ei hun nen a inmil lo tih an sawi thin. Tun hma chuan Mizo chhungkaw tam berte (thingtlang leh khawpuiah pawh) tukthuan ei hun chu dar 7 vel a ni. Nun dan phun a inthlak hret hret a, kan che tlai tial tial a, tukthuan pawh kan ei tlai tial tial a; tunah phei chuan thalai zingah zing dar 10 hmaa chawi ei ngai lo tam tham tak an awm tawh.

Sikul tan hma a nih a, chhungkuain chaw kan ei hma deuh hian, tun hmaa Mizote tukthuan ei thin hun angah chaw kan ei tihna a ni mai a; Mizote nunphung ni lo lutuka ngaih tur a ni lo. Zing dar 7:00 vela chaw ei hi Mizo nun phungah thil thar a ni lem lo.

Zing dar 9:00-a sikul tan laia zan dar 11:00 vela mu a, a tûk sikul tan hun nang tâwk tura thil tih ngai zawng zawng nen, zing dar 7:00 vela tho thin kha, zing dar 8:00-ah sikul tan a nih chuan zan dar 10:00 velah an mut a, zing dar 6:00 velah an thawh a ngai tihna a ni mai a. A va harsa lo tak! Kan ngai harsa a, kan la urh mai mai a ni.

Thawh hun leh sikul tan hun inkarah darkar hnih ve ve a awm a; tukthuan ei chungchangah pawh thil harsa tur a awm lo. Mut hmaa thawh hma hi naupangte hian an tlin lutuk, naupangte enkawltu puitlingte hian kan tlin lo zawk a, sikul tan hun hi kan duh lo mai a ni lo maw?

Thingtlang lam

Sikul tan hma a nih tan tirh lam khan a duh lote chuan thingtlang lam hi chhuanlamah an hmang thin a. Thingtlang lam tan hlei hlei hian sikul hun tih hma hi a awlsam zawkin ka ring thin. Sawi tawh angin, thingtlang chhungkua, kuthnathawka ei zawng, taima chhungkuate chu, ka hriat ve lai chuan zing dar 7:00 velah chuan feh turin an chhuak sung sung tawh; chutiang a nih chuan, dar 7:00 hmain tuk\huan an ei tihna a ni. Thenkhat phei chu zing dar 6:00-ahte an chhuak thin. Hetiang hi tunah a nih tawh lo a nih chuan, hna an thawk nêp ta deuh pawh a ni mai thei.

Zing dar 7:00 vela feh tura chhuak thin thingtlang nu leh pa tam tak tan zing dar 9:00-a sikul tan ai chuan dar 8:00 vela sikul tan chu a remchang hle ang; feh tura an chhuah rualin an fate pawh sikul kai turin an chhuak hman vel dawn tihna a ni.

Sikul bân hun

Tlai lama bân hun chungchangah, sikul hun tihhma a nih hmaa sikul bân hun chu tlai dar 3:00 - 3:30 a ni tlangpui a, naupang zual deuhah dar 2:00 - 2:30-te pawh a ni âwm e. Heng chawhnu dar 2:00 atanga 3:30 inkar hi feh haw hun a la ni lo a, sorkar pisa bàn hun a la ni hek lo. Hetih hun laia naupang sikul bángte lo chiau-au hman nu leh pa chuan darkar khata an bàn hma pawhin an lo chiau-au hman tur a ni a; an chiau-au hman lo a nih chuan an chiau-au hman lo ve ve tur a ni. A chhan chu - sikul tan hma a ni emaw, tan tlai a ni emaw, an bân hun hi nu leh pa hnathawka chhuakte haw hun a la ni lo hrim hrim (lonei, kuthnathawk, kamding, mi hnuaia inhlawhfa, sumdawng, etc. zawng zawng huamin).

Tlai lam hun

Darkar khata sikul bàn hma hi sikul naupangte'n an sual phah viau ka ring ve thei lo. Naupangte sual leh that turah darkar khata sikul bàn hun danglam hian a hril vak lo ang. A sual tur chi chu tunah pawh an sual tho. A nih leh, darkar khatin báng tlai ta zawk se, an fel phah dawn emaw, sual kawng zawh tur tam takin an zawh loh phah dawn em ni ang? Ni lo.

Zirlai thenkhat chuan lo sual phah tehreng pawh ni se, hmang tangkai mi tam tak an awm ve bawk. Hman tangkai theih dan chu sawi vak a tul lo ang. Mi thenkhatin an sual phah theih rin vang ngawta mi tam takin thil tangkai leh hlâwk zawk tih theihna hun siamsak loh ngawt chu a dik bik lo.

