LEHKHATHAWN

- Lars Lalduhawma Malsawm

.

Bawiha,

Hlun lo khawvela awm kan nih avangin, kâwla ni lo chhuak kan chhiar hnuhnun ber apiang hi kan tâna 'hun ṭha ber' a ni a. He hun ṭha bawhpelhtute chu hunin a bawh beh hun a thleng nge nge ṭhin. I vawiin hi i neih chhun a ni tih hria la, nimin lungngaihna leh naktuk lungkham luatnain tih buaitîr ngai suh ang che.

'Hun leh tuilianin tu mah a nghak lo' tih hi thu dik a ni; mahse, hei vang ngawt hian i nun zin kawngah hmanhmawh lutuk phah lo la ka duh a. He i khual zinna ramah hian 'chawl hahdam nun' i neih theih nân, pârzu dáwt phengphelep leh khawivah hlim thawm te hre turin i thinlung kha hawng la, buai bubit kârah pawh hun thawl insiam ṭhin ang che.

.

Zîng ni chhuakin a chhun tlêt sep sep daifîm mawina te hlut thiamin, tlaizawng pâr leh sik leh sa inkungkaihna te bel chiang la. Kiltheihrawk hram hun leh nungchate khawvel inlaichin dan te hi hriat fiah ngei tum la ka duh bawk. Hmanhmawh luat zawng awmzia a awm lo — muangmara i kal paw'n i nun kawlkil i ban hman tho dawn si a!

.

Changkanna khawvelah thiam finna faisa ringin awm mah ila, 'lampui châng khatah mi an be chhe ngai lo' tih hi kan chenna bîk khawvelah hi chuan thu dik a la ni fan a. Khawi ilo i chhuah vahnaah hawihawm tak leh zawldawh takin awm la, hlim hmel puin mi tu pawh chhawn ṭhin ang che.  Chu'ng thil tè tham tak anga lang chu, man bithliah awm ve lo mah se, nun rohlu a ni a. Mi dang tâna khawpui ri leh ṭek ṭihbaiawm nih ai chuan, an tâna chhimbal mawi tak nih tum tlat ang che.

.

Hringnun hi tuipui zau taka lawngleng ang a ni a. Tui fawn satliah leh thliin a beng kalna lam apianga i inher kual lohna'n lawng karfung chu chelh tlat la, thlipui leh tui fawn inchhawk hlup hlup kârah pawh i tum ram i thlen ngei theih nan chhel tak leh huai takin inkar ṭang ṭang ang che. Nun ṭhuthluang mai zawngin hmasawnna a thlen lo a; nun kuangkuah ringawt hian mawina reng a nei hek lo.

.

Hausak leh nawmsak tuma mi an intlansiakna khawvela awm ni mah la, 'Lâk aiin pêkin lukhawng a nei zawk' tih thufing hi vawng reng la ka duh. I dawn aiin i pêk chhuah te hi i tân a hlu zawk a ni tih zir thiam turin pe fo rawh — hrehawm i tih hun a thlen paw'n pe zel rawh. I dam chhung hian i theih anga tam thawk chhuak la, i phal ang tawk khawl khawm la, i neihin a tlin ang tawk a thlawnin sem chhuak bawk ang che. I nawmsak phah ang zawng ka ti ngam lo; mahse, i hausak phah ang tih erawh ka chiang — Nun hlimna hi suma lei theih loh hausakna hlu ber a ni si a.

.

Hnung lam hawi reng chuan nghâwng a na ṭhin angin, i vawiinah i nun hluiin i ngaihtuahna luah fo suh se — siam ṭhat theih tawh loh avanga inchhirna hian natna mai a thlen si a. Mi dang chunga ngilneihna kan lantir theihna'n mahni inngaihdam ṭhin hi a pawimawh a ni tih hria la, i thil tih sual avanga indawm kun mai lovin mahni inngaidam ṭhin ang che. Danglamna thlentir theitu chu nangmah kha i ni tih hria la, hma lam i panna turah eng mah inchelh dintîr suh aw.

.

A tawp berah chuan, ka fapa, he i khualzin kawng hi nuam i ti lo a nih chuan, thlarau khawvela i thlen in tur chu nuam i ti dawn lo tih hria la. Thlen in nuama thleng thei ngei turin hun leh nun vui liam ang che.

.

Kum 15 zet i lo ni ve ta reng mai, i puitling takzet ta. Pian cham lawmpuina leh duhsakna vohbik chibai le.

I pa

.

[Ngawlvei titi]

06042015