Mizoram pumah World Rabies Day, 2025 hmang

Aizawl | Sept 27, 2025: AH & Vety Department, Mizoram State Veterinary Council (MSVC) leh Indian Veterinary Association (IVA), Mizoramte tangkawp buatsaihin vawiin khan Ui â hri venna ni, 'World Rabies Day, 2025' chu Mizoram pumah hman a ni.

He ni puala State Veterinary Polyclinic Hospital, Khatla, Aizawla hun hman, Dr. M. Zohmingthangi, Addl. Director (VS&PH), Ah&Vety. Dept. kaihhruaiah Mizoram State Veterinary Council President Dr. Lalremliana chuan ui â hri (rabies) chu natna hri hlauhawm tak a nih avanga vaccine tha taka lak a pawimawh thu a sawi a. Rabies chu a vei tawhte'n an thihpui ngei ngei thina ngaih a nih thu leh dam chhuak sawi tur tlemte chuah an la awm thu sawiin, ram changkangah chuan he hri hi an buaipui vak tawh loh laiin, Asia leh Africa ramah chuan mi tam takin an la thihpui a, abikin ui seh avangin case a la tam phah hle a ni, a ti bawk.

Dr Lalremliana chuan khawlaiah neitu nei lo ui chhuak an awm loh avangte, vaccine pek kan ngaihpawimawh avangte leh Veterinary ni pawimawh bikah free vaccination leh health camp-te tha taka kalpui thin a nih avangtein Mizoramin rabies nuai bo theihna kawng kan la neih that hle thu a sawi a. Kumin atana thupui thlan 'Act Now: Me, You, Community' tih chu sawizauin, tlai khawmuang lova kan zavaia kan tanrual phawt chuan ui â hri tihbaiawm tak rabies hi kan um bo thei dawn a ni, a ti bawk.

Indian Veterinary Association, Mizoram President Dr. Robert Rualthankhuma pawhin Animal Feed Plant, Ramrikawna hun hmanah World Rabies Day lo chhuah dan chanchin tlangpui tarlangin, India ram pumah kum 2030 ral hma ngeia Ui â hri nuaibo tuma theihtawp chhuah a nih thu a sawi a. Ui â hri nuaibo turin ui vaccine pek mai bakah uiin a seh te'n hri venna vaccine an lak nghal thuai a tul thu a sawi bawk.

Kumin World Rabies Day thupui atan hian 'Act Now: You, Me, Community' tih chu hman niin, Aizawl District-a hmun pathum - State Veterinary Polyclinic Hospital, Khatla, Zemabawk North YMA Hall leh Animal Feed Plant, Ramrikawn bakah District Vety. Hospital tinahte hun hman niin, a thlawna ui â hri venna vaccine (anti-rabies vaccine) pek beihpui thlak a ni a. World Rabies Day pual hian Mizoram pumah ui 2,600 te hri venna pek an ni a. He ni pual vek hian TV lamah mithiamte'n sawi hona 'Panel Discussion' hlawk thlak tak an nei tawh bawk a ni.

Wolrd Rabies Day hi Anti-Rabies Vaccine (ARV) hmuchhuaktu, Louis Pasteur thih champhaphak pualin kum 2007 atang khan kum tin September ni 28 ah hman thin ni mah se, kumin hi Pathianni a nih avangin vawiin Inrinni, September ni 27 hian hman a ni.