TUIKUK E-ROLL A THUN TUM DUH LOHNA MZP BULTUMIN LUNGAWI LOHNA LANTIR

Kolasib | October 15, 2018: Vawiin khan Mizo Zirlai Pawl Headqaurters, Kolasib bultumin Hmar Students Association (HSA)  Joint Headquarters kolasib leh Govt Kolasib College zirlaite chuan Electoral Roll-a Tuikuk thun tumna awm mek duh lovin lungawilohna lantir a ni a, Govt Kolasib College atanga kawng zawhin DC office tualah sit-in-demonstation neih zui a ni.

Sit-in-demonstation neihna hmunah hian MZP president Pu Zosangliana Rokhum chuan thu sawiin hearing-a inlan duh lo roll-a Tuikuk dah luh tumna awm chu zirlaiten an duh loh vangin an dodal tih a sawi a, a tul a nih chuan na zawka kal zel pawh an hreh lo tih a sawi.

Thusawitu dang MZP adviser Pu C Zomuanpuia pawhin Tuikuk te chu anmahni duhthu ngeia Mizoram chhuahsan tu an ni tih a sawi ve bawk. "Kum 1997, October 21 ah Lalzawmliana, forest department hnuaia game watcher hna thawk mek chu Damparengrpuiah Tuikuk pawl pakhat Bru National Liberation Front (BNLF) ten an that a, hemi hnu hian anmahni duhthu ngeiin Mizoram chhuahsan turin an mite an hriattir zui a ni," a ti a, kum 21 Mizoram an chhuahsan chhungin Mizo te tan a hnawk thei ang berin an khawsa reng a, sorkar laipui lamah a chhe thei ang bera Mizo te hek chungin an lokir lehna turah mipuiten an dodal lo tih a sawi. Amaherawhchu tum tam tak hruaikir tuma hmalak a ni chungin anmahni lamin an thulh leh thin a, ruahmanna hnuhnung ber pawh tunhnaiah a tlawh leh niin a sawi.

"Tuikuk lokir hi kan remti a, Mizoramah lo haw se kan tih laiin lokir duh lo te roll-a thun luih tumna awm erawh kan remti lo," a ti a, hearing-ah pawh inlan duh lo, Mizoram-a lo kir duh lo te chu roll-ah awm an remtih loh thu leh a tul anga dodal an tum thu a sawi a ni.

DC office kawtah hian College SU vice president Lalnghilhlova pawhin MZP hmalakna chu a tawp thlengin an thlawp tur thu a sawi a, HSA, jt hqrs atanga Hrangliankhuma Hmar chuan Mizoram atanga anmahni duhthu ngeia chhuak Tuikuk te, roll-a an luh theihna tura Tripura-a zuk kalchilh chu an duh lova, MZP te hmalak chu a tawp thlengin an thlawp dawn tih a sawi.

Lungawilohna lantira kawng zawh leh sit-in-demonstation neihna ah hian zirlai 300 dawn an pungkhawm a, thutkhawm an neih zawh hian District Election Officer Dr Arun T. IAS awm loh vanga charge la tu Addl DC Pu Laltanpuia Hnamte kutah resolution an thehlut nghal a ni.