TLANNA TURA TAWRHNA CHU ENGTIN NGE?

  _Tawrhna i hmachhawn laiin Pathian khawiah nge?_

By Rick Warren 

— 03/21/2023

“Pathanin keimahni min thlamuanna ngeiin hrehawm eng anga awmte pawh chu kan thlamuan ve theihna turin ani chuan kan hrehawmna zawng zawngah min thlamuan thin.” 2 Korinth 1:4

I damchhan pakhat chu midang rawngbawl hi a ni. Pathian chuan i natna kha ṭangkai taka rawng i bawlnan a hmang duha — midang dinhmun i hriattheihnan a duh bawk a ni.

Natna i tawrhna chuan midang nangmah ang bawka tuarte hriatthiamna thuk tak a neih tir che a. I natna ringawt ngaihtuah lovin,  midang natna tuarve mekte ṭanpui turin i rilru i pe nghal thei a ni.

Isuan i tawrhnate chu tlan a duh a. Tuar chunga tlanna chu i tawrhna kha midang ṭanpuina atana i hman chiah hian a ni. Chu chiah chu kei leh ka nupui Kay-i nena kan fapa mahni intihlum avanga kan tawrhna chungchanga midang ṭanpui kan tumna chu a ni. Matthew-a thihhnuah chuan kar khat pawh hi kan awllo, keimah emaw Kay-i emaw tal hi min rawn be reng maia, hmelhriat emaw hriatloh emaw, mi lar emaw larlo emaw, puitling emaw naupang emaw pawh nise an dinhmun kha kan hriatthiampui ve nia an hriat avangin an rilru a inhawnga Pathian Thu kan hrilh theih phah a ni. 

Bible chuan, “Pathianin keimahni min thlamuanna ngeiin hrehawm eng anga awmte pawh chu kan thlamuan ve theihna turin ani chuan kan hrehawmna zawng zawngah min thlamuan thin, Krista tuarnate chu kan chunga achuang aliam ang tak hian, kan thlamuanna hi Krista zarah achuang aliam a ni. Nimahsela, hrehawma kan awm leh, nangmahni thlamuanna tur leh chhandamna tur a ni a; thlamuana kan awm leh, nangmahni thlamuan vena tur a ni a, chu chuan kan hrehawm tuar bawk hi chhel taka in tuarnaah chuan a thawk thin a ni”a ti. (2 Korinth 1:4-6).

Nu leh Pa an fa hloh tawh hnem turin Nu leh Pa an fa hloh ve tho aia ṭha tunge awm chuang? Ngawlvei mek ṭanpui turin ngawlvei tawh aia ṭha tu nge awm chuang? Canver vei mek ṭanpui turin Canver lo vei ve tawh aia ṭha tu nge awm chuang?

Eng na pawh chu lo tuar mahla, i inpek phawt chuan Pathianin midang ṭanpui nan a hmang duh a ni.

Ngaihtuah zui atan

* Eng natna i tawrh kha nge Pathianin midang ṭanpui nana a hman i rin?

* Engti zawngin nge tawrhna chuan dawhtheihna a neih tir che? Chuti zawng chuan nangmahah a thawklo a nih chuan, eng natna pawh tuar la, Pathian hnenah tawrhna aṭanga dawhtheihna dan zir i dil dawnia (2 Korinth 1:6).

* Nangmah ang tho natna tuar ve i hmuh theihnan Pathian dil la. Tichuan, chu nen chuan a ruala ke in pen theihnan leh thlamuanna a neih theihnan Pathian dilsak rawh.

*“Vawiin hian Isua i zui dawn em?”*

Pathianin a thatna chu Fapa, Isua Krista kaltlangin a tilang tawh a. Bible chuan, “Pathianin khawvel a hmangaih em em a: Chutichuan a Fapa mal neihchhun a pe a, amah chu tupawh a ring apiang an boral lohva chatuana nunna an neih zawkna turin” a ti. Johana 3:16

Chatuana in nun theihnana Pathian thutiam chu ringturin i inpeih em? I inpeih anih chuan, hetiang hian tawngtai rawh: “Ka sualnate ka puang a, ka Lalpa leh Chhandamtu atan Isua hi ka pawm e. I hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin Isua hmingin ka dil a che. Amen”

Hetianga i tawngtai a nih chuan, Rick@PastorRick.com ah hian emai min lo thawn la. Isua nena zinkawng i zawhtanna atana pawimawh te a thlawnin ka lo thawn ang che.

*[Lettu: Sangpuia]*