Aizawl | December 2, 2018: Khawvel huap inelna Mizoramin a thlen hmasak ber tur, Pre-World Cup Mizoram Open Accuracy Landing Championship Serchhip a nghah turah inbuatsaihna ngawrh takin kalpui mek a ni.
4th December - 8th December 2018 chhung hian Mizoram Aero-Sport Association buatsaih in Pre-World Cup Mizoram Open Accuracy Championship chu Serchhipah nghah a ni dawn. He hun atan hian Mizoram Aero-Sport Association leh Serchhip District Aero Sport Association chuan Serchhip Bawngchawm khaw hmun hlui, Chuanchung rama Spot an siam chu chei thain inbuatsaihna chak takin an kalpuii mek.
India ram hmun hrang hrang leh Foreign atangin Gliders Pilot engemaw zat chuan Serchhip an thleng tawh a, vawiin Pathianni leh naktuk lama rawn thleng tur thahnem tak an la awm bawk.
Intihsiakna tur hmunhma pawh peih fel thawkhat tawh niin Landing lam pawh nimin khan hmanrua te dah belh in siam fel a ni tawh bawk.
Pre-World Cup Mizoram Open Accuracy Landing Championship-a tel tur hian India ram chhung bakah Korea, Japan, Columbia, Luxemberg leh Slovenia atang tein gliders/pilot rawn kal tura beisei an ni a, tunah hian Mizoram Pilot te bakah Sikkim, Bangalore, Indonesia leh Assam Regiment atangte in Serchhip an rawn thleng tawh hlawm a. A hmunah nitin practise in Serchhipah an chamchilh mek hlawm.
He intihsiakna turah hian Serchhip ram chuanchung atanga thlawkin Zawlpui Pu Sailopara Leilet zawlah an tum thin dawn a ni.
Expert te sawi danin Para-gliding tihna hmun tur Serchhip ram Bawngchawm Chuanchung leh a tumna hmun Zawlpui hi India ramah pawh a tha ber leh him ber pawl niin an sawi.
Serchhip Aero Sport Association te chuan he Pre World Cup Serchhipa thlen tur chungchangah Serchhip mipuite mikhual lo dawnsawn kawngah theihtawp chhuah turin an ngen a. Tun tum Pre World Cup mai ni lovin, intihhlimna ‘Joy Ride’ nei turin Tourist tam zawk engtiklai pawha neih theih a nih tawh dawn avangin an phur hle. He Sport hian Tourism lama nasa taka hmasawnna a thlen ngei an beisei a, chutiang tur chuan Serchhip mipuite inbuatsaih turin an ngenin an sawm bawk.
Nimin zing khan Serchhip YMA branch hrang hrangten an mahni huam chhungah Pre World Cup PG Accuracy pualin faina hnatlang an nei a, chaw eikhamah hnatlang pui Branch 21 ten Sailiamkawn atangin take off point leh landing spot thlengin faina hnatlang an neih chhunzawm leh bawk a ni.
Post a Comment
He post chungchanga i ngaihdan lo sawi ve rawh: