"Ka ngaihpawimawh hmasak chu zirna leh hriselna lama hmasawnna - Rîk vut vut theih loh mahse kan ti chho ve zel,"

Aizawl | August 16, 2025: Mizo Zirlai Pawl (MZP) Sub-Hqrs, Sesawng chuan vawiin chawhma dar 10:00 khan Community Hall, Sesawng-ah 'Zirlai Pass thar Lawmpuina' hun an buatsaih a, Speaker Lalbiakzâma'n khuallian niin, MZP General Headquaters, Aizawl President H Lalthianghlima chu uaptu nii hun an hmanpui.

Khuallian Lalbiakzama chuan, "Ka ngaihpawimawh hmasak chu zirna leh hriselna lam a hmasawnna a ni a. Rîk vut vut theih loh mahse kan ti chho ve zel a. School building sak leh thawm ṭhat, Zirtirtu lâk, casual nurse leh Lab Technician lak, indaihloh bikna hmuna zirtirtu rawih belh leh hriselna lam thawktu nei ve lo khaw 4 ah MLA Fund hmanga Health Worker leh Health Attendant rawih te, damdawiin quarters sak te, morgue house sak te, bial chhung damdawiin 2 a X-Ray khawl MLA Fund a lei te hi hriselna leh zirna lama kan hmalakna langsar zual a ni a, hmachhawp lian tak tak kan nei mek a ni," a ti a. Zirlaite fuihna thu ṭha tak a sawi bawk.

MZP President pawhin thu sawiin, Mizoram aṭanga UPSC Exam-ah kan inziah tlin lohna a rei ta hlê a, UPSC Exam hrang hranga kan inziah tlin theih nan UPSC Coaching sponsor tûr North East Students' Organisation(NESO) leh MZP nen ṭangkawpin mi-2 sponsor tûr ni 18–25 August,2025 chhûnga an thlan tûr a nih thu a sawi a.

Kan lehkha zir dân a nuam tawh hlê a, ram leh hnam tan theitawp chhuah a, UPSC-a inziah tlin ngei tuma rawn bei turin zirlaite a fuih bawk.

MZP President chuan, "Hmeichhia te hi chhungkaw inngahna an ni chhoh mek ta a, mipate kan ṭan a ngai hlê, mipa te hian innghahna tlak ni tura tan kan lakthar angai takzet a ni " a tibawk.

Ruihhlo a hluar hlê a, zûk leh hmuam vawi khat tihchhin a pawizia hre reng chunga tive chhin lo turin zirlai kalkhawmte a chah bawk.

He hunah hian Lawmpuina hi HSLC – 37, HSSLC – 39, UG — 10, PG — 3 leh Sesawng aṭanga MPSC (CSE) 2024-a MCS inziak tling Lawrence Lalhlânthara te hnênah Lawmpuina thuziak an hlân.

Hun Khatna hi lawmpuina hlan leh thusawi hrang hrang ngaihthlak a ni a. Hun Hnihna-ah hian Sesawng tlangval Hnahthial SDC ni mek Lawrence Lalhlanthara, MCS hovin Zirlaite nen inkawmhona an nei bawk.