Infiammite thawhrimna chanchin ngaihnawm tarlanna lehkhabu 'Thlantui Far' tlangzarh

Aizawl | June 21, 2024: Infiammite chanchin ngaihnawm ziahna lehkhabu 'Thlantui Far' chu Sports Minister Lalnghinglova Hmar chuan a tlangzarh.

Hmangaihhlima lehkhabu ziah “Thlantui Far (Infiamna thu ngaihnawm)” hi MZP Conference Hall, Treasury Square-ah vawiin tlai dar 3:00 khan tlangzarh a ni.

Lehkhabu tlangzarh puala inkhawm tâwiah Sports Minister Pu Lalnghinglova Hmar chuan thu sawiin, khawvelin mifing a tih te chu lehkhabu chhiar tam leh chhiar zau an nih thu a sawi a. Computer, internet leh smartphone lar hnuah lehkhabu leh ziakmite hlutna tlahniam hman viau mah se, thangthar zingah lehkha chhiar taima an tam zel avangin hma a sawn chho leh mek a ni, a ti. Mizote chu eizawnna, zirna leh hnathawh kawngah hmasawn tur chuan thlantui far khawpa thawk turin kan inbuatsaih a ngaih thu a sawi bawk.

Pu Hmangaihhlima (Hmaa Hauzel) hi Aizawl Post chanchinbu-a infiamna column ziaktu a ni a. Tun hi lehkhabu pathum a tihchhuahna a ni. 'Thlantui Far' lehkhabu, phek 224 a chhahah hian thuziak tawi 35 awmin, sports discipline hrang hranga infiammi langsarte thawhrimna bakah thu bengvarthlak tak tak a awm a. Tualchhung atanga khawvel zau zawk huap infiamna chanchin langsar leh ngaihnawmte chhiar tur a awm bawk. A man hi Rs. 299 a ni. Hmaa hauzel hian, 2016 khan Zun Lengzam a tichhuak a, 2021 khan Lurhpui Mihuai tichhuak lehin, kuminah a lungthu kim nan 'Thlantui Far' hi a tichhuak leh ta a ni.

Vawiina lehkhabu tlangzarhna hi Pu Lalvansanga Pautu in a kaihruai a. Pu Lalrinliana Sailo, Asst. Leader, TSAY in hunserh hmangin, Dr. Lalbiakdiki, Asst. Professor, Mizoram Christian College in lehkhabu thlirlawkna a nei a ni. Pu Lalnuntawma Fanai pawhin thu sawiin, thlantui far a thawkte ngeiin an chanai an hmuh theih na’n a tak tak ram luhchilh a, hma la theite’n an lak a tul zia a tarlang a. "Thlan tui far lote bânah an kai leh ang tih ka hlau," a ti bawk.