BUAINA PAWH HIAN AWMZIA A NEI ṬHIN

_I Khawthlir Dan Thlak_

- Rick Warren

- Aug 18, 2025

“Nangni zawngin ka chungah thil sual tih in rilruk a; nimahsela Pathian chuan vawiin ang hian mi tam tak nungdama chhanhimna tura thil thaa chantir a rilruk zawka a lo ni si a.” Genesis 50:20

I nuna buaina tinrengte hian chhan an nei vek a. Buaina te hian awmzia an nei vek a ni.

Buaina khurpuia luh tawh hnu phei chuan, buaina lo awm chhan hmuh hi a har em em ṭhin a ni. Nimahsela buaina te chu a lo thlen hnua kan thlirlet hian Pathian hnathawh lo lang chu a hmuh theih ṭhin a ni.

Kum 1980 leh 90 chho ah khan TV show MacGyver tihchhuah a ni ṭhin. Chu ennawm a nuihzatthlakna chhan chu MacGyver-an awmlo ata awmah thil a chhuah theih zel vang a ni. Bungraw chi hrang hrang aṭangin thil ṭha deuh a siamchhuak ṭhin a ni. Thil satliah mai mai te pawh ama tan ṭangkai takah a chhuah thei ṭhin a ni. 

Pathian chu MacGyver aia pawh nasa taka themthiam zawk a ni! I nuna a ṭha lai te, a ṭha lo lai te, a na lai te, a laklawh deuh lai thleng pawhin thil ṭha zawk atan a hmang thei a ni.

I harsatna zawng zawng thlentu hi Pathian a ni lo tih hrereng rawh. Miten harsatna i chunga lo thlengte chu a ṭha lo zawngin ngai mahse, Pathian chuan a ṭha zawnga a hman ṭangkai theihna turin chung zawng zawng chu thlentir a phal a ni zawk.

Bible ah pawh entirna ṭha tak mai Josefa te chanchin aṭangin kan hmu a ni. Josefa khan harsatna hrang hrang khirh tak tak a tawk a nih kha. A unaute ngei ngeiin salah an hralh a. A pu nupui mutpui tumah puh a ni leh a. Taninah an khung hial anih kha.

Chuti chung chung pawh chuan Josefa chu rinawm takin a awm zel a. Aigupta ramah chuan lalber dawttu ah a awm phah hial a ni. Chu a dinhmun aṭang chuan an ram pumpui chu ṭam lakah a chhanchhuah phah a. Ama chhungte leh - amah hralhtu a unaute ngei pawh chu a chhanchhuah theih phah a ni.

A unaute hnenah chuan, “Nangni zawngin ka chungah thil sual tih in rilruk a; nimahsela Pathian chuan vawiin ang hian mi tam tak nungdama chhanhimna tura thil thaa chantir a rilruk zawka a lo ni si a.” Genesis 50:20. Thil ṭha lo te lo thleng mahse Pathian chuan thil ṭha zawkah a chantir thei a ni tih Josefa chuan a hrechiang hle a ni.

Nang pawh tunah hrehawm takin ila awm ve pawh a ni maithei e. I nuna engkim hi a fuhlo vel vekah i ngai a ni maithei. Miin i rilru an lo tina pawh a ni maithei. Nimahsela Pathian chuan chuta ṭang chuan thil ṭha zawk thlentir a duh a ni. I nuna harsatna keh them te chu Pathianin a hnena keng turin a duh che a ni. Chung harsatna keh them aṭang chuan thlamuanna duhawm tak a rawn thlentir thei a ni.

Pathian thiltum chu harsatna i paltlang zawng zawngte aiin a ropui zawk tih hrereng ang che. Amah i rin phawt chuan chung aṭang chuan thil ṭha zawk a rawn thlentir dawn a ni.

Ngaihtuah zui atan

* Buaina chu awmze nei zawkin Pathianin a thlentir tih engtiklai khan nge i hmuh?

* Josefa chanchin chuan engtiangin nge a fuih thar che?

* Tunah hian eng harsatnaah nge i awm? Ṭawngṭaina hun hmang la. Pathian chuan thil ṭha zawkah a chantir ang tih i ring a ni tih hrilh ang che. 

*[Lettu: Sangpuia]*