HNAM CHHANNA KAWNGZAWH A MZP PRESIDENT THUSAWI

 (NESO leh MZP buatsaihin January 23, 2019 Hnam Chhanna Kawngzawh neih a ni a, Chuta MZP president L Ramdinliana Renthlei thusawi tlangpui a ni e.)

 

*. Kan hnam hian chhan a ngai tih hria a, kan ram in chhan a ngai tih hria a, Hnam chhanna kawng zawh a ke lo pen chhuak zawng zawng te vawiin hian in va hlu em! Hnam chhanna kawng zawh a lo  kal zirlai zawng zawngte leh Mizo mipui zawng zawngte chungah thinlung takin lawmthu kan sawi duh a ni. Kan ram leh hnam tan kan tangrual zel dawn a nia. 

Hnam Chhanna Kawngzawh Thlalak HETAH

*. The Citizenship (Amendment) Bill, 2016 in a tum ber chu: Hindu, Sikh, Buddhist, Jain, Persi emaw Christian mi leh sa te Afghanistan, Bangladesh leh Pakistan chhuak te tan India khua leh tui a nih theih dawn a ni. Sakhaw behchhana Citizen nih theihna tur Bill a ni ber awm e. 

*. The Citizenship (Amendment) Bill 2016 hi Indian Parliament Lok Sabha in a pass a tawh a, Rajya Sabha ah sawiho leh tura ruahman a ni a. He bill hi pass a nih a hman a nih chuan nih chuan Afghanistan, Bangladesh leh Pakistan atanga India- a lo lut foreigner te kum 6 chhung India ah an lo awm tawh a nih chuan India khua leh tui nihna pek tur a ni. 

*. The Citizenship Amendment bill, 2016 hi pass a nih chuan keini Mizoram tan phei chuan a hlauhawm zual hle a, Bangladesh atanga dan lo a lo lut Chakma foreigner te hian awlsam takin India khua leh tui nihna an nei thei dawn a. Tuna Chakma Foreigner thahnem tak awmsa te pawh hian awlsam takin India khua leh tui nihna an nei nghal dawn a ni. Mizo Zirlai ten kan chanvo tur Chakma zirlaite hian  nasa takin min chuhpui leh zual dawn a ni.

*. He Bill, in a tum ber chu India ram hi Hindu Lal rama siam tumna bill a ni a, keini Sakhua Christian tan pawh hian a hlauhawm hle a, kan hriatthiam theih dan tur chuan Christian te nekchepna tur bill a ni.

*. Mizoram ah pawh NGO Coordination committee kaihhruaina hnuaiah All Political party leh Joint NGO pawh in duhlohna lantir a ni tawh a hemi chungchangah hian Memorandum in ang tlang thehluh a ni tawh nghe nghe a ni. 

*. NGO Coordination kaihruaina in  tun Republic Day hi Boycott a ni dawn a. Mizo mipui zawng zawngte min thlawp vek turin kan ngen che u a, School naupang Republic Day a parade(Lam) tur zawng zawng pawh naktuk atang chuan lam zir tawh lo turin thinlung takin kan in ngen tak meuh meuh a ni.


 * He bill zirchiang tura din JPC hi Mizoram min lo tlawh ve tura sawm a ni a, Mizoram chu min ngainep khawp mai min tlawh miah loin The Citizenship Amendment bill, 2016 hi Parliament ah January ni 7 khan thehluh a ni ta tho mai... Dodalna nasa tak karah pawh India Sorkar chuan pass tumin hma a la bawk a ni.

*. Mizoram hi India ram a ni ngai lo tih hi vawiina zirlai lo kal te hian kan hriat thar a tul hle a ni. Kan Pi leh Pute atangin mi awp behna hnuaia awm ngai lo ram hrang kan ni a, Bristish in min awp ta a, British Sorkar a lo tlu chhia a ram hrang hrangah thendarhin kan awm ta a. Mizoram pawh India a awm tura tih kan nih angin India rama kan awm ta a ni. Kum 1966 khan kan hnam pasaltha ten zalenna an sual a, Independent hi Mizote hian kan sual tawh a ni. Vawiina hian India Sorkar hian lo hria se ka duh chu Mizote hi Independent sual tawh hnam kan ni tih hi a ni. He bill hi pass a nih a hman luih a nih chuan India Sorkar hian Mizoram leh North East hi India ramah min ngai lo ah kan ngai dawn a, India rama kan awm ve reng hi awmzia a awm tawh dawn loh avangin Mizo thalaite hian Independent sual leh hi kan ngam a, Independent hi kan sual leh lo ang tih kan sawi thei lo a ni. 

*. The Citizenship Amendment bill, 2016 hi Mizo mipui zawng zawngin kan duh lo vek a, NGO Coordination Committee kaihruaina hnuaiah All Political Party nen hmala ho in memorandum in ang tlang thehluh a ni tawh nghe nghe a ni. Vawiina ka sawi duh chu Political Party hrang hrang te hian inbeihnan kan hmang nasa lutuk hi a ni. Political Party hamthatna tura lo hman tum chi pawh a ni lo a, Party politics a inbeihna chi pawh a ni lo a. Khawngaihin Political Party ten inchirhtheh nan leh hamthat lak nan lo hmang tawh lo turin ka ngen che u a ni. Kan hnam tan tanrual hun a ni a, i tangrual ang u.

*. A tawp bera ka sawi duh chu Mizo te chu Christian kan ni a, kan ram hi Christian ram a ni a. Khawvel zawng zawng chungah thuneitu Pathian kan nei a, Pathian kan auh chuan Lalpa hian amah ring tute au aw hi a ngai thla dawn a, amah ring tute duh dan hian ro a rel hi ka ring a. Mizo Christian zawng zawng te hian tawngtaiin Pathian i au ang u..


Ka lawm e.