MISUALPA, KA BEISEI LO

-        

 - -  Laltlanhlua Hlawnchhing

Ka sam a rawn chûl hliau hliau a, ka meng diar diar a, "Naute, Morning Kiss," ti pah chuan ka biangah a fawp seih a. In la duhawm vel pah chuan, "Ummmhh.... Ka hmangaih lutuk che," ka ti a.

 A tih dan ṭhin ang bawk chuan a tho chhuak a, Wash Room lam a pana, tui a herh haw ser ser a, a inphih fai a. A tih dan ngaite bawk chuan a zai rût rût a, nui vur vur chung chuan khum aṭang chuan ka lo ngaithla leh kar a. Nupa tak tak kan nih aṭang thla hnih zet zawt a liam ta a, nitinmai hian ani ka tawng hi ka vanneih zia ka hriat belh ziah a. Ani aia pasal duhawm leh ṭha zawk he khawvelah hian an awm chuang lo ang..Wash Room aṭang a rawn chhuak a, tuk danga a tih dan ang thoin a rawn ti leh dawn tih ka hriat avang chuan muhil der chung chuan ka lo inring lawk sa rân a. A towel a rawn awrh chhuah chu a bang fel a, a kut vawt chuan ka hnung rawn zenleh tumin puan chu a rawn hlim de de a, a zen hman lo chiah tihah chuan ka leh hawi thut a, "Misualpa.....," ti pah chuan, kalukham chuan ka hlap chiam a. "Heiii..heiii...ka tlawm, ka tlawm.....," a tia, ka vuak fuh loh hlau em em si chuan a lo indang lawi a. Keilah chuan, "I sual si, Misual chu vuak tur," ka tia, lukham chuan ka vei zawm char char a. Kan nui dun báwkbáwk a. "Ehhe heee......ka tlawm tih tawh hnuah pawh min la vuak zel chu le," a tia, a inseh ruh der vel a. Na miah si chuan nghet takin min man bet a, ka lukham a la thla a, min chawi lawp a, min bawhbet ta tlat a, "Misual chu vuak tur a nih si chuan, nihleh mifel chu Muah tur," a tia, "Heiii..heii...i phakar, ifair lo...," ka ti ve chul a, tal chhuah tak tak hlau em em si chuan ka tal vel chiam a.

A kut tum lian tak chuan ka ban chu a chelhbet hneh ngei mai, a mit páw dang raih mai chuan minmelh kak a, ka tuiral hi a ni ringawt ṭhin. Ka Pasal duhtak hi a va pa tak em! A nupui hi a lakah hian ka zam chhe lek lek ṭhina nih hi..A rawn kun hniam a, After Shaving Lotion-a hman, rim pa zet chu a nam ham ham a, a rawn kun hnaih leh zual a, ka maimitchhing hmiah a, ka hmuiah chuan a hmui chu a rawn sik tir a, muang changin a fawp dek dek a, keipawh chuan ka tihtur ka hria a, ka thiamdan ang ber chuan ka chhanglet ve bawk a, ka ban a vawn beh tlat chu a thlah riai riai a, keichuanka kut chuan a dar pharh tak maiah chuan ka kuah vat a. A kechuan khum mawng lama rizai chu a thai chho a, "Inkhuh ang aw," a tih rual chuan puan chuan min vur nghal a, chutih rualchiah bawk chuan lukham hnuaia a phone chu a rawn ri ral ral a, "Naaaaaa....Salaaaa...," tih pah chuan puan chu a hlím a, ka lo nui vur vur a. Phone chu a ban a, "Boss a nih hi," atih rual chuan a chhang a, " Aw..Hello...Good Morning, Boss.""Aiii...laklawhlo e, buai lo," khi suk pah chuan min rawn melh zeuh a, ka lo nui vur vur a, "Aw...aw...theihnghilh lo e a, umm....tlai lo ang, dar8 a nih kha," "Aw le....chaw ei tui le," phone a dah a.

