KA PAHRAWN IN MIN PAWNGSUAL

Cl-VIII ka nih laia thleng ani a, kan khua chu Thingtlang In 200 bawr vel ani a, Jeep aia lian Motor luh theih loh na ani.. Fur ah phei chuan Jeep tak ngial pawh a lut hleithei lo thin zawk a..Ka pianna khua chu anilo nain ka nu hi middle school zirtirtu anih avangin ka tet te a tanga awm a, seilian ka ni bawk a, ka tlangnelin thiante pawh ka ngah hle ani. Kan khaw diktak ah ka ngai ani. Ka nu leh pate hi an innei lova, sâwn ka ni tihna anih chu..ka nu chu nuthlawi mah nise, a hmingin sawrkar hna te alo thawk bawk a, rimtu tlangval pawh ngah thei ve hle thin..!

Tichuan buaina leh harsatna lian tham tawk lovin Pathian zarah hrisel takin ka seilian a, mahni tawkah duh duh nei thei ka lo ni bawka, ka thiante chuan min awt ve thei hle thin ani.

Kum 8 ka nihin ka nu chuan Pasal anei a, a felin ka pahrawn chuan min duat hle nghe nghe.. Zirna lamah nise a thiam thei pawl ka ni ve zak zak a, ka pawl rualpuite ai pawn ka naupang rêng ani.

Pâwl sarih chu tha takin ka zo va, High School ka'n kal ve tur chu khâng laia ka chak ber ani hial ang..! Mahse kan khuaah High school ala awmloh avangin ka nutei te khua ah zirzawm turin ka nuin min dah a, ka nauin min ngen nasa mai a.. Mahse ka nu te chuan an thlem lungawi thei hram a, hetih lai hian ka nu chuan nau apai a, aneih a hun tep tawh nghe nghe ani.

Kum 10 ka nihin chhang ka nei a, hmeichhia tho niin kum 13 ka nihin nau mipa ka nei leh a.. Ka nau mipa pianlai chuan ka nutei te bulah ka awm tawh a, Pawl 8 ka zir ve tan lai ani..

Khang laite khan thian thar tamtak ka chhar a, nuam ka tiin ka hlim thin a sin.. ka tawngduhin nuih ka heh bawk a, reilote ah hmelhriat leh min hretu tamtak ka tawng a, Zirna lam erawh ngaipawimawh em em ka ni a, ka zirna tih chhiat phah tur khawp erawh chuan thian ka kawm lemlo..

1st Term exam kan zova, kar hnih vêl chawlh kan neih a vangin kan khua ah ka haw ta a, ka nau mipa thlahnih mi ka hmuh chuan ka hlim hle a, a ngovin a duhawm bawk a, ka en ning thei thlawtlo ani ber e..

Nitin in ka nau te pahnih chu ka awm a, nau nei lo leh pa tel lova seilian ka ni bawk a, nuam ka ti hle ani.. 'Pa' tia koh tur ka nei ve ringawt te pawh ka lawmna hi a tling em em zel a..! Chhungkaw in ngeih tak kan ni a, ka pahrawn pawn min duatin, keipawn ka pa tak takah ka pawm nghet hmiah ani.

kan tleirawl ve tan bawk a, ka ti pawh a nula ti tuai ve tawh hle a, ka naupan lai a tangin han cher em em ka nei lova, uan thu suh ah, ka tleirawl chhuah pawn ka duhawm ve aniang, min fiamtu pawh ka tawng ve nual a, ngaizawngtu pawh ka nei ve nual mai..

Mahse chung ka duhawmna te chu ka lungngaihna leh rilru natna min thlentu mai ani dawn tih ka hre der silo..!

Kan school chawlh ka lawmna em em pawh 'ka nu' ka thlamuanna, kha leh chen min enkawl a, PA neilo tih pawh in hrelo khawp a, a hun hlu tak ka tana seng raltu ka ngaih em em, a bula awm ka chak ngawih ngawih leh ka nau te bula ka haw thei tur kha ania.. Mahse mihring ten hmalam hun kan hriatloh zia hi aw..!!

Ka hmalam hun hria ni ila chuan kan chawlh te kha ka nutei te bulah ka hmang daih awm si a..!

ka dai ngailoh ram dai turin ka haw a, ka tawn ngailoh thil rapthlak, midangte tawn atan pawha ka duhloh ber tawng turin ka haw tih reng ka in hre silo, hria ni ila kumkhua pawn ka haw duh tawhlo ngei ang..? Khatiang anga rilru natna leh rapthlak kha ka tawng ta si! Tumah hrilh ngam lovin ka tuar a, ka mittui tlak tam thin zia kha aw..!

Zanah Midang hriat hlau taka rizai hnuaia ka tahna zawng zawng te kha..?

Kha tih lai a thlamuantu ka mamawh zia kha..!

Tap zawih zawih chungin Pathian ka au thin a, mahse awmzia a awm tawh si lo! ka thinlung hliam chu anasa lutuk a, ka damchhunga ka thinlunga ser nung reh thei tawh ngailo tur min hnutchhiahtu ka pahrawn tenawm tak chu ka thinlung zawng zawngin ka hua ani..

Mahse.. Engkim a nih tur ang ani zo tawh a, ka duh emaw duhlo emaw ka chunga thil thleng tur ang zawng zawng chu a thleng tho si a.. Ka tawngtaina te chu boruakah a tham ral zel si..A chhan chu Ka thinlunga Pathian ka rinna kha a tlem em ani..!

