KHAWVEL KEHSAWM KARA BEISEINA

_I Khawthlir Dan Thlak_

- Rick Warren

- Aug 19, 2025

“Mi thenkhatin muanga an ruat angin Lalpa chu a thutiam kawngah chuan a muang lo ve; tuma boral duh lova, mi zawng zawng lo sim duhin, nangmahni lamah a dawhthei a ni zawk e.” 2 Petera 3:9

Pathianin khawvel a thlir a, khawvelah sualna tamtak a hmu a ni, nimahsela khawvel chu engvangin a la awmtir zel? Khawvel tihtawp theihna a nei reng a. Khawvel kehchhe tawh chu engvangin nge a la awmtir zel le?

Khawvel chu kehsawm tawh mahse, Pathian chuan ala thunun reng a, khawvel chanchin hi a la inziak reng a, a vawrtawp a thleng ṭep tawh a ni.

Bible-in 2 Petera 3:9, “Mi thenkhatin muanga an ruat angin Lalpa chu a thutiam kawngah chuan a muang lo ve; tuma boral duh lova, mi zawng zawng lo sim duhin, nangmahni lamah a dawhthei a ni zawk e.” 

Khawvela hrehawmna zawng zawngte hi a hmuh hmaih lo a, dawhthei takin a en a ni. Engvang nge? Miten Isua chu Lal leh Chhandamtua an pawm hun tur nghakin a thlir zawk a ni. Mi zawng zawng hi - nangmah tiamin, Pathian chhungte ni vek se tih a duh a ni.

Pathian chhungte ah i tel ve anih chuan, mi zawng zawng chu Pathian chhungte an nih ve theihna turin Chanchin Ṭha chu hrilh ve turin a duh che a ni. Mi tam zawkin Pathian khawngaihna an dawn theihna turin Pathianin a nghak mek a ni zawk.

Mi ṭhenkhat chuan, “Pathian ngawi reng, che miah lo, a fate rum leh ṭap pawh ngaithla lo hi chu ka ring thei lo,” an ti a. Chutiang Pathian chu engtin nge kan awih theih ang an ti a ni!

Pathian thilsiam mihring fate intichhe tawn rengte a hmuh hian Pathian chu a ṭap ang tih ka ring a. Kan Pathian hian engtikniah emaw chuan sualna leh a kawng zawhte hi a la tihtawp sak ka ring a ni. Bible chuan sualna leh thil ṭha lo zawng zawngte rorelsak hun ala awm dawn a ti a ni.

Nimahsela chanchin ṭha a awm e: Isua chu Chhandamtua i pawm chuan engmah hlauh tur a awm lo. Bible chuan, “Chutichuan tunah zawng Krista Isuaa awmte tan chuan thiam loh chantirna reng a awm tawh lo.” (Rom 8:1). Chumi awmzia chu, Pathian hmaa i din hunah chuan i zak lo ang a, i zam bawk hek lo ang. Krawsa Isua hnathawh zawhsa avangin Pathian khawngaihna hnuai ah, ngaihdam vek ni tawhin i ding dawn a ni.

Khawvel chu a kehsawm tawh ngei mai a, sualna hrang hrang pawh a awm ngei mai - nimahsela Pathianin ala thunun a ni. Khawvel pumpui hi a kutah ala awm a ni. Amah kan thlan theihna turin leh a hmangaihna chu midang kan hrilh ve theihna turin hun tlemte min la pe a ni zawk.

Engnge ila nghah cheu?

Ngaihtuah zui atan

* La hre ve lo te hnena chanchin ṭha hrilh chu a hmanhmawh thlak i ti em? Engvang nge, engnge a chhan?

* Naktukah hian Isua chu khawvelah lo kal dawn ta ang sela, vawiinah hian tunge chanchin ṭha i hrilh ang?

* Pathianin khawvel a thlir hian engtin nge a rilru i hriat theih?

*Isua chu Lal leh Chhandamtua pawm turin i rawn penchhuak ngam em?*

Isua chu i nunah ila sawm ngai lo anih chuan, chu hun ṭha chu i neih ka duh a ni. Pathian hnenah chuan Isua kaltlanga chhandamna thutiam chu i ring a ni tih ṭawngṭaiin hrilh ang che:

“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.

 

“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamtu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”

 

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zin kawng atana thuziak pawimawh tak tak lo thawn che ka duh a ni.

*[Lettu: Sangpuia]*