"A hun lo ṭhin a sin, Meeting min rawn remind leh ringawt a nih kha, zing kar karah," a tia. "Chuan.......engtin..," ti pah chuan min rawn pan a, "Hmmm.....kan laklawh loh kha aw...." ti pah chuan ka tho ve hmak a, "Heiiii.....i phakar," ti chung chuan, a hnunglam aṭang chuan min rawn kuah a, "Heii...heii.....Duat, dar7a ri dawn, dar8 Meeting i neih kha aw, i tlai mai tur a sin," ka ti a, "Tlai dawn lo......Rei lo te....," la ti ṭalh chung chuan min kuai her a, chuvelah a beng hnuai vun nem laia seh deuh sawk chung chuan, "Love Bite," ka tia, inhnuai lamah ka tlan thla vat a. "A naaa....i va sual takk...," a rawn ti a, kan in um thla chel chul a..Unau zinga upa ber a nih avangin inneih zawhah in hrang kan chang nghal a, kan inngaihzawn lai aṭangin in leina tur pawisa kan khawl dun tawh a, chu chuan kan chenna hi kan lei ve ta reng a. Kan pahnih chauh tan chuan thawl han han tak a ni. Company lian ve tak pakhatah a thawk ve a, Asst. Manager niin, a Boss, an Manager hian a ring tawk em em a, kan pa2 ei bakah ka nu leh pa(a nu leh pa) te pawh sum leh pai pawn kan la pui thei a, kan duhthusam leh suangtuahna tekha atak ram kan thleng a. Hlimna zawng zawng hi kan ta a ni ber. A Office hlanin keichu in-ah ka lo awm mai a, lehkha ziah ka tui avang hian eng eng emaw ka lo ziak ve mai ṭhin. Tlaiah dar4 ah an bang a, 4:20-vel ah a rawn thleng tlangpui ṭhin.

A rawn thlen rualin room-ah kan chho a, ka inthlakpui a, Wash Room-ah lutin a insil fai nghal ziah bawk a. A in disipline ṭha a, a lak aṭang thil tam tak zirtur ka nei a, ka zir mek zel bawk a nih hi..Eirawng chu ka bawl thuai thuai a, pa2 chauh kan ni bawk a, kan awlsam a. Bawnghnute kan nei a, a duh ber artui ka kang leh anga, tui hang dang a awm chuan kan ei mai ṭhin a. Ka bawl malh malh a, ani pawh chuan a lehkha chhiar tarmit vuah chuan Chanchin bu a chhiar ve mawlh mawlh bawk a."Duhtak, artui hi a lawnga kan nge i duh, tomato nen hian?" ka tia, "aammmhh.....Naute, a lawng khan kang la, duh leh tomato leh brocoli vel kha chanpawlh mai mai la," a tarmit phena a mit fiah kak maia ka mita chiang taka min melh pah chuan, nui siai chung hian a rawn ti thum chap a. Ka pasal duhtak hi a van pa tak em aw. A pa thlawt! "Aw le..Aw le, Lalapa," ka ti ve nghal zat a. "Engtin maw..engtin maw...Lalanu?" tih pah chuan min rawn pan a, min rawn kuah leh chung chung a, "Amak khi i tlai dawn.........."ka ti leh chel chul a, ka chal a min fawp zeuh pah chuan, "Lalanu hi ka hmangaih ber," a tia. Kan in en a, kan nui dun sen sen a.."Duhtak, lo han insiam la, ei theih a ni mai. Khi i tlai palh ka hlau a nia." ka tia, min chhang duh miah lo a. Hre lo awm tak chuan a awm tlat a. "Lalapa....lo han insiam la, dar7:30 a ri dawn a nia..." ka ti leh a.

Min en miah lo chuan, kun deuh ngiaihian, "Hmmmhh... Meeting pawmawh ka nei dawn a, nupui min siamtu pawh ka nei dawn lo. ṭhing deuhin ka kal leh bik dawn a nih hi...pawilo keimahin ka insiam leh mai ang....," a ti bul bul a, inchung kailawn lam chu zawi deuh chuan a pan velchhawp chhawp a. A van duhawm tak aw. A titau vel a nih hi. Ka pasal hi ka van duh ṭhin tak em! "Ka Duat.........amakkkkk......i tlai ka hlauh vang alawm....... nihleh heii ka zo a nimai..........kasiam dawn chiang lutuk, ka pasal hi." ka ti lauh lauh a. "Mahse, i nupui hi min puak chhoh angai tal ang, a siam dawn che chuan..." tih leh tlan phei ka rual a, a hnungzang pharh takah chuan ka zuang kai thlawp a. "Ka hmangaih che, ka nupui duhtak," ti pah chuan, a kut chuan min rawn dawm kang nghal vat a. A dar hlai ṭha takah chuan ka bei thlawp a. A van thlamuanthlak tak em aw! Khawvel hmeichhe vannei ber ka nih hi, ka ti rilru neuh neuh a..Ka duh dan ang thlap chuan ka siam a, ka suit inhmeh ka tih ber ka hak tir a, tie nen.