Tichuan school luh a hun leh ta a, ka nutei te khaw lam pan chuan Jeep hnungah ka liam thla leh ta bauh bauh a, mahse hlimna reng reng ka nei thlawt lo, ka nu phei chuan ka kal dawnah pawh 'i dam samlo ami mambawih..?' min ti hial a, mahse engmah ka hrilh ngam silo, 'ka dam lutuk ka nu..' tia ka mangtha chuan ka insum thei thlawtlo a, ka mittui chu a luan hian a luang zawih zawih a, mahse ka nu chuan ka lunglengah min ngai a.. 'Nang hi chu aw..ka tello hian i awm thei thlawtlo ani' a ti ringawt a.. Engmah phei chu ka sawi zui ta chuang lova..

Tlai dar 4 velah ka nutei te In ka thleng a, zanriah kan ei kham chuan 'ka chau emai,ka mu mai dawnia ka nute..' tih leh room lam pan ka rual a, zan ka mut that lohna rei tawh bawk a, ka motor chuanna ka chauin ka sil bawk nen, reiloteah ka muhil ta bawrh bawrh a..

A tuk a tang chuan school kan kai leh ta a, thiante bulah ka awm a, thleirawl tih takah ka thiltawn chu ka vei zui em em ta lova, pangai takin ka nung chho ve mai bawk a.. Mahse, ka awm anuam lo chho a, ka nun chu a chau ni berin ka hria..! Chaw te hi ka eichak thlawt lova, rûn dâlah tlem chu a ei ve hram thin, theithur ka chak em em reng a, theihai rah lai ani bawk a, a kung bulah thut chilh meuh vin ka'n ei ta thin a, mahse kha ti chung khan engmah in rinhlelhna ka la neilo, thi ka neih tanna pawh ala rei lova, bâkah ka hrethiamlo hrim hrim ani..

Thla aliam a, ka thi neih a tawp hmak a, hun a kal zel a, thi ka nei thei ta miah lova, mak ka tiin a ngaihna ka hrelo hle a..Ka form pawnven hook hi ka ti peh reng a, ka dul chu a lian telh telh a, ka nutei chuan min ringhel a, keipawn ka rai ngei ani tih ka hre tawh, mahse tumah ka hrilh ngam lova, ka nih nih ka ni mai aniang chu tiin ka sepui ruah tuar ve ta ngawt ngawt mai ani..

Tlai khat chu ka nutei chuan roomah min ko lut a, min zawt ta a, keipawh chuan thil engkim ka hrilh ta vek a, ka nutei rilru nat zia leh thinrim zia kha aw..! Tun thleng hian ka mitthla ah ala châm reng a, ka theihnghilh thei lo! A rilru na lutuk kha tah pawh a tap theilo hial zawk ani..

Zêp leh thup rual ni ta hek lo le, kan school leh khua ami te chuan reilo teah an hre darh ta vek a, ka pa (ka pa tak) pawn a hriat ve leh a rawn kal nghal a, khatiang lai huna kan chhungkaw boruak leh ka nun hreawm zia kha..! In awhhlum daih te ka chak rum rum hial thin! Ka nu phei chu a zak em em a, awm ngaihna pawh a hrelo, a ât phah lo chauh ani. School chu loh theih lovin ka chawlhsan ta a, ka chak em em doctor pawh ka ni thei dawn talo chu hreawm ka tih na ber pakhat ani.

Kan khuaah ka nuin min haw pui ta a, ka pahrawn nen pawh an inthen nghal a, In leh lo kan nei ve a, mite angin thalo mahse ka tan chuan a hlu ve em em ani.. Ka pahrawn zawk hi alo lut zawk anih avangin a chhuak zawkah a tang lo thei lova, min chhuahsan ta ani.. Ka tan chuan nuam zawk mahse, ka nu erawh ka khawngaih ru hle a, mahse tih theih engmah ka nei silo..!

Zahthlak viau mahse, mi ten an hre lo thei si lova, kan khua In 200 bawr vel lekah chuan kár loh vah kan chanchin chu a thangchhuak nghal a, mite khawngaih ka hlawhin an thei tawk Zo Artui min pe nasa hle a, kan ei sênloh khawpa tam ka dawng ani.. Mahse, ka tan erawh kha hun tluka hreawm kha ka nunah ka la tawng lo..

Tuk khat chu ngaihdam dil turin ka pahrawn leh anu leh pa an lo lang hlawl mai a, ka pi chuan tap zawih zawih chungin pawi a tih thu leh ka pahrawn thil tih chu a huatzia a sawi a, mahse ka nu chuan 'keinin lo ngaidam thei pawh ni ila, ka unau te,(ka nu nu leh pa hi an boral tawh a) a nutei leh aputea ten an ngaihdam ve loh chuan kei chuan keima thuin engmah thutlukna ka siam ngamlo, kan lo inrawn khawm ve phawt ange' tiin a thlahliam ta rih a, 'mambawih, enge i ngaihdan?' tia min zawh chuan 'i thu thu ni mai, a sualzia in hria a, a inchhir takzet anih chuan kei chuan harsatna ka neilo, i duh phawt chuan nei leh rawh' ka ti ta a..tichuan ka putea te, ka nutei ten karah fate an awm tawh a, a ni pawn a thiltih sual te inhria a, a sim anih chuan innei leh rawh u, a nih tur ang ang ani zo tawh a, thinrimin, kan rilru na viau mahse engmah kan ti danglam thei tawh chuanglo an tih avangin ka pahrawn chu alo lut leh ta ani.

