KIDNAPPING OF GIRL - 13

CHAPTER--13

BY:- Rs Thangluah✍🏻

Dika pawh chu a ṭha ve tawh khawp mai. Damdawiinah chuan a farnu in a awmpui a,a chunga thil thlen dan chu a lungawi lo khawp mai. A farnu chuan,"U Mam,nichin khan hmeichhe 1 a rawn kal a. I harh hunah hrilh turin min ti a,ka va hrilh ang aw,"a lo ti a. Dika chuan,"Tunge a?,"a lo ti vat a. Puii chuan,"A insawi dan chuan Detective a ni awm e,pawnah sawn a nghak che a,"a ti leh a. Dika chuan,"Awle rawn luh tir rawh,"tih pahin a inbeng kang a.

"Khami ni khan Nunui hruai tur khan nangmahin i kal tiraw?,"Jane chuan Dika chu a melh kar mai a. Dika chuan,"A nihna takah chuan khami ni khan Nunui kha Siami nena hruai tur kan ni a. Mahse,Siami khan ka pi bulah chhuanlam eng emaw a siam a,ka pi khan keimaha kal turin min ti a,"tiin Jane chu a hrilh mawlh mawlh a. Jane chuan a hmai duk deuh chur leh a hliam dangte chu a en a,"Mi engzatnge an nih?,"a ti leh a. Dika chu a ngawi vang vang a,"Ammm...ka hriat sual loh chuan mi 5 vel an niin ka hria,"a ti a,a khu buah buah a. Jane chuan,"Awle a lawmawm e,zawhna 1 chiah. Damdawiina i awm hnu hian Siami chu a rawn kal ve tawh reng reng em?,"a ti leh a. Dika chuan,"Ka hriat chinah chuan a la rawn kal miah lo,"tiin mak tih hmel deuhin Jane chu a en a. Jane chuan nui chungin,"Ka zawhna te ṭha taka min chhan vangin ka lawm e aw. Remchangah ka rawn kal leh ang,tunah chuan hahchawl leh tawh rawh,"a ti a,Cabin aṭang chuan a chhuak nghal a.

"Siami chanchin i hriat theih ang ang lo khawn khawm rawh aw. Chuan,kan pu-a sawn engmah a la sawi duh lo mi a?,"Jane chuan Rsa chu Siami thlalak a pe a. Rsa chuan,"A dawih ang aiin dawp chhuah a har zek a,ka chawlhsan rih,"tih pahin Siami thlalak chu a en vang vang a,"A âwm bawr chu a lian hle mai,"a ti zauh pek a. Jane chuan,"Khatiang vang kha lawm mipa ho hi ka thawhpui peih loh chhan che u,"tih pahin Rsa chu a rawn melh râm râm a. Rsa lah chu a lo nui hak hak a,"Mahse,a tluk lo deuh che nih hi,"tih zauh pahin Siami thlalak chu a coy nghal zung zung a. Jane chuan,"I hna kha thawk mai mai teh,"tih pahin an mi man pa an dahna room lam pan chuan a phei nghal a.

"Ka pu,engmah i sawi dawn lo maw?,"Jane chu a vei kual leh thauh thauh mai a. "Engmah ka ti lo a nia,"âw khur deuh dar dar chuan a rawn ti leh a. Jane chuan engmah a sawi tawh lo,vawi 3 vel a hnek pawp pawp hnuah,"Engmah sawi duh lo mah la,he i Phone hian a sawi khawp ang,"a ti a,dawhkana Phone chu a a la,a chhuak leh nghal a. 

"Engtinnge i Inah khan kha Detective kha i luh tir theih a?,"tiin Pu Ruata chuan Pu Thanpuia chu a vin tuarh tuarh mai a. Pu Thanpuia chuan,"Ka tihpalh lutuk,ka thiam loh vek a ni e,"a ti mawlh mawlh a. Pu Ruata chuan,"Ka tih theih tawp ber chu ka ti tawh. Inspector Zothana leh S.I Jolie ka dah hrang tawh a,hei bak chu tih theih dang ka nei tawh lo. Buaina i nei leh a nihchuan i chanai tur pawh i hmu lo ang,"a ti hmarh hmarh mai a. Pu Thanpuia chuan engmah a sawi tawh lova,a hmelah chuan a lungawi vak lo tih erawh a lang chiang khawp mai.