 Engkim mai chu a inhmeh fel thlep thlawp vel vek mai. "Ka pasal hi a hmel a ṭha ber. Mahse, ka hlauthawng ṭhin, nula ho te hian an lo imaita...mai anga...," kahan ti vel a, ka hmel ka siam ngui a. "Ka Naute, amakk....America President ka nih theih loh aia nasa hian ka nupui duhtak hi ka phatsan thei lo. Ka hmangaih em a tin a ni.Hlauhthawng lo tawp rawh." muang chang fiah felfai zet hiana tia, ka va hlim tak. Ka hmuiah chuan a rawn fawp seih a."Khii....i tlai dawn, tukṭhuan zu ei ang le," ka tia, kan inzui thla a.Chaw chu kan kil a, kan ei malh malh a. Kan ei kham chuan, a file leh pawimawh dang ka han laksak a, damdawi ka ei tir a, Kawngka bul thleng chuan ka thlah chhuak a. Ka biangah a dawm a, ka chalah a fawp a. "Ka hmangaih che, lo in ti nula suh aw," nui chung chuan a ti leh kher a. "Hmmh...nang fe hi aw...nula in an melh che pawn, pawmlai nei i nih kha aw." ka ti ve leh hram a. Kan in Bye Bye lawp lawp a. Inchhung ka lut phei a, dawhkanah chuan a motor chahbi a lo theihnghilh leh reng chu niin.

 A rawn let leh dawn khawp e, ka ti rilru a. Keilahchuan chahbi chu ka la vat a, ka kawrhnuai ah chuan ka dah a, ka hnute inkarah chuan ka thukru ve leh kher bawk a. Ka rinaiin a rawn let rang. "I pasal hi a tar tawh niang, chahbi tel loin motor khalh te ka tum ta mai mai a," a rawn ti lut nang nang a. "Aw...khaw nge i dah...amak ṭhin, i tlai a nge?" kan ti ve leh rih a. "Awii...dawhkanah hian chaw ei lai pawn a awm reng kha. I lo dah sawn hman em ni?" a tia, "Awiawm loh loh. Ka lut ve chauh alawm le," hmunphiat malh malh pah chuan ka ti leh rih a. Ka inrin hmain min kuai her thut a, min pawm a, ka hmuia rawn fawp pah chuan, ka hnute kara ka chahbi dah chu a zen a, a la a. "Dawt sawi leh thil tih ruk hi i thiam ve lo aw." a rawn ti suk a. Kan nui vur vur a. Pawn thleng ka thlah chhuak a, "Duhtak, Cake tuideuh lo lei la, Coffee tuideuh nen ka lo nghak ang che aw," ka ti a, "Teh reng mai," a tia. A tlan liam thleng chuan ka thlir reng a..Pangpar khawi te chu ka hrufai a, darthlalang te ka lo hru fai a, keimah chuan in ka nghak leh a. Ka ngaihtuahna ka kawm malh malh a, ka awm dan leh ka pum leh nasat ṭhin dan te kangaihtuah chuan ka ruak lo em maw ni aw, ka ti rilru a. Fiah tur chuan ka test ve ta ringawt a. Awii... Lalpa ka lawm e, ka lawm lutuk. Nu leh pa kan ni ve tawh tak tak dawn a nih hi. Karuak lo ve ta tak tak e. Ka hlim lutuk chu a chang leh ka zai veirut rut a. Hrilh ka chak tawh takzet. Phone kn ka hrilh dawn emaw ni ka ti hman rum rum a, mahse special taka hrilh ka duh leh ta zawk a. Ka ngaihtuahna ka kawm a, thil ka ngaihtuah chhuak ta thut mai.