Chutia ka pahrawn alo lut leh dawn tih ka hriat chuan ka huphurh ru khawp mai a.. Ka chunga a thiltih te ka ngaihtuah lêtin ka tiril hi ala khur der der thei ani..!

Ka nau pai pawh thla 6 a tling tep tawh a, a rawn che ve det det thin chuan ka thinlung hi a fanin engemaw hlimna mak tak min pe ani.. Chutih rual chuan ka vanduai bik zia min hriatchhuah tirtu ani fo thung si.. Mumang ram thlenga min chenchilh a, hlau thaw hlawp hlawpa thlantui tla hluam chunga min ti harh fotu ka pahrawn in ka chunga a chet dan chimawm leh tenawm chu duhlo teh mah ila, ka rilruah a rawn thar fo va, ka nu ka khawngaih avangin ka ngaidam ta chauh kha ani rêng a, ka thinlung erawh chuan a ngaidam thei ngai lovang ka damchhungin..

Thah tuma min vau laia a hmel rapthlak zia kha chiang takin ka mitthla in ka la hmu thei ani..!

Ka sawi tawh angin School chawlh hmanga ka haw lai kha ania, ni khat chu Inah keimah chauh vin ka awm a, Vengsanga ka pi te Inah ka nu leh ka nau te an leng chho a, kei chu In vêl ti felin ka che mawlh mawlh a..Chutih lai chuan ka pahrawn chu vawkchaw thingtuah tur a pu a, a rawn haw ve chiah bawk a..

In chhunga rawn luh pahin 'Mambawih, thingpui min lo lum sak hman em?' a rawn ti lut a, kei chuan rang zetin 'Awle..' tih pah chuan flask a ka thingpui lum sa ka dah chu ka thlit nghal a, kurtai nen pek pah chuan 'ka inbual lawk dawn nia..' tih leh bathroom ka pan nghal a, ka inbual zawh chuan towel veng chhuakin kan room ka pan nghal a, ka nau nen room kan intawm a, ka inthlak zawh hma chuan ka pahrawn chu roomah a rawn lut thut a,

ka phu chiang lutuk chu 'ngatinge i rawn luh ngawt a..?' in sûm hman lo chuan ka lo ti tuar a..

Ani chu nui vur vur chungin 'Mambawih, i duhawm zia hi i inhria em?' a tih chuan hlau zetin, 'ka pa chu i ti mak e mai, khawngaihin min chhuahsan rawh, chu ti lo chu ka au vak ani mai..' ka ti khur dawt dawt a, ani lah chuan ka thusawi hre awm lo takin min lo pan hnai a, ka inrin hma chuan min rawn kuah thut a, keichuan tal chhuah tumin ka tha neih zawng zawng chuan ka bei a, 'min thlah vat rawh' ka ti tuar tuar a, ka au bengchhen tak em avang chuan ka kâ hup pahin'i au leh chuan hei hi ni mai' tih pahin chemtein min tin a, ka hlau lutuk chu ka khur dawt dawt a, ka mittui a tla zawih zawih a, ka mangang takzet ani.. Ka rilru chuan 'ka nu, lo haw hram rawh' ka ti mawlh mawlh a, mahse engmah awmzia a awm lo, 'ka thu thu in awm la, i him ani mai, nge thih i duh zawk em ni?' min la ti ta deuh deuh a..

Aw..!! Mi tu emaw tal lo kal se ka tih zia kha.. Kei tleirawl kum 14 pawh la tling lo, bialpa pawh la nei ngailo tawrh a tan chuan ana mah mah ani..! 'Lalpa, min tanpui rawh..' tia ka tawngtaina chu engmah lo mai ani si..

A duhtawkin min khawih a, kei chuan min tih dan ang anga awm mai loh kha chu duhthlan tur ka neilo tih ka in hria a, ka dawh tawp mai ani!

A thlan rimchhe leh a taksa ban chup te chuan ka luak a ti chhuak ngawih a, a duhtawk a ngah hnu chuan 'Midang bula I sawi vaih chuan i thi a ni mai tia min vau chungin min chhuahsan ta a, ka rilru na lutuk chu chêt pawh ka che chang peih lo, ka pahrawn chuan'in ti fel fai vat rawh' min rawn ti leh a, ngawi rengin ka tho a, ka serh a tang chuan thisen alo chhuak a, ana em em bawk a.. Khuma thisen kai te chu ka ti fai a, ka taksa zawng zawng nat aia lêt tamtakin ka rilru chu ana ani..

Ngatinge hetiang thil tawng tur hian ka lo pian le tiin ka thiltawn chu awi harsa ka tiin, ka ring thei lo zawk hial ani..!

Ka mumang ni se harhchhuak daih ila tiin ka ngaihtuah a, mahse a tak ngei ani si!! Mittui tla zawih zawih chung chuan kan sulhnu chu ka thian fai a, ka taksa a ka pahrawn thlan rimchhe tak te chuan ka luak a ti chhuak ngawih ngawih a, in silfai turin bathroomah chuan ka lut a, ka insûm thei lo, tap ring ngam si lovin ka tap zawih zawih a, ka taksa a ka pahrawn min khawihna te chu tuia silfai theih nise ka ti ngawih ngawih ani..