"Ka pi,i Phone,"tiin Siami chuan Pi Maggie chu a âu lâwng lâwng a. Pi Maggie chu a rawn tlan phei nghal vat a,rawn call tu number chu a hriat ngai loh a ni. Hlauthawng ru deuh chung chuan a chhang a;

"Aww Hello,tunge aw?,"

"Pi Maggie maw? A tawp lam hnaih tawh ila tiraw?,"

"Ka fanu kha khawih suh ang che,"

"Nia ka khawih dawn hleinem. Mahse,ka thil duh hi i tih puitlin theih loh chuan i fanu hi a ruang pawh i hmu lo ang,"

"Khang pawisa zozai ka pek tawh hnuah che khan i la lungawi lo em ni?,"

"Police hian min hre lo se ka duh a nia. Tun thla chhung hun ka pe a ng che,tun thla ni 31 hi i hun tawp hun a ni ang aw,"

"Zawnga,"

"Ka nupui tur i ni tihkha hria ang che aw. Nang nei tur che hian ka bei nasa a sin,i pasal hi a neih zawng zawng ka laksak dawn,"

"Tenawmpa,i thil duh chu a thleng ngai lo ang. Tun thla ral hmaa ka fanu kha ka hmu lo a nihchuan,i inchhir ang aw,"

"Min vo ve tihna mi? Khawilam Police nge i rawn rawih dawn a? Nge kha hmeichhe Detective kha i ruai zawk dawn em ni? Kil tinah hian ka hnungzuitu te hi an awm a nia aw,"

"Hmmp,"

Pi Maggie chuan Phone chu a off nghal hmak a,"Tenawmpa,nangmah vek maw lo ni a? I la hre dawn khawp a lawm,"tiin a inseh ruh a. A bulah chuan Siami chu ngawi rengin a lo ding zum zut a,"Siami,tikhan lo awm la ka chhuak lawk dawn nia,"tih leh chhuah a rual a.

"Ka fanu kidnap tu hi ka hre tawh. Mahse,a address erawh ka hre rih lo,"tih pahin Pi Maggie chuan a fanu Kidnap tu Vanlalruata chanchin tlangpui chu a sawi ṭan ta a,"High School kan kal lai vel khan min ngaizawng ṭhin a. Mahse,ka duh ngai lo,tuna kan pa nen hian ṭhian ṭha tak an ni ṭhin a. Mahse,Higher kan nih hnu khan kan pa nen hian kan inzui ṭan a. Chuta ṭang chuan an ṭhian dun pawh an in hmuh thiam loh phah ta ngei a. Tun thleng hian kan pa chuan ngaihdam dil a duh ṭhin;mahse,Vanlalruata zawk hi a rilru a kawi tlat a nih hi. Tichuan,phuba lak tumin hetiang hi a ti ta a nih hi,"tiin mittui tling pam chungin a sawi mawlh mawlh a. Jane chuan,"Awle a ṭha e,amah ber kan hriat tawh chuan kan man har lo ang. Police ho chuan an kut an sil tawh a,keini 3 erawh chuan kan ṭhianpa thattu leh Inspector fanu thattu kha a phû tawk hremna pek ngei kan duh a. Tin,i fanu rubo tu pawh hian a phû tawk hremna chu a hmu khawp ang. Eng pawh nise,i awmpui nula lakah sawn fimkhur ang che. Eng emaw chen chu in chhungte mipa in awmpui tir u la a ṭhat ka ring,"tih pahin Facebook lama Siami Profile chu a hâi a. Pi Maggie chuan,"Siami chu tinge?,"a lo ti hâ mai a,Jane chuan,"Lo fimkhur la ni mai,a bulah engkim sawi lo la ka duh a ni,"a ti leh a. Pi Maggie chuan,"Awle tehreng mai,"tih pahin Jane dawhkana Laptop chu a va melh ve zauh a,"Lawk lawk,back leh lawk teh,"a rawn ti nghal chûl a. Jane chu a back ve mai a,"Siami Profile ka hai a,"a lo ti mai a. Pi Maggie chuan,"Aw amah khi a nih khi Vanlalruata chu,tenawm lutuk mai. Siami nen hian an lo inthurual reng a nih dawn hi,"a ti zui mawlh mawlh a. Jane chuan thlalak chuna zoom a,"Hepa hi maw?,"tih pahin thlalak chu a save nghal a. Pi Maggie chuan,"Aw a nihkha ka chhuah hauh lo ang,Siami pawh chu rawn la nghal law law teh u,"a ti zui bawrh bawrh a. Jane chuan,"Ni love Siami hian kan ringhlel tih hi a hre tur a ni lo. Nang pawn i hriattir tur a ni lo,a hmaa i awmdan ang chiah khan awm la. Tlemin i fimkhur deuh dawn nia,"a lo ti thung a.

