ZU ZUAR FANU 9

CHAPTER--9

R'z Thangluah✍🏻

"Msi hian a ṭhiannu tan a ni maw min lo biak char char,huiham Vanlalmalsawm nangmah kha lawm ka duh che kaw lo thei lutuk. I ṭhiannu rilru tina lo turin min la chah nasa em em zui bawk si,engtinnge ka tih tak ang le?,"tih mawlh mawlh pah chuan a room verandaah chuan a hawi kual vauh vauh a.

Tlaiah chuan chaw ei turin an rawn ko a,in hnuai lamah chaw ei turin a chhuk thla ve ta a. Ely chuan thip zet hian a lo melh rawm rawm a,"Thatchhe zu heh pa hna te hi thawk ve rawh,zu in reng ringawt mai,"a lo ti nghal tawn tawn a. Sangtea chuan,"Khanglang a che nangpawh kha engnge i nih vak bik a? Zomuanpuia te ho nen sunday tlai apiangin zu in in ho ziah ni lawm ni?,"a lo ti ve nghal ṭhat a. Pu Thanga chuan,"A tawk in hau reng teh suh u,ṭhenawm te ho hian an hre reu reu a nge,"a lo ti vat a. Sangtea chuan,"Hria se engnge pawi? Kan nihna lawm,"a lo ti hmak mai bawk si. Pi Zuali chuan,"Zothansang,engmaw i sawi kha? Chhungkuaah ṭangkaina nei silo,zu ruih chiah i thiam,"a lo ti ve leh hlak hlak a. Sangtea chuan,"Nia ṭangkaina ka neilo reng,ka hria,"a lo ti leh a. Partei chuan,"Ngatinge chaw ei dawn apiang hian in inhauh ve ziah zel a,chaw ei pawh in ti tui lo vek zel ka ning,"tih pahin a chaw thlang a chawi lawk a,a chawhmeh duh zawng a suak a sitting room lamah a phei nul nul a. Sangtea erawh chuan chaw ei a tum loh hmel khawp mai,a bike chahbi a la a chhuah mai a tum a. A nu chuan,"Nang kha khawnge i kal dawn?,"a lo ti vat a. Sangtea chuan,"Ka duh duhnaah ka kal ang,"tih pahin a chhuak nghal a.

"Bawihte,engtikahmaw in result chu a chhuah dawn a?,"Pi Ruati chuan kuhva chu a kheh malh malh a. Msi chuan,"Inrinni ah khian an tia;mahse,a la chiang lo an tia ka hrethiam lo,"a lo ti vat a. Pi Ruati chuan,"Han pass ve hlauh la ka ti ngawt mai,"a ti leh a. Msi chuan,"Nu,ka chhan danah kha chuan chhang ṭha ka in ti ve viau a. Mahse,ka pass ṭha angem tih hi ka ngaihtuah a ni,"a lo ti ve bawk a.

An nufaa an ti ti mawlh mawlh lai chuan Sangtea chu a rawn lut hlawl mai a. Pi Ruati chuan,"Lo leng rawh kha ṭhutna awlah khan lo ṭhu la,"a lo ti nghal vat vat a. Sangtea chu ngawi rengin a ṭhu ve mai a,engmah lem chu a sawi lova. Msi chuan,"Nang hi Emily te inah i leng dawnlo mi?,"a lo ti vat a. Sangtea chuan,"Umm,"a lo ti ringawt a. Msi chuan a phone a message rawn lut chu a en nghal a Mawii message a lo awm a;

"Ms,U Sangtea kha a rawn kal em? Chaw pawh a la eilo a nia aw,"

"Aww hei a rawn thleng chiah a,tinge chaw a ei lohva?,"

"Awiii an in chhung hi nuam a ti thlawt lo lawm,"

"Umm hetah ei mai rawh se,"

"Nia lo buaipui mai aw,insuk tur ka nei a kan insu phawt nge aw,"

"Awle lo ngaihtuah suh ka bulah a awm chuan,ngaihtuah a ngailo nia,"

"Awle2 bye aw,"

"Bye,"

Msi chuan Sangtea chu a rawn melh hru hru a. Sangtea lah chuan,"Nge tikhan min melh hru hru a,tihsual ka nei mi a?,"a lo ti vat a. Msi chuan,"Engvanginnge chaw i ei lohva?,"a ti nghal a. Sangtea chuan,"A ho e mai,ka ei peihlo lawm. I ṭhiannu chu hrilh la ka va kal a nge,"a lo ti vat a. Msi chuan,"Chaw eikhamah i kal dawn nia,"a lo ti leh hmak a. Pi Ruati chuan,"Ni e hetah chaw ei phawt la,chaw eikhamah i kal dawn nia,"a lo ti ve vat a.