Tunah chuan thup rual loh vin ka taksa ah a rawn lang ta si a, railo ila chuan ka damchhungin ka thup hlen anga, ka pahrawn tan mualphona leh ka nu leh ka chhungte tan zahna a thleng awm silo va, mahse Pathian chuan ka pahrawn sual tak chu a damchhunga mite hmusit turin keimah hmang bawkin a sualte a puan chhuah sakah ka ngai a, mahse a tuartu erawh ka ni tel ta tho ani..

Mahse hun kal zel chuan ka rilru natna te pawh a ti ziaawm tawh a, ka chhungte leh min lainat tu te tawngtaina Pathianin a ngaithla a, ka chunga chhum dum chhah tak te pawh a kiang ve mek ani..

Kan duhthusamin mihring te chu nung theilo mah ila, hetiang vanduaina ka chunga a thleng bik hi hriatthiam loh chang erawh ka nei fo mai..! Engatinge kei kher ka nih bik le tiin Pathian meuh pawh ka chhuahchhal a, mahse a chhanna erawh min hriat tir silo!! Nun beidawngin in tih hlum mai ka duh fo va, mahse ka pum chhunga ka naute lo thanglian mek chuan ka tum chu min tih hlawhtlin tir theilo ani..

Pathian zarah tluang takin naute mipa duhawm zet ka hring a, ka pahrawn te nen pawh kan chêng ho leh tawh a, mahse a hma angin kan inchhung boruak chu a nuam thei tawh lo! Engkimah min daidang tu engemaw tak, tawngka a sawifiah mai theih si loh chu a awm tlat a, chuvangin ka nute duhdanin ka fapa chu ka nuin enkawlin kei chu ka zirna zawm turin ka nutei te bulah chuan ka awm leh ta ani..

A tir chuan ka fapa kalsan chu ka hreh hle nain thil tha ber ani tih ka hria a, ka hnute tui vawi khat pawh hne lovin ka kalsan ta zawk ani.

Ka fapa lo len hnu pawn kei chu 'a u' tiin min ko mai a, ka nu leh pa te fa ani lo tih pawh a hre lo ani..

Mahse, kei zawng ka nun in ngai a awh thei tawhlo, mahni inkhawngaihna in ka khat a, ka nun a hniam a, chung zawng zawng ai chuan mipa ka châkna chu a nasa a, sex ah ka tui hâl a, a remchang apiang ka mutpui thei mai zêl chu sim ka duh em em, mahse ka theih si loh chu ani..!!

Ka nutei te khua ah chuan ka school luhna ngaiah bawk ka lût leh a, pawl 8 kha ka passed hmanlo nain 1st term leh 2nd terma ka result avangin pawl kua ah min admit a, kan lawm khawp mai, pangai takin ka nung chho a, pawl sawm pawh tha takin ka passed a, ka nutei te khuaah chuan High school thleng chiah a awm avangin cl-xi leh cl-xii chu District khawpui pakhatah ka nau nen inluahin ka zirzawm leh a..

Pawl 10 ka kal lai khan sex ka hmang nasa tawh hle a, ka nutei te thenawm ami pathlawi nen kan in ngaizawng a, mi fel tak leh zaidam em em ani a, a chhungte pawh an fel khawp mai, rethei ve tak ni mahse an Ina lutchhuak hi an tam thei hle.. Zan tin sex kan hmanga, Drug addict ani a, mahse kan inkawp lai chuan a sim tawh a, Zu a in zeuh zeuh tih loah chuan sawiselna tur ka hre lo..! An Inah te hial ka riak a, chutichung chuan a chhungte chu ka chungah an tha em em reng a, ka tumhma nun engkim hre vek te an ni chungin ka tana hreawmna tur leh rilru natna tur zawngin an awm ngailo.Min be tha em em a, ka hriatloh erawh chuan an fapa chu an zilh ve fo va, mahse ka tan chuan an tha takzet ani..

Mahse dawtsawi a riahchhuah reng chu a theih lova, kan inhnaih tho va, inhmuhna hun chu kan ngah khawp mai.. Mahse, ka nutei te chuan an hrechhuak a, Pawl sawm exam zawh ve leh min haw tir a, ka nu hnenah an bula awm reng chu a thatloh zia leh ka ngaihzawng neih chungchangte chu sawiin an lo hrilh vek a, chuvangin ka nau nen In kan luah ta ani..

Kan awmna chu ka nutei te khaw bul lawkah ani a, khanglai khan ka nutei te khua leh kan awmna ah chuang Bus a service reng a, khaw inhnaihte ani bawka, Pathian ni ah te kan lengphei ve fo thin a.. thawhtan zingah te kan haw leh mai thin ani..

Lehkha pawh tha takin ka zir a, mahse sex bawkin min tibuai leh a, ka nau nen pawh kan in hauh phah fo a, chutiang alo nih takah chuan ka nuten kan khua ah min hruai haw a.Mahse khawi hmunah pawh awm ila, ka nun chu adanglam chuang lo.. Kan khua ah pawh ka kawp awm tawk te te an lo awm fur mai.. Mi chi hrang2 ka kawp a, a tawpah chuan nau ka pai leh ta ani!