"Siami chu an khuaah a haw dawn,"Amy chuan Noodles ei mawlh mawlh pah chuan a rawn ti a. Jane chuan,"Khawiah pawh kal rawh se,kan zawng hmu tho tho ang. Kan lak aṭang hian a tlanbo thui lo tawp ang,"a lo ti vat a. Amy chuan,"Rsa khan a imaita deuhin ka hria. Zu zui ve nghal mai se,"a rawn ti zauh a,a nui hawk hawk a. Jane chuan,"An khua a thleng hman dawn hleinem,an khua a thlen hma in kan daikhalh dawn a lawm,"a lo ti leh vat a. Rsa chuan,"LalAmy,ei mai mai teh,"tih pahin paper hlawmin Amy chu a rawn vawm a. Jane chuan,"Rs,naktukah Sumo Counter a thlen hma ngeiin lo va ti khawtlai ang che,"a ti leh a. Amy lah chu a lo nui var var a,"Naktuk atan chauh ti khawtlai tur hian kumkhua atan i lo ti khawtlai vel a nge aw,"a rawn ti leh a. Jane chuan,"A lo ti khawtlai thei lova,a kaltir a nihchuan kan team aṭangin kan ban ang,"tih pahin a Pistol chu a hrufai hliau hliau a. Amy chuan,"Nih keiin engnge ka tih ve ang?,"a lo ve ngei a. Jane chuan,"Nang chuan Detective sum duh Lucas kha i lo va umzui thei ang,"tih pahin a nui hawk hawk a. Amy chuan,"E khapa kha engtinnge a awm zel tak a?,"a rawn ti hluai a. Rsa chuan,"Detective tlachhia Lucas,"tih pah chuan a nui zui suk a. Jane chuan,"Tak takin Lucas chu min rawn join ve duh chuan pawi ka ti hran lo. Naktuk chu Amy,Lucas chu lo thlithlai deuh rawh aw. A la hmantlak dawn em,tih te kha lo hria ang che aw,"a ti a,a Pistol chu a pai a,"Dar 10:00pm hmaa ka rawn haw lo a nihchuan,ka Airtel-ah khan min lo call dawn nia,"a ti a,a chhuak nghal a.

Siami chu a in pack malh malh a,Pi Maggie chuan,"Engtikah maw i rawn chhoh leh ang?,"tiin a rawn pui a. Siami chuan,"Ka nu damṭhat hun hunah a ni mai,"tiin a lo chhang a. Pi Maggie chuan,"I nu chu lo dam vat vat rawh se aw. Hei hian ka lo kan ve a nge,"tiin ₹500 note 2 hi a rawn phawrh a. Siami chuan,"Aih a ngai lo a nia,engmah a ngai lo,"a lo ti mawlh mawlh a. Pi Maggie chuan,"Kha la rawh,hei i tlai mai dawn. Dika awm bawk si lo,taxi ka lo va koh sak ang che aw,"tiin a chhuahsan daih a.

