I TAN, I TAN CHAUH KUMTLUANGIN

- Rosie L Ralte

Part - I

Hmeichhe tleirawl harhvang ve thet thawt tak ka ni a. Ka mizia hi a nu dem dawm lo ve khawp mai a. Ka vun rawngah ka pa ka chhun a, ka ngo tehchiam lova, ka hmaifang erawh ka nu ang bawkin a tha ve thawkhat hle. Mizo hmeichhe tleirawlah chuan sang pawl tak ka ni bawk. Kawng engkimah ka pa ka chhun tih an sawi thin, ka hmaifang tih lohah.

Pic: PS Lalawmpuii

Hmeichhe thian ai chuan mipa thian ka ngah zawk mah a. Ka hmeichhiatpui dangte anga lan mawi leh lan nalh lam ai mah chuan lehkhabu ngaihnawm tak chhiar leh TV en a, eitur tui tak tak eitheih chu nuam ka tih leh thlakhlelh ber a ni a. Tunlai chhanah ka kum rualpuite chu ria zeih zawih, ngo vek vawk, sam ngil tak tak an nih fur laiin keive chu ka overweight titih a. Ka chawei phei chu a tih tuiloh phah lemlo thung.

Korean serial an sawilar viau pawh ka tuipui hranlo mai pawh ni lovin ka la enchhin miah lo bawk a. A chang chuan ka rualpuite laka ka dang bik lutuk chu 'alien' angahte ka inngaih phah lek lek zel.. Hehe!

Ka sawi tum tak ka sawi hmain ka chanchin ka han sawi tak hrep chu! Min lo ngaithiam teh u.. kei hi chu ka tawng duh em em a, ka nui ring em em reng bawk a nia. Rilru hah emaw ngui em em pawh ka nei khat khawp mai.

Aizawl khaw hlun, dawrkai lian hmasa tunu ka ni a. Retheih awmzia tak tak hi ka hrethiam pha hauh lo. Ka nuna kimlo awmchhun chu ka nuin ka tet deuh laiin pasal dang min umsan leh ka pi leh pu leh pate bulah nu hmangaihna dawng lova ka seilian chu a ni. Ka piin min hmangaihna erawhchu ka nu hmangaihna ka dawn tak loh aia a hlut loh ka ring lo thung. Ka pi hian a theihtawp chhuahin min enkawl tlat.

Ka chanchin ka sawi ta chiam a. Duhtawk rih ang aw.. a tul tak leh ka sawi chho leh mai dawn nia. Ka hrilh tum tak che u hi chu keima mimal chanchin a ni tlat lo.

Nikhat chu chhungkaw picnic neiin ka chhungte ho an kal zawh avangin keimahin in ka nghak a. A hma zanlai atangin ka pum a nuam thei chiah lova, zing lamah phei chuan inthiar turin ka tlan ngun tak em avanga kal ve theilo ka ni. Ka insum theihloh vangin zanlaiah eng engemaw ka ei teuh a, chumi hnathawh chu ka seng mek a ni e.

TV ka en a, dan pangaiin ka tuipui em em reality show pakhat ka en mek a. Door bell a rawn rik takah chuan phur vaklo hian kawngkhar hawng tur chuan ka tho chhuak a. A dik tak chuan kan ina rawn lenglutte hi ka lo chhawn ngai lem lova, ka thiante an nih loh chuan. Vawiin angahte phei chuan ka thian tumah leng tura ka sawm loh mai bakah rawn len tum an awm loh avangin ka thiante zinga mi chu an nilo phawt. Ka pi inleng tu emaw ber an ni dawn tih ka hrenghal mai. A chhan pawh ka pi hian englai pawhin amah kawmchaktu a nei reng emaw tih turin inleng a nei deuh reng tlat.

Ka phun phei deuh nang nang a, a dik tak chuan ka kawthalo hian min ti chau bawk a ni. Kawngkhar ka han hawng chiah chu ka phu zawk mai. Mipa ka la hmuh ngai loh, Keimah ang rual vel, ka pa ang em em mai, mahse ngo tak si chu inthlahrun hmel deuh mai hian a lo ding ngawi reng a. No vaklo hian,"Enge ni ta?," ka han ti hluk a. "Hei hi Pu Sawma te in tiraw?," tiin aw zawi angreng deuhin min zawt let sap a. Ka 'polite' lo viau tih inhre ranin nem zawk hian, "Enge i duh tak? tiin ka han zawt zui a. "Pu Sawma kut ngeia pek tur lehkhathawn ilo ka rawn keng a," tiin min chhang leh sap a. Ka pa nen an in an em avang chuan kan chhungte a ni ngei tih ka chiang bawk a, dam zawkin ka pa chu lo nghak rih turin ka hrilh ta a.

A han thutfel hnu chuan ka va mitmei zeuh a. A beh loh zia chu hairual a ni lo. A thawmhnawte chu a hlui lam lek lek hi a nih bakah a tunlai lo hlawm ve khawp mai a. Kan driver-te takngial pawh chutiang thawmhnaw inbel chuan ka la hmulo. Ka hriattheih chinah kan chhunghnai zingah rethei berh tak an awm loh avangin mak ka ti deuh. Ka pa nen an inan em avang chuan kan chhungkhat hnai a ni tih chu a chiang si.

A inthlahrun hmel em avang chuan ka khawngaih ta deuh a. Thingpui ka lum thiam loh avang leh khua a lum thawkhat bawk avangin cold drinks leh chips ilo chu ka chhawpsak ta a. Chupawh chu inthlahrun hmel deuhin a ei in a. "Inthlahrung lovin ka chhawp ang ang kha ei zo vek rawh," ti a ka han nuih tak sangah chuan a ril a tam bawk aniang a eiin ta bawrh bawrh a. Khawngaihthlak hian!!

Khawi khuaa awm nge an nih tihte chu ka zawt zui a. Ngopa khuaa awm an nih thu a sawi a. Ka zawhna chiah chiah zel tak tak chauh min chhan zel avang chuan biak zui rei vak chakna pawh ka nei ta bik lova. Ka TV en lai lam chu ka ngaihven san ta daih a. Ngawi rengin a thu zui ta hle hle a.