Saudi Arabian thiltithei leh Promoter lar hmaah Dinsanga a inlan dawn

Aizawl | August 15, 2025: Saudi Arabia-in sum tam tak sengin khawvela infiamna lian an la lut nasa a, a bikin professional boxing huang chhungah Riyadh chu hmunpui ber leh sum tamnaah an siam.

Kingdom Arena, Riyadh-ah a vawi khat nan zirtawpni chhun dar 1 atanga tlai dar 5 thlengin Boxraw Sparring Club buatsaih a ni dawn a, Battle in the Kingdom tiin a hming an phuah.

Professional boxing danin an inhnek dawn a, mahse, sparring a nih avangin a chak zawk leh chak lo zawk puan a ni dawn lo va, ennawm leh fighter um zui tlak zawnna a ni ang.

Sparring tur zingah hian Laldinsanga a tel. A tan hun ṭha a ni dawn a, a hmuna inhnek en tura an sawm bik zingah British promoter lar leh inel tak Frank Warren leh Eddie Hearn telin, an hnuaia awm zui tur an ngaihven dawn.

An ngaih pawimawh ber erawh Turki Alalshikh a ni thung. Amah hi Saudi Arabia rama khawvel infiamna lian pawt luttu General Entertainment Authority chairman a ni a, Islamic Solidarity Sports Federation chairman a ni bawk.

Nikum khan American boxing promoter Oscar de la Hoya kut aṭangin dollar maktaduai 10-in professional boxing huanga awmze nei tak Ring Magazine a lei leh nghal.

Mi thiltithei Alalshikh hian a hmunah fighter-te inhnek a en dawn tih an sawi a, chu chuan Boxraw Sparring Club boruak a tilian. Dinsanga telna he inhnek fiamnaah hian mittlung a hmu a nih chuan, September 13 khian Las Vegas-ah undisputed super middleweight title inchuhin Canelo Alvarez leh Terrence Crawford an innuai dawn a, Alalshikh hian an thlazar hnuaia inhnek tur a thlang nghal dawn a ni.

Middle East huam chhunga Arab boxer-te tan deuh bik huaihawt ni mah se, WBC Youth super bantamweight champion Dinsanga bakah Ukraine, Uganda leh ram dang aṭangin inlan thei tur an thlang tel bawk.

Inelna tak tak ni lo mah se Ramthar Veng, Lunglei tlangval tan a hma lam hun hril thei inhnek pawimawh a ni chiang a; coach Sete Lalchhuanawma nen fehchhuakin bialtu MLA Pi Lalrinpuii'n senso a tumsak a ni.

Pro boxing vawi 12 a khel tawhah Dinsanga'n hnehna chang vekin knockout hmangin ṭum sarih a chak a; kuminah vawi thum inhnek tawhin Sarawut Jiamthong, Bryan James Wild leh GuiMing Li a hneh.