Serchhip-ah Zalenna sualtute chawimawin hun hmang

Serchhip | Nov 15, 2022: Tukin zing dar 6:00 AM khan India ram zalenna sualtute chawimawina kawngzawh leh lam Serchhipah Bawrhsap Pi Nazuk Kumar hovin buatsaih a ni.


Kawngzawh bul tanna hi DC Office tual atanga neih niin Pi Nazuk Kumarin thusawi tawi a nei hmasa a. Kan ramin zalenna kan neih theih nana beitu ram pum huapa mi langsar tak takte kan hriain kan chawimawi thin a, nimahsela India ram hmun tinrengah, hnam hrang hrang zingah mahni nunna thapa zalenna sualtu mi chhuanawm tak tak tam tak kan nei a ni.


Chung hnam tenau zawk leh tribal te zinga Zalenna sualtu mi huaisen tak takte chawimawina ni atan chuan sawrkar laipuiin vawiin ni November ni 15 hi a ruat a, Janjatiya Gaurav Divas tiin Serchhipah pawh kan hmang ta a ni. Mizote zingah pawh zalenna sualtu mi engemawzat kan nei a, vawiinah hian chung mite zahna leh chawimawina ni kan hmang a ni, tiin he ni an hman chhan hi a sawi a. Anni hote inpekna zarah vawiinah hlim takin, zalen takin nun kan hmang thei ta a ni tih hrerengin zalenna min sual chhuah saktute i zahin i chawimawi zel ang u, tiin Serchhip mipuite a sawm a. Kawngzawh tura kalkhawm college zirlai naupangte chu Mizo lal huaisen leh pasaltha, India ramin zalenna a hmuh theih nana beitute chanchin chhuang taka mite hnena sawi thin turin a chah a ni.


Tukina Mizo India zalenna sualtute chawimawina niah hian zalenna sualtu mi sawm leh pahnihte chanchin inziahna banner pahnih buatsaih a ni a, an chanchin tawi chhiarchhuah a ni bawk. Chung mite chu; 1. Ropuiliani, Denlung lalnu 2. Lalburha, Sesawng/Vanchengpui lal 3. Kalkhama, Sentlang/Nisapui lal 4. Thanruma, Aizawl/ Tanhril lal 5. Bengkhuaia, Sailam lal 6. Lalsuthlaha 7. Hausata, Kulhrulh lal 8. Zakapa, Khawhai lal, 9. Nikuala, Chawngtlai lal, 10. Pasaltha Khuangchera, Reiek, 11. Pasaltha Ngurbawnga, Reiek leh 12. Pasaltha Saithawma, Mualvum te an ni.


Kawngzawh hi New Serchhip College peng thleng neih a ni a, College pengah hian Govt. Serchhip College zirlai naupangte zalenna sualtute zahna leh chawimawi nan hnam lam an entir a ni.




(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)

Post a Comment

He post chungchanga i ngaihdan lo sawi ve rawh:

Previous Post Next Post