Ka nu chu a thinrim takzet a, a chanah ka indah a, ka dem hranlo, min hauhna pawh adik ka tiin, thiam thu sawi tur reng reng ka neilo tih ka inhria, ka thiamloh ani, ka dem miahlo, mahse tawngkam na tak taka min hauh reng takah chuan ka thin a rim ve ta hle a, ka insûm reng thei ta bik lo, diktak chu a pasal hur luat avanga ka nun chhe ta vek leh ka rilru nat zia hretu ka nu ngei chuan khatianga min tawngkhum kha mak ka ti êm ani.. 'Ka nu, heng zawng zawngah hian thiam chu ka in ti hauh lo, mahse, a bul ber chu i pasal ani tih hria la, i tawngkam uluk ve deuh teh' ka tih chuan ani pawh chuan dik a ti ve aniang, min hauh vak vak thin chu a reh ta deug ani!

A nihna takah chuan Ka pahrawnin ka chunga khatiang khawpa a chet hnua a nei leh the kha mi tamtak dem a hlawh a, Ni e, ka thinlung tak chuan keipawn dem chang ka nei tho,mahse ka nu ani a, hun hreawm leh harsa tak paltlang chunga min enkawlna te a vangin ka zah a, a thil tih chu a dik emaw, dik lo emaw, ka tana tha tura a tih ah ngaiin, ka duhdan anih loh pawn ka sawisel ngailo! Buaina lian tham erawh a awm lem lova, fa pawh ka nei leh tawh a, chuti chung chuan ka pahrawn chuan min la beisei ngam cheu nia..! Mak ka tiin ka ten takzet a, engang pawn sex hman chak mah ila, ka pahrawn lakah chuan ka chakna zawng zawng a bo hmak thei.

Ka fapa naupang zawkin kum a tlin chuan nau ka pai leh a, chu tah zawng ka nu chuan a tuar talo, min hnawtchhuak ta a, ka fa paina pa chu ka luhkhung ta ngawt a, a chhungten min duhloh dan chu namen lo tak ani, zan khat chiah ka riak a, kan Inah min dah let an tum nghal, ka bialpa ve lah chu ngawi dûk tawh sia.. Ka tan awm rengna chi ni hek lo le, kan In lamah lah ka haw duh bik silo, Aizawla ka putea te Inah ka kal ta ngawt a, rei pawh ka awmlo, ka pitei sual zia chu tlâng hriat ani a, thla khat chiah ka awm hman a, ka chhuak leh ta nghal a, ka awm chhung zawngin a hmel hlim vawi khat mah ka hmu lo..! Ka chhuah dawna ka putean Rs.500 min pek chiah chu ka pawisa neih chhun ani a.. Ka pute chuan ka nu emaw ka nutei te In lam pan turin min ti nain, ka pan duh ta chuang lova, Aizawlah chuan hmêlhriat han pan mai tur ka hria pawh ani chuanglo, ka luhlul ve êm a, min koh silova han haw leh ngawt chu ka tlawmngai ve laklawh tawh bawk si.. Zawlkhawpuiah ka hawi hai ani ber mai..!!

Kalna mai tur hre lova ka hawi vual vual lai chuan rinloh takin Cl-VIII kan zir laia ka thiannu kawmngeih em em Mali nen kan inhmu thut a, mak kan ti dun ngang mai! kan piaha Restaurant ah chuan lutin kan inhnawh puar a, sawi tur kan ngah dun bawk a, kan sawi rual leh nawk nawk thin a..

Vanduaina ka tawh laia min hnemtu leh min thlamuantu ber ani a, ka tan chuan ani tluka thian hlu an awmlo!! Kan awmna vengte in hrilhin, 'Kan inhmu leh dawn nia..' tiin kan in thlah a, min kalsan ta a..

Khawilam nge ka pan ang tia in ngaihtuah chung chuan Restaurant pawnah chuan ka ding reng a..

'Hey.. Dik, tinge dawt min hrilh a?'

ka phu zawk chungin aw lo chhuahna lamah chuan ka hawi vat a, Mali chu lungawiloh hmel zetin ka piah deuhah chuan alo ding reng a, 'I rai alaw..? Nphchin khan i rai tih ka hrelo reng reng..! Chuan kalna tur hrelo i ang' min tih takah chuan ka zêp reng peih ta lova, a tlangpui chu an Inlam kan panna kawngah chuan ka hrilh ta thuak2 a..

An unau chauhin In an luah a, inthlahrung lo takin ka awm thei dawn tih ka hriat chuan ka thaw huai a.. Nileng deuh thawin kalna tur ka hriat loh a vang leh kalna tur hrelo awm taka awm vêl ka zah bawk si a vangin hmun hrang hrangah ka tei kual a, ka chau ve takzet ani.. Zanriah kan eikham a, hmun vêl kan tih fel lai chuan ka pum chu a na riai riai a, pumna satliahah ngaiin ka inthiar a, a hnuah chuan a reh ve leh mai bawk a.. Khumah chuan mut mai mai pahin kan inkawm a, reiloteah kei chu ka lo muhil daih niin.. Mahse, ka pumna bawk chuan min ti harh leh a, inthiar tura bath room-a ka thu chiah chu ka serh a tangin thisen khar lian pui pui alo baw hawk a, ka pum leh tai bawr vel chu ana em em bawk a, nau ka chhiat ni ngeiin ka ngai a, zandangah pawh awm ti nuamlo tawkin ana zeuh zeuh nain, engteh vak anih ka rinloh avangin ka ngaipawimawh em em hran lo va.. Mali hnenah pawh engmah ka hrilh duh chuang lova, mahse ka thi chu nileng zankhuain a chhuak deuh reng a, ni a ral a, kar khat a liam pawhin ka thi chhuak chuA reh thei ta mai si lova, ka ngaih chu tha lo ru khawp mai a, mahse eng em ani lovang tia inhnem in ka ngai pawimawh duh ta lova.. Ka thiannu hnenah erawh chuan ka sawi ta tho va, ani lah chu rin ang ngeiin a phi cheng a, Damdawi Inah kal a rawt reng bawk a, mahse kei chuan an Ina ka awm ve ringawt pawh a hautak tih ka hriat a vangin 'ka dam vek tawh' ka ti tlat thung a, awihlo tak chung chuan a tlawm zawkah chuan a tang ta a..