"Ka pu,khawngaihin i khalh chak deuh thei em? Ka hmanhmawh deuh a,"tiin Siami chuan Driver chu a tur sek tawh mai a. Driver chuan,"Ka motor hi tlanchak vak ngam lohva,"a lo ti zawi sup a. Siami chuan sana a bih sek tawh mai,Sumo chhuah hun chu dar 11:00am.a ni a. Tunah dar 10:45am a ri tawh a,kawng chanve pawh an la tlan si lo. A khât tawkin Driver chu a tur sek sek tawh mai a,Driver lah chuan a speed ngai patin a tlanpui ngar ngar mai si.

Sumo Counter an thlen hma chuan a zam ṭan ta. Siami chu a phî cheng tawh mai,dar 11:00am a rik loh nan 5mins chiah a awm tawh. "Ka pu,kha pawisa hi la la ke in ka phei mai ang,"a ti ta nge nge a. Taxi driver chuan,"I duh mahte chuan,"a lo ti samet mai bawk si. "Nia pawi ka ti lo,bungrua ka ngah chuang lova,"tih pahin a in khai chhuak nghal a,taxi driver chu pawisa a pe a Sumo counter lam pan chuan a in khai phei ta a. Driver lah chuan,"Duh aiin i chhuk har,"tih pahin Pi Maggie pawisa pek chu a chhiar nui vur vur a.

Sumo bul a thleng dawn chiah tihah chuan Bike hian Siami chu a rawn hnawl phei fua mai a. A bula awm ho te chu an lo ṭe nghal tuarh a,Siami chu nikhaw hre lovin a awm zui nghal bawk a. A rang a rangin Damdawiin lamah an tlan phei pui nghal a.

"A ṭhianpa ka nia,"tih pahin damdawi an ziahna lehkha chu kengin Canteen lam pan chuan a chhuk thla nghal a. Canteen a thlen hma chuan khapa Vanlalruata kha a hmu hlawl mai,a inher vat a a let zawng in a chho nghal vuk vuk a. Cooler bulah chuan a ding a,Pu Ruata chu a lo nghak tawp mai a. Rei vak lo hnuah Pu Ruata pawh chu a rawn thleng chho a,Phone in tu emaw a bia a Casualty-ah chuan a lut nghal a. Rsa chuan damdawi chu lei tur nge lei loh tur aw tia a ngaihtuah mek lai chuan,Pu Ruata chu a rawn chhuak leh a mi zawn nei ni âwm takin a rawn hawi vual vual a. Rsa chu Canteen lamah a chhuk thla nghal a,Damdawi chu a lei nghal zung zung a. Pu Ruata chu OPD lamah a chho a,chumi chhung chuan Rsa chu Casualty-ah chuan a lut a. A damdawi lei chu nurse hnenah a pe a,"Ka rilṭam lutuk a,thil ka ei lawk a nga. Ka ei zawhah ka rawn kal leh nghal ang aw,"tiin a chhuak leh nghal a.

Rsa chuan Jane chua call nghal a;

"Aw Rs,sawi rawh,"

"Vanlalruata chu tunah hian Damdawiinah a awm ve mek,Siami chanchin kha a hria a ni ngei ang. Engtinnge a hriat le?,"

"Siami kha lo hruai chhuah tir miah suh ang che. Pi Maggie ka rawn kal tir ang,chumi hma chu Siami hlatah khan awm suh ang che,"

"Awle ka hria e;mahse,khapa khan min hmu ta se,"

"I kutah Siami a awm tawh tho a lawm. Pi Maggie chu lo nghak la,a bak chu ka kutah dah mai rawh,"

"Awle,nih ka dah aw,"

"Awle,"