Mizo Talent a hmunah a thlawnin a chhim theih!

Aizawl | August 15, 2025: LPS Vision Production buatsaih 'Mahindra XUV 3XO Mizo Talent' Top 30 round intihsiakna zan hmasa ber atangin LPS Arena, Falkand ah mipui pungkhawm an tam a, a thlawnin show hi a chhim theih zel.

Top 30 round intihsiakna hi zan thum neih tur a ni a, a zan hmasa ber Ningani zana intihsiakna neihah Contestant te an che tha hle a, mi 10 an in lan a. An zingah Lam thiam ngaihzawn rawn Venglai East, Kolasib nula Lucy Lalthazuali a che tha leh hle a, LPS Arena chhungah thawmah kut beng thawm a ring a, Judge te pawhin Lucy-i an fak a, Mapuia'n a T-Shirt hmaah "I hmel khan enge a entir i hria em? 'Tha' tih a en tir" tih inziahna a hak chu Lucy-i a comment zawhah ti langin a dinpui a, Social Media ah an thehdarh nasa leh tawh hle.

Top 30 round intihsiakna zan hmasa berah hian Acrobatic thiam Margareth-i che tla in mit a ti tlai tak zet a, In prank na ropui a thleng a, Contestant zinga mi 2MG (2 Magician) te an in lan a, Magic an show ah tih dik tawk lo, predict dik lo awm palh angin an lantir phawt a, Judge in comment an pek hnuah an predict zia an lantir leh si a, Judge Comment ah pawh thu han in hmu lo deuh te a awm phah a, Judge te an prank tur hi Chief Organizer hnenah an thlen leh an dik lawk a nih thu show kal lai mek hian Judge ten an hre chauh a, mipui hlawm a hlawhin, show a ti hmuhnawm phah hle.

Hming mala tarlan te bakah Contestant dangte pawh an che tha tlang a, round sang a ni tawh bawk a, contestant te an tang tih an perform dan atangin a hriat a. Intihsiakna hmuna entute pawhin zawng chhang thlak an ti a, Mizorama en tur awm zen zen lo Talent hmuhnawm tak tak a hmun ngeia en chu man hla an ti hle.

Top 30 round intihsiakna hi zanin dar 8-ah LPS Arena, Falkland ah neih chhunzawm leh a ni anga, intihsiakna neihna hmunah mipui tan a chhim theih a, ticket ngai loin a thlawnin show hmuhnawm a thlir theih dawh. TV lama en duh tan LPS 1 ah Live in pek chhuah a ni anga, Youtube-ah Live tel bawk a ni anga, Member nih erawh a ngai dawn thung.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]