Hetia ka awmbo lai hian ka chhungten min lo zawng nasa hle tih a hnuah ka hre leh a, ka fapa kum khat leh a chanve vel ka kalsan a, zan ka muta ka thanharh a piangin ka fapa chu ka rilruah a cham reng a, Nu zawng zawnga Nu nep leh tlaktlai lo ber ka ni tih ka inhria, mahse, ka kal sual lak lawh a, kawng diklo ka zawh tih inhrereng mah ila, ka pensan thei mai tawh silo ani!

Ka thiannu te ina thlahnih vel ka chen hnu chuan ka thiannu chuan haw turin min ti a, nitin deuh thaw thu tha tak tak in min zilh fo va, hetianga fanu fel leh tha neitu Nu leh Pa chu an vannei hi ka ti ngawih ngawih thin!

A chhan chu ka thiannu nunah hian Isua hmel ka hmu thei tlat ani!

Ka thianu'n haw man tur a tana min pek chu lain ka haw ta a, thawmhnaw pawh min pe nual a, bag lianlo tea inkhung leng vek kha ka inkhai bawr ve ta lûk mai.. Kan khua pan lovin ka nutei te khua pan ka tum zet nain, ka tum ka thlak a, kan unaua kan In luah tawhna, lehkha kan zirna chu ka pan leh ta zawka, diktak chuan kan Ina haw chu ka duh a, mahse hnawhchhuah ka ni miau a, han haw leh ngawt chu tlawmah ka la ve tlat bawk si a..!

Hmana kan Inluah laia kan thenawma awm thin ka thiannu te kha an la awm takin tiin ka pan ta ngawt a, an In chu a chul rep hian ka hria a, apa nen chauha khawsa thin kha an nia.. Ani pawh hi kei aiin a nep bik lem lova, amah avangin mipa ka hriat phah nual kha ania, kan inkawm nasain kan theuleu nasa a, ani phei chu zu pawh in thei em em ania, ruihhlo dang erawh a khawih ka hre lo.. Kei hi ka vanneihna pakhat chu ruihhlo lampang hian min tibuai lem lova, zuk leh hmuam erawh ka ti thei vek..

Ka thiannu te In Kawngka chu ka kik dat dat a,

'Tunge..?'

In chhung atang a 'aw' lo chhuak chu ka thiannu aw ngei ani tih ka hria a..7

'Thiannu, keimah.. Diki'

ka ti a, chu ve leh khawngkhar chu a ri rak a, ka thiannu chu pawr chhapin alo awm a, ka nui hut hak a, 'khawnge i pa' ka tih chuan a boral twh thu te, amah pawhin pasal a neih tawh thu leh a pasalin a uire san thu te chu min hrilh nghal bawrh bawrh a, a In lah chu a'n hnawk em em khawp a, a rimchhe angreng hle bawk a, zu rim lah chu a nam em em bawk a... Zu alo zuar reng chu niin, mahse pan tur dang ka hriat miau loh avanginn ka cheng ve ta tawp a..

Ka thiannu chu zu ka'n zawrhpui tak tak a, mahse a mah hian a inhnem ve em avangin hlep tur pawh a tlem phah thin a, ka rilru chuan zu zawrh chu nuam ti chiahlo mah ila, duhthlan tur dang neiin ka inhre tlat lo ani..

A chang chuan ka thiannu chu a chatthla tawp zel a, engkim ka kutah a awm vek a, zu zuar e ti lo chuan kan In chhung pawh ka ti fai tha a, Ina in ka phalloh a vangin an lo lei a, an chhuak leh mai thin a, mahse mi pahnih khat thiantha deuh bik te chuan min in chilh fo va, puih kan ngaih chang pawha hreh miah loa min pui thei tute an ni a, kan duhsak fâl deuh bik ani..

A rei hnuah phei chuan zu khar chhawn leh adang chu ka kutah vek a awm a, ka pualin pawisa pawh ka khawl ve keuh keuh a, thahnem ka ngai thin bawka,kan khawsak pawh a ziawm khawp mai..mahse, henglai hun zawng zawngah hian rilru nuamin ka awm ngailo tih theih ani..

Tichuan a tawi zawngin.. Zu lo in thin zingah mi Puia nen chuan kan in ngaizawng a, a rawn riak zeuh zeuh a, a hnuah phei chuan min rawn luhkhung ta tawp mai a..! Nupa ang maia kan khawsak miau a vangin nau pawh ka pai leh a, mahse thlathum anih in ka chhiat leh a, Damdawi Inah in entirin doctorin naupai chi ka nih tawh loh thu min hrilh a, tichuan ka insiam ta nghal ani..