Ka hmangaih, ka pasal hi lo prank ta ila, a lo hawn hunah lehkha lo hnutchhiah ila, ka chhuahsan thu leh ka kalsan thu lo hnutchhiah ila, inbiru bawkila, a reaction hmuh a chakawm dawn lutuk, cutia a lungngaihvel lai tak chuan surprise thut a, chanchin lawmawm chu hrilhnghal bawk chu ka tum ta a. A mak ti leh hlauthawng hmel tur mawlh ka hmu chak tawh a ni. Rem chu ka ruat ta a. Lehkha ka ziak anga, room dawhkanah ka dah ang a, Wash Room-ah kei ka awm anga, zim te in ka hawng anga, ka bih thla ang a, insil turin a rawn lut leh ngei dawn a, ka lo surprise dawn khawp ka ti ta a. Lehkha chu ka ziak chhin vel a. Inṭhen chu mumangah pawh duh ngailo tur ka ni si a, inṭhen derna lehkha ziah chu a har duh fu mai. Ka ziak chhin vel a, dik theiin ka hre lo a, a dang ka ziak leh ṭhin a. A tawpah chuan tihian lehkhaah chuan ka ziak ta a._"He lehkha hi i hmuh hunah mak i tih lutuk vanga i tluk loh hram ka beisei. Tlang deuhin ka sawi ang, lemchan hi ka ning tawh thlawt. Lemchan hi ka ning. Hmangaih ngailoh hmangaih der che hi ka ning tawh.

 I sum leh pai ka duh vangin ka hmangaih der che a, hei chen ka thlenpui che a, min ngaihdam kher pawh ka phut lo aw. Kei ai ṭha i phu. Kei ai ṭha i tawng leh em em ang. Keichu mualphona zawng zawng tel huamin ka kalsan ang che, lemchan reng hi ka tlin tawh lo a ni e. Min rawn zawng duh tawh lo la, in enkawl ṭha la, hlim takin awm ang che. Dam takin Mangṭha mai le, Ka Pasal."_Ka chhiar leh chu keimah zawk pawh ka hlauthawng hnuhnawh zawk a, mahse tih ngei ka tum tlang ta a. Dar a kal zel a, dar4 a lam hnai leh ta a. Ka tum ang chuan lehkha chu ka dah thlap tawh a, ka thuamhnaw te ka thukru leh rih a. Ka locker ka tiruak a. Wash Room-ah chuan kan awm chhin vel a, kawngkhar te chu a zim thei ang ber chuan ka han hawng chhin vel a. A fuh dawn cher cher teh e..Dar4 a pel a, in a rawn thlen hun a ni ta a.

Ka position turah ka awm tawh a, sana ka melh pah reng a. Reiloah chuan a motor thawm ka hre ta chiah mai. Inchhung a rawn lut a."Hello.... Ka hmangaih....I'mback..." a ti lauh lauh a. Chhangtu a nei si lo. "Ka Naute hi khawnge a bihruk le, ka man hunah chuan a chaklo ang," a ti leh vel a, chhawntu an awm chuang si lo. Inchung lamah a rawn chho tih a ke pen ri aṭang chuan ka hre thei a. Thawm neihloh ka tum sauh a. Room chu a rawn lut a, ka locker in hawng huau chu a hmuh hmaih lo. A va pan hnai nghal a, a ruak vek si. A hmelah chuan a hrilh a hai ṭan ngei mai. Khumah chuan a ṭhu a, min call a tum a ni ngei ang, phone a hmet malh malh a, ka off hmak si aleh. A hawihai tulh tulh mai saw. Lehkha saw a hmuh hmain Wash Room a rawn lut ang tih mawlh kha ka hlau a, mahse a hmu ta e. A chhiar ta ngei e. Chairah chuan a ṭhu hnawk a, a bula pen chu ala a, lehkhaah chuan eng nge maw ni chu a ziak ve malh malh bawk a. Engtak ni maw. Hla te hi a phuah nghal em maw ni chu le aw, ka ti rilru a, ka nui tut tut a. A tho a, a inthlak nghal malh malh a.

Mahse, ka lo rindan leh beisei dan angin a awm tlat lo. A hmel chu a hkim fu a, a faifuk rut rut a, a phone chu a la a. Tu nge call a nei tlat. "Um...Babe, i hre thei em?....... umm....enteh thil hrilh tur che ka nei i rak ṭhawt maithei a ni.........." a ti ta lauh lauh mai. Ka mit vai emaw tiin ka mit te chu ka nuai a. Mahse, a tak tak ngei zawng a ni si."Ihmaw....kan thil tum kha engmah tih ngai loin a hlawhtling. Hnawhchhuah pawh a lo ngai hleinem, hei...lehkha a lo dah a,amahin a lo chhuak daih alawm. Zanin aṭang a hmun i rawn luah thei nghal." a ti ta siah siah mai.