Msi chuan chawhmeh ho chu a chhuanglum nghal sawk sawk a,"Ka hrilh che kha i hria em? Ka ṭhiannu saw tina reng reng suh ang che,i tihnat chuan a letin i na zel ang,"a ti leh mawlh mawlh a. Sangtea chuan,"Chaw chu ka eilo mai ang,"a lo ti leh a. Msi chuan,"Ka thusawi ngaithla rawh,"tih pahin chaw ei chu a siam nghal sawk sawk a. Sangtea chuan,"Awle,"a lo ti leh mai a.

"Emily chu ka hrilh vek tawh aw,ṭha deuhin va awm ang che aw,"tih pahin Sangtea chu a rawn nuih sak a. Sangtea chuan chhan pawh a chhang lo,ngawi rengin a chhuak nghal daih a.

Pi Ruati chuan,"Bawihte,Sangtea hian i ṭhiannu hi a duh vaklo niin ka hria,"a lo ti ve a. Msi chuan,"A rei a nga a duh ve mai ang,ka Emily hian a duh sia ka khawngaih ve tho lawm,"a lo ti vat a. Pi Ruati chuan,"Mahse,Sangtea'n a duh loh chuan a natna tur mai mai a ni dawn a sin,"a ti leh a. Msi chuan,"Nu,engmah thleng lovang i hlauthawng a nihkha,"a lo ti leh mai a.

Sangtea chuan kalkawng tluanin Emily leh Msi chu a tehkhin ṭhin a. Hmelah chuan sawisel na tur a hrelo ve ve a;mahse,an nungchang leh mizia ah chuan Msi buk a rit zawk daih,"Hmm engpawh nise Msi min ngen angin a ṭhiannu rilru tihnat chu ka tum lovang. Ka theihtawp ka chhuah ve poh a niang chu,"ti rilru nuah nuah chungin Emily te in pawh chu a thleng phei ve ta a.

Emily te in chu a vawi 1 len luhna tur anih vangin a zam ve hle mai. An kawngkhar bulah chuan a ding vang vang a,thawk a han lak vang vang hnu chuan door bell chu a hmet ri ve ral ral a. In chhung lam aṭang chuan hmeichhe âw hian,"Lo lut rawh u,"tiin a lo chhawn vat a.

Sangtea pawh chu zam ru ang reng tak chuan a lut ve nghal a. Sitting roomah chuan Emily leh a nu ni awm tak nu upa tawh lam hi an lo ṭhu a. Emily chuan a lo nuih sâng a,"E lo kal rawh,i va rawn thleng har angreng ve a?,"a lo ti vat a. Sangtea chuan sana a en zauhva,Dar 8.00pm a lo pel tawh a,"Nia,"tih ringawtin a lo chhang a,ṭhutna awlah chuan a ṭhu ve nghal a.

"Nu,amah hi nia ka sawi chu Sangtea a nia,"tiin a nu bulah chuan Sangtea chu a hmelhriat tir nghal a. Emily nu chuan a kut a rawn phar chhuak nghal vat a,"Emily nu ka nia,i fel hle mai,"tiin an in chibai nghal lawp lawp a.

Msi chuan a gallery a Sangtea thlalak a neih ho chu a en kual a en kual a,"Ka ṭhiannu kha i tihnat chuan keipawh min tina tel ve zel a ni tih hria ang che aw. Hmangaih viau che mah ila,ka dinhmun leh i dinhmun hi a inthlau em a tin ni. Ka ṭhiannu kha ṭha deuhin enkawl ang che aw,"tiin ama hriat tawk lekin a phun sep sep a.

Zan dar 7.00pm velah chuan Zomuanpuia chu a rawn lang leh hlawl mai a. Pi Ruati chuan,"Engnge i duh a?,"a lo ti nghal vat a. Zomuanpuia chuan,"Hman zana ka ânkhum chiam vang che khan pawi ka ti lutuk. Khawngaihin min ngaidam thei a ngem?,"a lo ti leh a. Pi Ruati chuan,"Engmah nih loh kha,theihnghilh tawh rawh,"a lo ti leh mai a. Zomuanpuia chuan,"Ka lawm lutuk aw zu ka in ve hian ka in control thiam leh ṭhin lova. Pawi ka ti takzet a ni,"a ti leh mawlh mawlh a.