Hun a kal ve zel a, ka thiannu leh ka bialpa chuan zu chu chawah an ringlo chauh a, engtik lai pawn an in reng a, hlep pawh a awm thei mang lova, a chang chuan chaw chhum tur pawh neih loh chang kan nei fo mai! Theihtawp chhuah mah ila, ka chenpui ten zir hek lo, kan rethei tulh tulh ani ber mai..Chubâkah YMA ten min en thla reng bawk a, vawi 2 chu min man ve tawh a, mahse ka thiannu chuan a tuar mai thin a, Jailah te tangin ka in bail chhuak ve leh mai thin..

Enthlak reng kan nih a vang chuan zuzawrh reng chu a ngam awm ta lova, chawhmeh te kharchhawngin kan zuar ve lawp lawp a, mahse hlep a chhe si a, awmzia awmlo thin khawp mai!!

Nghei lovin engtin tin emaw chuan kan khawsa ve hram hram a, ka bialpa leh ka thiannu zu duh lutuk chuan ka thin a ti rim em em thin a, hauh pawh kan in hauh phah fova, vawikhat phei chu kan insual a, mahse ahnu lawkah in ngeih tak chuan kan chengho ve leh mai bawk a,mahse khawsak erawh a harsa telh telh ani.

A hnuah chuan ka bialpa pawh chuan min chhuahsan a, ka thiannu chuan 'hetiang ringawta khawsak reng a harsa si, zu zawrh lah a ngam awm tawh si lova, ka In leh Lo hi ka hralh anga, Aizawlah ka inbengbel dawn' a ti a, keichuan engmah ka sawi lem lova, a ta ania, sawi theih ka lova, a thu thu anih a vangin ka inrawlh duh lova, tichuan tlawm tein a In chu a hralh a, Aizawl lama pem tur chuan kan thawmhnaw mamawh zualpui chu kengin kan chhuak ta a, keipawh chuan ka zui ve ta zel a, ka thiannu hi zu heh viau mahse, mi rilru tha tak ani a, mahse a taima vak lo..

Aizawlah pawh eng tin tin emaw In luah tur chu kan hmu ve leh mai a, Vengmawng lam, mi Inhnuai zimte chu thla khata Rs.600 chawin kan luah a, ka thiannu nen chuan thlatin Rs.300 ve ve a inchawisem turin kan inrem siam a, kan ei leh in thlengin in ang thlapa in chawi sem tur chuan rem pawh kan ruat nghal a..

Ka thiannu chu pawisa a la ngah bawk a, a leng kual vel mai mai a, kei erawh kan Inluahna Inchung berte In tifaiin ka inhlawh nitin thung ani.

Zu vang bawkin harsatna kan tawk leh a, ka thiannu chu zu tam fe leiin kan awmna veng tleirawl ho hnenah chuan a hralh leh thin a, chu chu khawtlangin lo hriain an veng a tang chuan min hnawtchhuak ta a, keichu duh chuan ka awm theih tur thu min hrilh a, mahse ka mangan lai leh dinhmun chhiat zual laia a theihtawk chhuaha min tanpuitu ka thiannu chu ka phatsan thei bik lo ani..

Tichuan vengdangah kan insawn a, zanhnih vel chu mi kawmkarah kan riak hman ani. Khawsak a harsain hnathawh mai tur a vang si a, rilru a buai map mai..kan mangang khawp mai a, ka thiannu chuan 'zanah chhuak ve thin mai ang, kan tan a pawina awm tawh chuang hleinem..' a ti a,

keilah chuan bang bo zetin 'enge i sawi awmzia?' ka lo ti haa a, Mahse ka hrethiam leh vat a, 'ka duh teuh loh' ka lo ti hlur a, ka ngaihtuah ringawt pawhin ka ngam ngang lo ani, Mahse, hna dang thawh mai tur ka hre silo, chaw ei ve ka duh tho si a, risk ve pawp mai ang tiin thu tlukna at thlak zet chu ka siam ta ani.

Tichuan a zankhatna atan kan chhuak ve a, min pui thei tu tur ka thiannu hmelhriat nen chuan kan in hmu a, a tuk zan atanga kal tan turin min ti a,inchei fai deuh turin min ti bawk a, chuta tang chuan zantin kan inzuar ta ani.. Duhloin hreawm tih chang nei fo mah ila, dinhmun in a zir miau si lova,dam khawchhuah nan engemaw tal kan tih a ngai ve si a..

Zantin kan chhuak a, rin loh pui pui kan mutpui a, chung zingah chuan officer ka mutpui tam ber, kohhrana in hman hmel viau te pawh an awm ve a, a chang chuan mak ka ti zawk thin.. Mahse thla 5 chhung chiah ka inzuar hman..

Nikhat chu ka pum leh thin hnun vel hi ana khawp mai a, zanah pawh chuan ka chhuak peih ta lova, chuta tang chuan ka dam thei ta reng reng lo mai a, ka pawisa khawl tlêm te hmang chuan ka in enkawl ve a, dam leh mai inring kha ka na tawlh tawlh ta mai..! Zan ka mu tlem a, chaw ka ei tha thei lova, ka chau vin, ani telin ka cher ta kawk kawk a, ka thiannu lah a ngaih a sam ve si a, ka mangang ru khawp mai!