Ka zawi hnawk a, ka puma naute awm chu ka dawm a, apa, ama pa ngeiin chutiang a sawi chu ahriat ve ka hlau a, ka pum chu ka dawmbet tlat a. "Ka lo hruai nghal ang che, ka inthlak mek. Ka rei lo ang. Min lo nghak rawh aw," a ti a. Phone a dah a. Kamit sulh sulh a, ka lungphu hi a phu rang nge a muang ka hrethiam lo a, ka in sawi dalh dalh te hian ka hria. Ka mumal lo ruai a, ka lu te a hai chum chum a, ka dava ruai a, ka thawk a sak a, hnawhtu awm ni awm tak hian ka thaw hleithei lo. Ka chhuak tawp mai dawn nge, tihian a chhuah hun ka nghak ang a, ka lemchan mai mai hi a tak tak anga thlen tirin ka chhuahsan mai dawn, tih te ka ngaihtuah a, mahse ka naute mawlh hi a ni. Ka dawm vawng vawng a, ka ṭap ring ngam si lo. Ka thaw a chham dawn tak ngial a. Ka zo vek hi a ni mai. Ka ṭhu hnawk a. Ka pum chu ka dawm vawng vawng a..Darthlalanga a sam te siam vel pah chuan a faifuk rut rut a, inhnuai lam pan chuan a chhuk ta a. A liam ta maw tihah chuan, ka thaw kawk a, ka ṭap ta hawm hawm mai a. Ṭap chiang tak ka ni. Ka aw rawl chhuah meuhin ka ṭap hawm hawm a, naupang nuar ang maiin. Ka pum chu ka dawm a,"Apa kha ngaidam hram rawh aw, ka naute" ka ti ṭawk ṭawk a.Ka nunna hi tawp mai se a ṭha zawk lo ang maw, tih te hial kangaihtuah rum rum a.

Mahse, ka naute vang chauh tal chuan chel taka ka awm a ngai mai si. Ka thilntih hi ka ti fuh lutuk nge ka ti fuh lo zawk tih pawh ka hre thiam lo. An lo let hma ngeia chhuahsan fel chu ka tum ta a. Ka tawmna aṭang chuan ka chhuak a. Ka inhnit hlawp hlawp a. Khumah chuan ka ṭhu phei hnawk a. Ka mittui a luang zung zung a. Dawhkana kan inneih thlalak chu ka hmu fuh kher a, ka mittui a sur tir tam sauh a. A bula ka lehkha dah bulah chiah chuan ka lehkha dah a chhiar hlim a, nichina lehkha a ziah ve kha pen hian a lo delh bawk a. Eng nge a ziah tih pawh ka hre chak ber lo. Ka natna belchhahtu a ni ngei awm sia.

Mahse, ka pan phei a, hreh tak chung chuan mit chakna chu hneh loin, ka chhiar ta hram a, tihian a lo inziak a,_"Tunah khan i ṭap nasa viauin ka ring. Ka tihpalh lutuk aw, i mittui tih tlak ka duh ngai loh kha, ka Naute. Mahse, khawngaih takin hetiang zawng hi chuan min fiam tawh miah suh aw. Room ka rawn luh rual khan, Wash Room kawngkhar aṭanga min rawn bih kha ka hmu nghal che alawm, engtin nge chahbi pawh thukru bo thei lo khan, nangmah chu i in thuhruk theih i rin reng reng, thil tih ruk i thiam ve lo ka tih kha, Misualnu. Engtianga zim pawh ni se maw, khawvela mawi ka tih ber ka hmuh nin theih loh i mit meng kha engtin nge ka hmuh hmaih theih ang ni. I va â tak em aw. Ka Naute, a tak takin thleng se, ka awmdan tur i hmu chak viau em ni, khawngaihin hmu chak suh. A chhan chu, hmuh tlak ka awm lo ang, mi â ang maiin ka awm dawn si a. Heii...i cake min chah kha ka theihnghilh a, ka lei leh dawn aw, ka rei lo ang. Coffee tui deuhin lo lum ang che, thlum deuh ka duh loh kha aw. Min prank a, ka prank let hlauh che a nih kha aw. Ka lo hawnah lo in ring ang che, i chak dawn lo, Ka Naute, Misualnu. Ka hmangaih che.(Emoji lei chhuah lem a siam bawk a,"_Ka ṭah nuih tawh a.

Ka hlim lutuk chu ka zuang lo chauh. Ka mittui luanna biang ṭial ruai nen chuan ka nui sen sen a,"Misualpa...Ka tihpalh. Ka hmangaih lutuk che," ka ti zawi sap a.