"Ms,ka tihpalh takzet aw min ngaidam thei ang tiraw?,"Zomuanpuia chuan Msi bulah chuan ngaihdam a dil leh mawlh mawlh a. Msi chuan,"Umm ngaidam thei e. Mahse,a thleng nawn leh anihchuan ka ngaidam thei tawhlo ang che,"a lo ti nghal hmak a. Zomuanpuia chuan,"Umm ka tiam a che a thleng nawn tawhlo ang,"a lo ti ve nghal vat a.

Inrinni a ni a,Msi te result chu chawhma dar 11.00am aṭanga tihchhuah tur tiin, News lamah an puang dum dum tawh a. Msi chuan a huphurh ve hle mai a,Emily leh Rki chuan a hmuna en pui turin an rawn sawm ve tlat bawk si. Huphurh deuh reuh,phûr ru deuh reuh bawk siin a ṭhiante 2 chu an result en tur chuan a zui chhuak ve ta a.

Emily chuan,"Ms,nizan chu rawn che zei tawp a,"tih pah chuan a nui hat har a. Msi chuan,"A ṭhat nasat chu vawiin result chhuah tur thu i hrilh em?,"a lo ti nghal vat a. Emily chuan,"Aih hrilh nang,news velah a lo hmuh ve mai ka ring deuh a,"a lo ti mai a. Msi chuan,"Nia hre ve mai turah ngai ang,"a lo ti mai a.

"Awii ka lawm lutuk 1st ah ka pass,"tih pahin Emily chuan Msi chu a rawn kuah nghal chung chung a. Rki pawh chuan,"Yess keipawh 1st ah ka pass,"a lo ti nghal a,an hlim kher mai. Msi erawh chuan a hming a la hmu mai lova,an Principal in a rawn hmu a a rawn chibai nghal ringawt mai a,"Ka lawmpui lutuk che,"a rawn ti nghal a. Msi chuan a hrethiam lo hle mai,"Sir,engnge awmzia?,"a lo ti vat a. An principal chuan,"I result i la hrelo anih hmel hle mai,Topper i ni lawm,"a ti mai chu(h) Rki leh Emily chuan an rawn kuah nghal chung chung a. An principal chuan,"Topper ho page kha i en lo a ni maw?,"a lo ti leh a. Msi chuan,"Aw la en lo,"a lo ti zawi sap a. An principal chuan nui hawk hawk chungin,"I va inring awmlo ve a,"a ti leh a. Msi chuan,"Nia topper em em chu ka in ring lo a,"a lo ti leh a. An Principal chuan,"Engpawh nise ka kalsan phawt mai ang che u,hlim deuhin hun in lo hmang dawn nia aw,"tiin a kalsan ta a.

"Awii engtinnge i la mut theih a? Msi te result pawh i hrelo a ni maw? Tho teh,"Mawii chuan Sangtea chu a rawn sawi nawk nawk a. Sangtea chu a rawn che ṭual ṭual a,"Dar engzatnge a?,"a rawn ti thawp sut a. Mawii chuan,"Dar 12 a pel tawh,tho rawh Msi pawh zu lawmpui ta che,"a ti leh a. Sangtea chuan,"Maw? Msi te result a chhuak maw? A pass em?,"tih pahin a in perh tho nghal awt a. Mawii chuan,"I phone check mai rawh, tho la in ti fai la zu kal nghal ang che,"tih pahin Sangtea room aṭang chuan a chhuak nghal a. Sangtea chuan a message dawn ho chu a en nghal vat a. Emily message leh Msi message a lo awm a;Mahse,Msi message chu a hawng hmasa a;

"Emily be vat rawh a pass a nia,tunah be nghal ang che."

Emily message chu a hawng leh a;

"Duat,kan result a chhuak a 1st ah ka pass a sin. Zanah kan lawm nghal dawn a lo kal ve ngei ngei ang che aw,"

Sangtea chu a tho a,a inbual nghal sawk sawk a. A inbual zawh chuan Msi te in lamah bawk chuan a in khalh thla leh nghal a.

Msi te inah chuan mi an lo tam khawp mai. Sangtea chu a lut ve nghal a,"Nu Ruat,engmah ka la hrelo nia,"tiin Msi nu beng bulah chuan a hrilh ru su su a. Pi Ruati chuan,"Kha thingpui hi in phawt teh,"tih pahin thingpui leh chhang a lo pe nghal a.

