MZP IN CITIZENSHIP (AMENDMENT) BILL 2016 CHUNGCHANGAH HMALAK TUM

Aizawl| January 05, 2019: Mizo Zirlai Pawl ( MZP)  chuan January 07, 2019 a parliament a Citizenship (Amendment) Bill 2016 pass tumna awm chu duh lovin hmalak ngei an tum a, hmalak dan tur ngaihtuah turin January 06, 2019 chhun dar 12 hian MZP Pisa Pui, Aizawl ah Emergency Meeting a ko.

NESO leh MZP in Citizenship (Amendment) Bill 2016 duh lohna an lantir lai.

He meeting ah hian MZP chhungkua zawng zawng; Executive members, NESO Council members, College SU leh Hnampual zirlai pawl hruaitu zawng zawng te tel ṭheuh turin a sawm a, ngaipawimawh turin an inngen bawk.

He meeting kohna hi MZP general secretary Lalnunmawia Pautu chuan vawiin tlai dar 3 vel khan a chhuah a.

MZP hian 'Total Bandh' an huaihawt ngei rin a ni.

Dodalna tam tak karah Joint Parliamentary Committee (JPC) chuan ningani khan Citizenship (Amendment) Bill 2016 chu ngaihtuahin January 07, 2019 a Lok Sabha ṭhutkhawmah report pharh a ni dawn niin JPC chairman Ragendra Agrawal chuan a sawi.

He bill hi NorthEast Students Organisation (NESO) leh MZP chuan vawi tam tak lo dodal tawhin, Mizoram ah pawh bill duh lohna an lo lantir tawh a ni. NESO ah hian MZP hi a fawng vuantu pawimawh tak niin tunah hian finance secretary dinhmun chelhin, he dinhmun hi Ricky Lalbiakmawia'n a chelh mek a ni.

He bill sawi loh leh dodal hlawh tak hi Afghanistan, Bangladesh leh Pakistan aṭanga lo lut minority community te tana India khua leh tui nihna (citizenship) pekna tur a ni.

He bill hi pass a dan anga hman a nih chuan North East hi a tuar hmasa pawl leh Mizoram bik hi a tuar ber pawl a ni thei dawn a ni.