Tlai dar 3:00 - 4:00 vela sikul bân a nih hian, thlasikah phei chuan ni a hniam tan tawh viau. Sikul bân hnua tuition la khawtlai zirlai eng emaw zat an awm thin bawk. Sikul tan hma a nih hma khan khua/veng hla deuh atanga sikul kalte chu an thim fo awm e; zirlai naupangte tan a tha viau lo. Chutiang thil chu sikul tan hma a nih hian a chhâwk em em a ni.

Sikul kalna hlá

Aizawl daifêm deuha naupangte zinga khawpui chhunga sikul kai eng emaw zat an awm a, thingtlang lamah thenawm khua sikul lut eng emaw zat an awm bawk. Hei hi sikul tan hma duh lote'n chhuanlamah an hmang thin. A dikna chen pawh a awm ang.

Aizawlah mahni in atanga hla taka sikul kalte leh thingtlanga thenawm khuaa sikul kalte hi sikul tha zawka an ngaih pan an ni tlangpui a; thiamna leh hmasawn an duhna vang a ni a, a lawmawm. An khua/vengah sikul a awm lo a ni lo a, an duh chuan an in atanga hnai tê-ah sikul an lut thei reng. Mahse, hmun hla zawk an pan a, chumi avanga buaithlak zawk deuh awm theite chu an hmachhawn ve mai tur a ni.

Thawh hma inzirtir

Mizo thalaite zingah hma tak taka tho a, zing kara thil tha tak tak ti thin tam tak an awm laiin, tam tak chu an tho tlai hle tih phat tur a awm lo. Khawpuiah ngat phei chuan zing dar 9:00 hnu tho thin an tam lutuk, dar 10:00 hnua tho thin pawh tam tak an awm. Zing dar 7:00 rîk hmain Aizawl khawlaiah Mizo thalai hmel hmuh tur a awm mang lo, hnam dang hlir hmuh tur an awm; khawlai chu sawi loh, mahni in chhungah pawh Mizo thalai hmel hmuh tur a tlém.

Aizawlah hian thenawm khawvengte inah han léng kual mah teh u. Chhungkaw tam takah chuan zing dar 7:00 - 8:00 inkar velah pawh chhungkaw nu ber emaw, an awmpuite emaw an lo che sawk sawk ang a, eirawng an lo báwl ang; an fanu/fapa, nula tlangvalte erawh chu in hmu mai lo ang - an la mú a ni. Hei hi Aizawl mai bakah, kan khawpui dangte leh thingtlang hmun \henkhata kan awm dan, kan hun tawn mek a ni. A lungawithlak loh ve tlâwt a - siamthat ngai a awm a ni.

Kan thalaite nunphung tha lo hi a tha zawka thlak a ngai a; Pathianin kan nun dan tura hunbi min pek bawhpelha kan thalai tam takin hun an hmang mek leh an pung zel hi siamthat a ngai. Engtin nge kan siamthat ang le? Tun atanga naupangtea kan inzirtir loh a, naupangte hi an thawh tlai than a, an tleirawl hun, nulat tlangval thlenga thawh hma nachang hre loa an thawh tlai suau suau mai zawngin, Mizo thalai tam ber hi kan tho tlai thúm ang a, kan hnam pumpui tan hian a la pawi dawn lutuk.

Tuna thalai ni mek, nula leh tlangvalte atanga siamthat theih chin a awm ngei mai; chutiang bawkin, naupan lai atanga buatsaih a ngai. Naupang an nih lai atangin thawh hma zirtir a ngai a, thawh hma chu an nunphungah behtir (habit-a neihtir) a ngai. A tak takah chuan, tih tur bik a awm loh chuan naupangte pawh hian thawh hma an peih meuh lo a, mut an thlahlel ve tho mai. Chuvangin, an thawh hma theih nan tih tur siamsak thiamte pawh a ngai a; sikul tan hma pawh hi hman tangkai theih tak a ni ngei ang.

Tlángkawmna

Hmasawnna thil chi hrang hrang kan tawng chho zel dawn; chu'ngte chu tangkai tak tak an ni ang a, thenkhat erawh chuan a tha lo zawngin an hmang ang a, chhiatpui zawkte pawh an awm ang. Sikul bàn hnua hun âwl lo tam ta zawk tur pawh chhiatpui tâwk tlem azawng chu an awm mahna, thatpui zawk leh hmang tangkai tam tak an awm ve bawk.

Sikul tan hma a nih chuan thawh hma a ngai, tho hma tur chuan mut hma a ngai. Mut hma chuan zana electric êng chhit hun a rei lo deuh nge nge dawn a, chu chu sum leh kawlphetha renchemna tha tak a ni a, ram leh chhungkaw economy khawih pha thei hial thil a ni. A tawp berah chuan, hmasawn tur hian thil thar kan chin chhuaha hma thar kan lak zel a ngai a ni tih i hria ang u.