HNAM CHHAN HNATLANG: MZP PRESIDENT L RAMDINLIANA RENTHLEI THUSAWI

(NGO  Co-Ordination Committee huaihawt a Hnam Chhan Hnatlang, November 6, 2018 a Mizoram puma neih a, Aizawla MZP President L Ramdinliana Renthlei Thusawi kan dah e.)

Pu Chairman leh hnam chhan hnatlanga lo kal, Zofa mipui zawng zawngte, a hmasain chibai ka’n buk cheu u a ni.

Vawiin hian SB Shashank hi lo kal se ka va han ti em! Ka lo chibai chak khawp mai tih hi vawiin ni-ah hian ka sawi duh a ni!

Hetilai hi a office a ni a, Secretariat ah a quarter a awm a, Vawiin ni-ah hian lo kal hlauh se ka va han ti em!

Vawiin a ka han sawi duh pakhatna chu; SB Shashank hi lawmthu hrilh a ngaiin ka hria. Mizo hnam min tilungrualtu a ni a, hnam thinlung min puttirtu a ni a, a chungah hian lawmthu ka sawi duh a ni.

Vawiinah ‘a nuam’ han ti dawn ila a mawi chiah lova, rilru a lo vei ve ngar ngar tan chuan vawiin ni kan nghak thleng hi lawmawm ka ti a ni. Mizo hnam lungrual taka kan han awm thei hi a lawmawm, lawmthu ka’n sawi ve leh a nih chuh!

Hei, vawiin hian ka ngaihpawimawh deuh mai pakhat chu; kan hotuten an sawi tawh a, Mizoram a sawrkar hnathawk lian zawng zawng mai hi ‘Hnam dang’ an ni a, point pakhat ka’n belh duh chu; Vawiin a zirlaite hian tan kan va ngai em! Vawiina zirlaite hian hnam dangte kan hnuaia dah tur chuan nasa taka lehkha kan zir a ngai a ni tih hi MZP president ka nih angin Zirlai zawng zawngte khan min lo hriatsak rawh u tih hi ka sawi duh a ni. Ram leh hnam humhalh kan sawi thin a, ram leh hnam humhalhna pawimawh tak chu kan zirna a ni tih hi zirlaite hian lo hre thar ila tih hi ka sawi duh number 1 a ni.

Vawiin a kan pun khawm chhan hi SB. Shashank Mizoram chhuahsan tura kan nawrna a nih rualin, a pawimawh ber chu Tuikuk issue hi a ni. SB. Shashank hi chu Tuikuk Issue a a hmanraw pakhat ve mai a ni.

NGO Coordination committee leh Mizoram political Party hrang hrangin inlungrual takin, ‘Tuikuk ten ram pawnah vote an thlak tawh tur a ni lo’ tih hi kan pass tawh a, Vawiin hian ka sawi nawn leh ka duh chu, ‘Mizo Mipuite duh dan hian election Commission of India hian anmahni polling station-ah ngei vote rawn thlaktir rawh se.’ Mizoram state pawna vote an thlak dawn a nih chuan, Election Commission of India hian lo hria se ka duh chu, kan ram hi a buai dawn. Mizoram state pawnah Tuikukte vote an thlaktir a nih chuan kan ram hi a buai dawn a ni tih hi Election Commission of India hian lo hre rawh se. Mizo thalaite hian kan tihtur kan ti ve tawh ang.  Kan dawhtheih em vangin tun hun hi kan thleng a, vawiin atang hian Kan dawhtheih hun a pel tawh tih hi lo hre bawk rawh se.

Vawiin a ka sawi leh duh point pakhat leh chu, Media hrang hrangah kan hmu a, ‘Election/inthlan kan tihbuai chuan President rule-ah kan awm anga’ te an ti, Mi intifing hovin an lo hlauthawng a nih chu,. Mizo mipui a ram chhunga mite kan tanrual chuan an duh duh dan hian India Sawrkar hian ro min relsak lovang tih hi lo hre rawh se. President Rule kha lo hlau suh u, vawiin-ah kan tanrual zia an hre tawh a. A ram chhung mite duh dan hian ro hi an rawn rel dawn a ni tih hi Mizo thalaite hian kan hriat a ngai a ni.

Vawiina ka sawi leh duh pakhat chu; heti khawp hian kan hotuten an sawi tawh a, Tuikukin lehkha an han thlen zeuh a, Ni khat pawh rial lovin hma/action an la zel a. Political party hrang hrang leh NGO –te pawhin a hmunah kalin Delhi ah te kalin kan kalchilh a, Mizote thu thlen hian awmzia a nei ngai lo a ni.

Kan la hria em? March 1, 1966 kha kan la hria em?

Kan hnam pasalthaten ram ram dang awp hnuaia awm duh lovin ke an lo pen a. Mizote hian Independent kan lo sual tawh a ni. Maw!?

Vawiina ka sawi duh chu, Ram buai hrehawmzia kan hria, Mizo thalaite hian kan peih lo tih pawh kan hria, ram buaia kan hmeichhiate India sawrkarin a tihduhdah zia pawh kan hria.

1966 kum ang kha Mizo Thalaite hian kan peih miah lo. Amaherawh chu, vawiina ka sawi duh chu, loh theih loh hian India sawrkar hian Min hnuk lut ang tih ka hlau a ni.  A hunah hi chuan Mizo thalaite hian ’66  kum ang kha kan ngam a ni tih hi India sawrkar hian lo hre rawh se.

Vawiin a ka’n sawi leh duh chu, NGO Coordination Committee kaihhruaina in SB Shashank chhuak turin kan ti a. Tin, Mizoram an duh  thu ngeia chhuahsantu Tuikukte ram pawna vote thlak lo turin NGO Co-ordination Committee hmalaknain thalaiten ke kan rawn pen dawn a, hemi dal zawng hian tumah lo awm suh u.  Mizo thalai te hmalakna kawng dal zawng hian tumah lo awm suh u tih hi vawiin ni-ah hian ka sawi duh a ni.

Vawii a ka sawi leh duh pakhat chu, Kan political party te pawh kan inenfiah a ngai; Chakma vote te, Tuikuk vote te kan duh lutuk vangin tun hun hi kan thleng a ni.

Nizanah kan hmu a, Media ah kan hmu a, hachhek constituency ah chuan NGO Co-Ordination Committee in ‘Common candidate’ neih an rel a ni.  Kan ram leh hnam tan chuan kan party nihna te hi dahtha ang u. Kan ramin hma a sawn dawn a nih chuan Political party a kan nihna te hi dahtha i la, kan ram hi hawh u, I humhalh zel ang u., tih hi ka sawi duh bawk a ni.

NGO Co-ordination Committee in kan ngen a, Political party tinte Chakma candidate nei lo turin kan ngen a, Tumahin an zawm lo nia mawle!!!

Ka rilru hi a na thin a ni. ‘Chakma MLA neih Mizo thalaite hian kan duh tawh love’, kan ti a kan auva., ‘Chakma minister parthi awrhtir kan duh tawh love’, kan tia kan auva. Kan party lian  ten Chakma MLA candidate an dah leh vek. Mizo common candidate dah ngam ve mai ang hmiang hachhek constituency ang khan .. Chakma MLA neih kan ning tawh, Chakma Minister neih kan ning tawh.

A tawp ber atana ka han sawi duh chu, Political Party a kan nihna te, kohhran a ka nihna te pawh I ti teh ang, Sawrkara hnathawk kan nihna te dahthain Kan ram leh hnam tan hian I tangrual zel ang u.

Tanrual hi Chakna a ni si a.