SHC interim sawrkar lalut; Hmasawnna thlen turin kan thawk ang - CEM Lalthlamuana Hmar

Aizawl | February 7, 2019: Sinlung Hills Council (SHC) sawrkar lailawk (interim) chu vawiin 7 February, 2019 (Ningani) khan Aizawl DC Chamber ah lakluh a ni a ni a, Chief Executive Member atan Lalthlamuana Hmar lakluh a ni. Lakluh inkhawm hi Aizawl district Addl DC (DC Charge la mek) VL Hruaizela Khiangte in a kaihruai.

SHC CEM Lalthlamuana Hmar in thutiam a lak zawhin a hming a ziak

Lalthlamuana Hmar, CEM SHC

 Lalthlamuana Hmar chu Sinlung Hills Council Chief executive member (CEM) atan lakluh a ni a,  Chairman atan Lalmalsawma Darngawn, Deputy Chairman atan Pu Lalbiaknunga, Executive Member (EM) atan mi pali leh member pangngai mi pasarih te lakluh an ni.

He huna thusawitu SHC CEM Lalthlamuana Hmar chuan, “Council hmasa kha thla ruk chhungin inthlang hmanin kan awm lova, tuna mi pawh hi thla ruk chhung emaw SHC inthlan hma zawng atana ruat a ni” a ti a. An hmachhawp sawiin, “ keini council member te hian kan mawhphurna chu election nei hman tura hna thawh hi a ni a. “ a ti bawk.

SHC area hmasawnna atana an thawh dawn thu sawiin, “Kan bial hmasawn lo tak hmasawnnan a lungrual taka thawhpuiah ka sawm che u a ni” tiin SHC member tharte a sawm bawk a ni.

CEM a nihna anga hmalak a tum dan hrilin, Pu Lalthlamuana chuan development leh council election chu a ngaihpawimaw hmasak ber a nih thu a sawi a,  Lok Sabha election hma ngeia tih tur tul tih zawh hman an tum thu leh  hun remchang hmasa berah Chief Minsiter leh General Administration Department changtu ni bawk Pu Zoramthanga sawipui an tum thu a sawi bawk.

Pu Lalthlamuana chuan MNF kaihhruai Mizoram sawrkar ah beiseina sang tak an neih thu sawiin, state sawrkar in interim a awm reng chu a remtih bik a rin loh thu leh council puitling tak a nih ngei theih nana hma an lak ngei a rin thu a sawi bawk.


"Congress kaihhruai sawrkar nen inrem ni mahila, keini chuan Mizoram sawrkar nena inremah kan in ngaia, chuvang chuan MNF sawrkar ah hin beiseina sang tak kan nei a, he council ah hian party rilru kan pu lova, council a hlawtlin theihna tura inthlan buatsaih vat chu sawrkar ngenna leh sawrkar pawhin chu chu ngaihpawimawh hmasa berah a neih ka ring," tiin a sawi bawk.

Lalthlamuana Hmar hi Hmar Students' Association (HSA) hruaitu hlun niin,HSA General Headquarters president hlui niin, tunah hian HSA Assemly speaker ni lai mek a ni bawk.

Tarlan tawh angin January ni 18, 2019 khan Mizoram sawrkar chuan SHC interim period chu thla ruk emaw Council inthlan neih hma  atan a pawtsei a, hemi rual hian CEM, Chairman, Deputy Chairman, EM 4, member 5 leh nominated member 2 a ruat nghal bawk a ni.

 

 

Sinlung Hills Council memberte chu hetiang hi an ni;Chief Executive Member (CEM) Lalthlamuana Hmar, Sakawrdai/ Shillong, Chairman Lalmalsawma Darngawn, Tinghmun, Dy Chairman Lalbiaknunga, Saiphai,  Executive Members atan Lalrosiem, Khawlian, Ngursangkima, Phuaibuang, R Lalfakzuala, Sakawrdai leh Melody Lalchhuangzeli, Sakawrdai bakah member atan D Hmangaiha, Sakawrdai, H Lalengzauva, Ratu, Lalruatliana, Saipum, Zahmingliana, Vanbawng, HC Lalmalsawma, Zohmun leh Nominated Member pahnih Rodingliana, Khawlian leh Kawlremthanga, Suangpuilawn te ruat an ni.