CITIZENSHIP AMENDMENT BILL -2016, PAWM A NIH LOH NAN HMA LA CHHUNZAWM ZEL DAWN

Aizawl | December 2, 2018: November 30, 2018 chawhnu dar 1:00 khan MZP Conference Hall-ah Citizenship Amendment Bill duhlohna hun hman a ni a. He hun hi Tv. Michael Lalramsanga, Treasurer chuan kaihruaiin, Tv. L. Ramdinliana Renthlei, President, MZP leh Tv. Ricky Lalbiakmawia, Finance Secretary, North East Students’ Organisation(NESO) te chuan thu an sawi a ni. Hemi rual hian North East State hrang hranga zirlai pawlin mahni awmna state theuhah Citizenship Amendment Bill 2016 duhlohna hi an lantir a ni.

He huna thusawitu L. Ramdinliana Renthlei MZP President chuan, "India ramin a buaipui ber pakhat chu The Citizenship (Amendment) Bill, 2016 hi a ni a, North East mite hian he bill hi kan duh lo hle a, Citizenship (Amendment) Bill, 2016 hian India khua leh tui zawng zawng a nghawng avangin ngun zawka kan ngaihtuah a tul hle a ni. The Citizenship (Amendment) Bill 2016 hi pawm a nih chuan Afghanistan, Bangladesh leh Pakistan atanga India- a lo lut heng; Hindu, Sikh, Buddhist, Jain, Persi emaw Christian emaw te chu kum 6 chhung India-ah an lo awm tawh a nih chuan India khua leh tui nihna pek tur an ni. He bill hian a tum ber chu : Hindu, Sikh, Buddhist, Jain, Persi emaw Christian mi leh sa te Afghanistan, Bangladesh leh Pakistan chhuak te tan India khua leh tui a nih theih dawn a ni. Sakhaw behchhana Citizen nih theihna tur Bill a ni ber awm e."a ti a.

L. Ramdinliana Renthlei chuan, "The Citizenship Amendment bill, 2016 hi Indian Parliament-a pass a nih chuan keini Mizoram tan phei chuan a hlauhawm zual hle a, Bangladesh atanga dan loa lo lut Chakma foreigner te hian awlsam takin India khua leh tui nihna an nei thei dawn a. Mizoramah pawh NGO Co-ordination committee kaihhruaina hnuaiah All Political party leh Joint NGO pawhin duhlohna lantir a ni tawh a, Memorandum inang thehluh a ni tawh nghe nghe a ni. Mizoram phei hi chuan kan za vaia tangruala kan do a ngai dawn a ni. The Citizenship Amendment bill, 2016 zirchiangtu tur a din Joint Parliamentary Committee on Citizenship Amendment bill, 2016 hotuten nikum lama NGO anga Delhi-a hmuh an nih khan Mizoram min lo tlawh ve tura sawm an ni a North East state hrang hrang an lo kal tum a Mizoram min lo tlawh ve lo hi kan hrethiam lo hle a. *Mizoram tlawh loa Citezenship Amendment bill, 2016 hi pass a nih chuan India Sorkar hian Mizoram hi India ram bung pakhatah min pawm loah kan ngai dawn a ni*. Chuvangin Mizo thalaite hian kan tih tur kan hriaa kan tih tur kan ti ve mai dawn a ni. Citizenship Amendment bill, 2016 pass a nih loh nan hian theihtawp kan chhuah ho a ngai a, tumah inpuh tawn lo in kan zavaiin i tangrual zel ang u." a ti bawk.

Ricky Lalbiakmawia, NESO, Finance Secretary chuan, ‘’Citizenship Amendment Bill 2016 hi, NESO chuan a tir atangin nasa takin a dodal a. He bill hian India danpui Right to equality a kalh mai bakah Sakhuana thlenga in duhsakna thil niin NESO chuan a ngai a. He bill hi pass anih chuan danloa lo pem lutte avangin North East State-te chu a tuar nasa ber tur kan ni tih hriain, NESO chuan Central Sorkarah memorundum vawi hnih a thehlut tawh bawk a ni. Tun thlasik Parliament thutkhawmah he bill hi pass tuma ruahmanna siam mek chu kal tlangpui anih chuan NESO chuan tun aia nasain a dodal zel dawn a ni.’‘ a ti a, Ni 20th November,2018 khan Guwahati-ah NESO kaihhruainain ropui taka doldalna hi neih a ni a, Vawin ni 30th pawh hian North East State hrang hrangah Citizenship Amendment Bill 2016 duhlohna hi neih anih thu a sawi bawk.