Putar pakhat chuan Msi chu a rawn chibai a,"Bawihi ka lawmpui lutuk che. I pa pawh kha Class-Xii anih lai kha chuan topper a ni ve a sin. I pa hnung i rawn zui a,i ti ṭha lutuk ania,"a lo ti mawlh mawlh bawk a.

In leng an haw rem hnu chuan,"Ngatinge i result engmah min hrilh ve lohva?,"tiin Msi bulah chuan a vui nghal ringawt a. Msi chuan,"Emily chu i bia em?,"a lo ti thung a. Sangtea chuan,"Be nang,"a lo ti heu mai si. Msi chuan,"Huiham be vat ta che,tunah be rawh. I biak hun a nghak reng a nia,"a lo ti leh a. Sangtea chuan,"Nakinah ka be mai ang,"a lo ti leh a. Msi chuan,"Nakin nakin a ngai lo,tunah be rawh,"a lo ti hmak mai bawk si. Sangtea chuan,"Awle,"tih pahin Emily chu a call nghal a;

"Aw hello min van lo be har em em,"

"Nia ka lo muhil daih a,ka lawmpui lutuk che a nia aw,"

"Umm chuan zanah chuan rawn kal ngei ngei ang che aw."

"Ka zak e a,midang an tam awm si,"

"Midangin an hmu ve chak che lawm. Kan chhungkuaah ka nu chiahin a la hmu che a,midang pawn an hmu ve chak che a lawm,"

"Umm engtik velah nge ka lo kal ang?,"

"Dar 7.00pm velah ni mai,i rawn thlen dawnah min lo call la kan in bul kawngpui sirah khan ka lo nghak ang che,"

"Awle ka lo kal dawn nia,ka dah phawt ang aw,"

"Umm bye,"

"Bye,"

Msi chuan,"Hrilh kher ngailo hian ngaihven ve ṭhin la,i care lo thei emai,"a lo ti leh hlak hlak a. Sangtea chuan,"Min hau reng bik lo la,"a lo ti leh a. Msi chuan,"Hauh ngaiin i awm sia lawm,"a lo ti leh a. Sangtea chuan,"Bleeeh i pass te chu kan lawm ve em em dawnlo mi?,"a ti leh a. Msi chuan,"Lawm ve bawk dawn e mahse,nangchu Emily chiah ngaihsak rawh,"a ti leh a. Sangtea chuan,"Hmmm ninawm a remchang a awm veleh ka ṭhen daih ang,"a ti zui hlak a. Msi chuan,"I ngam chuan i ṭhen dawn nia,he inchhungah hian i rawn lut tawh ngailo ang,"a ti mauh mai si. Sangtea chuan,"I ṭhiannu chu i chhan hle mai,ṭha lawm ka haw dawn. Ka tih tih in ka ti ang ninawm,"tih pahin a chhuak tau nghawng nghawng a. Msi lah chuan a hnung lam aṭangin a lo nui vur vur zui a.

Zomuanpuia pa chuan a fapa te zawk class-xii fail ta chu a lo hau bawrh bawrh a,"A va zahthlak ṭhin ve aw,hmeichhia pawh i tluk lo ania. A ni chu topper a ni a sin,"a ti buan buan a. Kimkima chuan,"A ni te chu a thiam thei e lawm,"a lo ti mai a. Pu Chhuana chuan,"A zir peih a a thiam thei a ni mai. Nang hian zir peih ve hek lo che,"a ti leh a. Kimkima chuan,"Ninawm min hau reng mai,ka leng dawn. Khunu chu topper ni mah se a hmingṭha reng dawnlo,"a ti hlak hlak a,a chhuak nghal daih a.

Rki nu chuan News group vel chu en in News vel chu a chhiar kual a. A awmna News group 1 ah chuan tihian an lo post a;

"Tun kuma HSSLC topper Vanlalmalsawmi hi a nu in zu a zuar ṭhin,"

Tiin post an lo siam a,Rki nu chuan a post tu chu a dp a check nghal vat a. Mahse,a dp ah a hmel a lo hmang lova. A thil hmuh chuan a thin a ti rim khawp mai,"Bawihi,lo kal teh u hei en teh u,he thil hi khawi aṭanga lo irh chhuak nge ni ang? Ka thinrim lutuk,"a ti nghal mawlh mawlh a. Rki leh Lawma chuan an lo en nghal vat a,"Zomuanpuia nau kha a pass em?,"tiin Lawma chuan a zawt nghal a. Rki chuan,"Aih pass lo,kan venga class-xii examah chuan Kimkima chian a fail,"a lo ti vat a. Lawma chuan,"Huh an ni unau thil tih bak a ni leh pek lovang,ngatinge maw an rilru hi a chhiat em em mai le aw,"a lo ti leh a. Rki chuan,"Lawm,zu chhuk ang Msi te inah he thu pawh hi an lo hre ve tawh maithei a sin. Ka khawngaih e mai,"a ti nghal mawlh mawlh a. Rki nu chuan,"Nia zu kal rawh u,a post tu pa hi kan lo ṭim hrep a nge,"tih pahin a post tu pa chhanna tur chu a type nghal mawlh mawlh a;

"Ihmaw ṭhianpa,mi zawng zawng hian chanchin ṭha leh ṭha lo chu kan nei vek. Mahse,i thil rawn post khi tun ang huna rawn post atan chuan a mawi lem lo khawp mai. Miin a thil tihah hlawhtlinna a hmu anihchuan,kan lawmpui mai tur a ni zawk lo em ni? Mi hlawhtlinna in lawnpui te,mi hlimna in ṭawmpui te hi a harsa lo a sin,"tiin a chhang let hrep a. A comment na chu an rawn like sap sap mai a.

"Bawihte,heng zawng zawng hi keima thiam loh vek a ni. Ka tihpalh lutuk aw,min ngaidam mawlh mawlh ang che i nu ni tlak pawh ka nilo,"tiin a fanu chu ngaihdam a dil mawlh mawlh. Msi chuan,"Nu,in thiam lo duh suh ka tan engkim i ti ṭhin tih ka hria a lawm. An duh duh chu lo sawi rawh se,kan nufa inkar hmangaihna hi a sawi nghing phah lo. Nu,ka tan chuan khawvela nu ṭha ber i ni tih hi hre reng ang che aw,ka hmangaih che,"tiin a nu chu a kuah vawng vawng a. Pi Ruati chuan,"Bawihte,keipawn ka hmangaih lutuk che. I tan hian nu ṭha tak ka ni ang a,ka ni reng bawk ang,"a ti ve mawlh mawlh a,a biangah chuan hruk sen lohvin mittui a lo luang chhuak zung zung a.

Emily nu chuan,"Bawihte,he post hi i hmu tawh em? I ṭhiannu kha a ni tiraw?,"tiin whatsapp group awmna 1 a an post chu Emily chu a en tir nghal a. Emily chuan,"A van ṭullo ṭhin tak em,tunge rawn post hma ber tu ni ang le?,"a ti nghal mawlh mawlh a. Emily nu chuan,"A chanchin hi i hre hrim hrim mi a?,"a ti leh a. Emily chuan,"Msi hi a khawngaihthlak a sin. A chanchin chu hmanah min hrilh tawh lawm,a sawi lai pawn a a ṭap zawih zawih. Mahse maw,Nu hmannia an ina ka va len khan maw an nufa in hmangaihna kha ropui ka ti tawp. A hma chuan a nu chuan zu chu a zuar ṭhin a lawm;mahse,a nu zu zawrh chhan pawh a nu in  a school fee leh an in luah man leh bill vel a thawhchhuah nan a ti a ni,"tiin a nu chu a hrilh a. Emily nu chuan,"Zu zuar lovin thil dang pawh ti ve mai se,"a ti leh hram a. Emily chuan,"Nu,a chanchin hi sawi dawn chuan a thui lutuk,a nu zu zawrh chhan i hriat hunah phei chuan i dem bik lovang,"a ti leh a. Emily nu chuan,"Aww chu tak chu lawm ka hriat duh,min hrilh ve mai la,"a ti leh hram a. Emily chuan,"Nu,nakinah ka hrilh ang che,"a lo ti thung a.

"Bawiha pa,he thil hi engnge a awmzia?,"tiin a pasal chu a phone chu a en tir nghal a. Pu John-a chuan,"A va ṭullo ṭhin tak e aw,mi hlawhtlinna lawmpui aiin hetianga insawi chhiat hi kan thiam zawng a ni mai si,"a lo ti nghal mawlh mawlh a. Pu John-a nupui chuan,"In student a nia,hei hi chu school tan pawh a mualpho thlak takzet,"a ti leh a. Pu John-a chuan,"Kan student chu a ni tehmeuh mai;mahse,an thu post hi keichuan ṭul ka ti lo. A nu chu eng ang mi pawh nise,a fanu tan ṭha takin hna a thawk a ni mai a. Chuan,keichuan ka school naupang hi ka chhuang a ka ngaisang bawk a ni. Chu chu an principal ka nihna angin ka sawi a ni,chuan he naupang hi ka ngaisang a ka chhuang khawp mai he thu erawh hi chu keimah ka nih vanga sawi ka ni,"tiin a nupui chu a chhang ve fak mai a. A nupui chuan,"Awii nang tak hi chu aww,pasal ṭha tak chu i ni ve chiang a lawm. Ka hmangaih che,"tih pahin a pasal chu a kuah a.

HSSLC topper Vanlalmalsawmi chu zu zuar fanu a ni tih chu social mediaah chuan a lar chak khawp mai. Mi ṭhenkhat chuan Msi chu engang mi pawh nise an ngaihsan thu leh an chhuan thu an sawi a. Ṭhenkhatin HSSLC topperah zu zuar fanu han neih tawp chu a mualpho thlak hle mai an ti bawk a. Ṭhenkhatin an school a ti mualpho an ti bawk a,ṭhenkhatin an nuih liam mai mai thung a.

Msi chu pawnah pawh a chhuak ngailova. In chhungah a tawm tawp mai a ni,a chanchin social media vela a than dan chu thudik ni mah se,na a ti ve thlawt a ni. Mahse,a nu tan fanu ṭha tak nih erawh a thil tum ber a la ni reng tho.

"Hei hi Msi te in a ni em?,"tiin pa upa lam tawh hmel fai vuk mai chuan Pi Ruati chu a lo zawt a. Pi Ruati chuan,"Aw ni e Sir,nangmah nimaw lo leng rawh,"a lo ti vat a. Chupa chuan,"Amah hi a awm em le aw? Result chhuah ni khan ka rawn lang thei ta silova,hei vawiin lamah ka rawn kal a,"tiin a hawi kual vel a. Pi Ruati chuan,"Aw aawm e lo kal rawh he lamah hian,"tiin in chhung lamah chuan an inzui lut ta a.

Msi chuan kuhva a lo kheh malh malh a,an Principal a hmu thut chu mak a ti hle mai,a lo ding nghal vat a,"Sir,i lo leng a ni maw? Lo ṭhu rawh,"tiin ṭhutna a lo kawh hmuh nghal a. Pu John-a chuan,"Niminah khan kan chhungte chhiat tawk an awm a,ka rawn kal thei ta lova min hrethiam dawn nia aw,"tiin thupha a chawi nghal a. Msi chuan,"Sir,a pawilo a ho lutuk thupha chawi a ngailo a nia,"a lo ti vat a. Pi Ruati chuan,"Sir John,tikhan leng reng rawh aw thingpui te kan lum dawn nia,"a lo ti ve bawk a.

"Tunlai social media lama thuthang hi ka hre ve tho a. Khawngaihin in chanchin tlangpui min hrilh theih chuan ka lawm ngawt ang,"tiin Pu John-a chuan a sawi pawp mai a. Pi Ruati chuan a fanu melh zauh pahin,"Nia kha pawi ka ti khawp mai,in school thlengin in hming a hliau phah ta si a,"tiin thupha a chawi nghal phawt a,tichuan a bul te aṭangin a pasal in a boral san tak hnu a an in aṭanga an chhuah tak dan te chu a sawi nghal vek a. Zu a zawrh chhante pawh fel fai takin a sawi tlang nghal vek a. Pu John-a pawh chuan a hrethiam khawp mai,"Engpawh nise,hun kal tawh chu hun kal tawh a ni a. Hun kal tawh chu tuman kan siam ṭha thei lova,tunah chuan kan vawiin hun hi a pawimawh ber chu a ni. Kan hun liam tawh hnu kan siamṭha theilo ang bawkin kan hma hun pawh a vai chuan kan siam theilo. A chhanchu,tumah hi hmalam hun hria kan awm lo,chuvang chuan kan vawiin hun hi kan hman ṭhat a pawimawh a ni,"tiin a sawi deuh duah a.

Pu John-a chuan Msi pass lawmna atan tiin ₹3000 a pe a. Chu mai bakah a lehkha zir leh zelna tura a hman ṭangkai turin lehkhabu ṭha tak tak a pe tel bawk a. Msi te nufa pawh an hlim khawp mai,tlai lamah Pu John-a chuan a haw san ta a.