Tichuan kei, engtik a tanga tawngtai ngai tawh lo nge tih pawh inhre tawhlo kha..tap zawih zawih chungin ka tawngtai ta anih chu..!!

Ka lo sual zia leh ka nun khawlo tak chu ka mitthla ah chiang em emin ka hmu uar uar a, ka nun dan tenawm leh zahpui awm tak te chu ka ngaihtuah let zawng ringawt pawn ka zak ngawih ngawih ani?

Khâng ka thil tih dik loh zozai te kha ka nu leh ka pahrawn vangah puhin keimah leh keimah ka inthiam chawp a, a tawpa tuartu chu tudang nilovin keimah tho ka ni si??

Mahni leh mahni ka inbum chhungin ka thiante chu khitah an lo awm daih tawh alo ni..!

Kan that lai leh vanglai hun ah chuan kan chhungte emaw, kan nu le pate emaw pawh kan mamawh lo ani thei e, mahse hrisel lohna te, chaklohna leh manganna kan tawh meuh chuan kan chhungte lo chu belh tur dang kan nei lova, pan tur dang reng kan nei hek lo..

Ni e, tangkaina kan neih lai chuan kan chungah mite chu an tha teh meuh mai, mahse kan chhungte, kan nu leh pate erawh chuan kan dinhmun a chhiat poh leh min hmangaihna a zual zawk alo ni..?

Natna neuh neuh ka lo ngah em em alo nia, ka pumpui a Ulcer a, ka kal leh zunkawng lam a lo tha lo bawk a, Damdawi Inah rei fe ka awm hnuin dam chiang var lo mah ila, ka duh tlat a vangin kan chhuak ta a, hetih chhung zawng hian ka nu chuan chhumlo chatloin min awmpui a, ka tan bang lovin a tawngtai reng bawk a, Pathianin doctorte kaltlangin min ti dam a, ka rilru zawng zawngin kawngdik chu pensan ka tum tawhlo ani.

Tunah chuan Pasal tha tak Pathianin min pe a, ani nena kan in tawndan ringawt pawh tam tak sawi tur a awm ngei ang, Pathian thatna leh min hmangaih na nasat zia pawh ka pasal hmangin Pathianin min hriat tir ni maiin ka hre hial thin..

Damdawi In atanga kan chhuak chu kan khaw lamah ka nu rualin ka haw a, engemaw chen an bula ka chen hnuin ka fate 2 nen Ka nutei te khua ah In kan luah a, dawr siamin chu chu eizawn nan kan hmang a..

Chutah chuan nun tharin bul ka tan a, diktak chuan ka parawn te nena chenho chu a rem chiah silo va, ka nu chuan min ngaihtuah hle tih ka hria, mahse min ring turin ka ti a, tawngtaina nen min thlah thlap a.. Keipawn theih tawp tak meuhin suala ka tluk luh leh loh nan ka tawngtai tam khawp mai.. Pathian Zahngaihna leh khawngaihna ka chan te hi ka phulo takzet ani. Mahse misual simte ngaidam thintu Pathian hnenah ka thhnlung zawng zawng ka pe ani.

Ka thiltawn rapthlak leh ka hringnun zahpuiawm zet hi ngaihnawm tiin chhiar liam ngawt lo turin ka duh che a, mite hnena sawi atan phei chuan thil zahthlak leh mualphona ani tih ka hria.. Mahse, enganga sual pawh ni ila, lung chhira kan sim chuan Pathian chuan kan lamah ban a phar reng a, engtik lai pawn ani chuan min duh ani tih hi ka nun atanga chiang taka ka sawi ngam ani..

Hreawm ka tihna ber chu ka pasal tana fa ka neih thei tawhlo hi a ni a. Kei leh ka fapa min enkawlna avang tal pawn atan fa pakhat tal hrinsak ka chak thin, fa hi a awt ve em em a, mahse kei fa nei thei ka ni tawh silo, a chang chuan fiamthu ti tak deuh hian 'midang lakah fa nei la, kan enkawl anga, ka fa ang chiahin ka enkawl ang' ka ti thin a, ani lah chuan 'i ti duhdah palh ang? Bawiha te hi an tawk chiah' tiin ka rilru hreawm hi a hlau em em thin..

Tichuan nun thar neiin, ka tunhma nun theihnghilh ka duh em em thin te chu hrechhuakin min tibuai fo thin mahse, dam takin kan nung chho ve bek bek a, Duhthusam ang diak diakin kal theilo mah ila, kan dawr siamah chuan kan pa nen kan tui bawk a, Dawr pawh kan ti lian sawt khawp mai, thawmhnaw thlengin kan zuar chho a, Pathian zarah kan hlawkin kan tluang ve em em a, tichuan mihring duhâm reng reng ta chu Aizawlah nge nge a hlawk lehzual ang tiin kan pem thla ta a, Pathian malsawmna changin kan tluang khawp mai..

Hei, tunah chuan hlim takin ka pasal leh fate nen kan khawsa ve ta a.. Theihtawka a rawng ka bawl sak Pathian hian a mite kal tlangin Malsawmna chhiar sên loh min vur ani.. A mite tana ui nei ngailo tu ka Lalpa hausak zia hi ka sawifiah zo lova, a ngilneih zia leh that zia te hi ka hrilh fiah thiamlo zawk ani..

Lalpan Malsawm Che Rawh Se.

Ka Lawm E.

-  By Tei Aries Hmar