Aw Bangalore!

- K Remruatfela

Columnist, EXPLORE MIZORAM

Nizan ka menrei deuh avangin chawhnu her lam deuhah Chamber ka thleng ve hman hram a. Hnathawk tan tura ka han insingsa mar chu ka dawhkan hnuai kil sir tê ah hian thil fun kâwm eng hi a lo let bal mai a. Chu thil fûn chuan engemaw tak hian ka rilru kap rùk tlatna a neih avang chuan chu thil chu eng nge ni tehreng tih ka han chian a, a zâwn ka thleng, ka han hâilet chu, eng dang ni lovin, rin loh lam daihin ka lung tileng em em thin, 'lore khawpui Zofate sulhnu phochhuahna - *BMA Chhinlung Magazine 2019 - 2020* ngei mai hi a lo ni a. Lâwm avanga mittui tla chungin chu Chhinlung Magazine ngei mai chu ka dawhkan hmun zau remchang tha ber laiah chuan ka dah chho ta a.

Chutah phur zet hian a tuamna kâwm chu ka han  pawtthler nghal zung zung a, chhiar theihin ka kheh hawng ta tihah a chhûng chu ka han keu nghal vat a, phek dang ka keu hma hauhin phek 7-na tak chu ka han keu fuh chat a, *Thu thlurbing huanga* item 15-na ka han bih chuan ka kutchhuak tlâwm tak pawh a lo awm ve bal mai a, phu lo ka intiin ka lawmna a van zual phah tehlul em! Kum 6 zet ka chhuahsan tawh hnu pawha Bangalore Mizoten kei tehlul min lo la hre ve reng tih ka hriat hian lawm avangin ka biangah mittui a luang lo chauh a ni. Ni e, a ni alawm, Bangalore zet hi chu nun awmzia engkim ka zirchhuahna a nih avangin ka thinlungah hian a bet tlat tawh a, a hming lam rik ringawt pawh hian  ka thinlung a khawih a, a chhunga chêng thenrual duh tak takte che tla vel han hmuh phei hi chuan taksa pum hi a fan chhuak nghal thei a, a mur hian kan mur chem chem a ni ber mai. Theih ni se, hun kal tawh te pawhkir a, he 'lore khawpui ngeia hringnun han chhiar chhoh leh mai te hi ka châk rum rum thin. Kan hun lai zawng zawngte kha khuarei an lo chang ta mai si a...

Tichuan, a bu chhûng chu ka han keu zel a, phek tin mai chu mittla lêk lo hian ka ching kual vel a. Hetiang anga reng renga Magazine changkâng leh hâwlkim, lungti lêng bawk si hi thil dang a awm leh thei chuang dâwn em ni ka ti hial mai! Thlalak ho mawlh mai hian lunglen a chawk tho a, suangtuahna khawvelah min chên tir a,  sulhnu min chhui lêt tir bawk a. Nimahsela, koh kir leh theih tawh lo tur nunhlui zûnzâmin mittui a ko dâwn tlata ka hriat avangin, chutia Client te hmaa rawmal han sâwr mai chu thil tih chi a ni va dâwn lo ve aw..., a la hun rih lo a ni tiin a phek tâwp lam chu ka keu leh ngam ta thlâwt lo va. Ui tak chungin ka khup ta a, zâna chhiar chhunzawm leh turin ka ak haw ta zâwk a.

In ka thlen veleh chuan ka inthlâk nghal sawk sawk a, hmabâk nghahhlehawm tak nei tih hai rual loh hian ka che nghal vat vat a. Chutia tha tho taka min awm tir tu chu, engdang ni lovin he *Chhinlung Magazine* bawk hi a ni. Tichuan, ka han inthlâk zo chu, tlaia ka keu hmabâk chu ka han keu leh nghal vat a. College hrang hranga Mizo awmte thlalâk chuanna chu ka keu chhuak ta mawlh mawlh a. Khawi phêk takah chuan nge, ka hmangaih *KLE College Mizote* chuanna hi a lang ve ang tiin phur takin ka keu phei sawk sawk a. Nimahsela, ka duh tak ka keu fuh hmain a phek tâwp ka keu thleng ta mai... Ka keu sual a ni ang tiin ka han keu tha leh a. Mahseeeee...ka keu chhuak thei ta reng reng chuang hauh lo! Khawnge KLE Mizote kha an awm tâk tiin rilruin ârbo a zawng tak meuh meuh mai. Thla an lâk ve hman loh vanga lang ve ta lo mai nge lang tham khawp Mizo an awm ve ta lo zâwk tih chu ka hre hauh lova. Amaherawhchu, kan luh ve lai kha chuan KLE Mizote tel ve lohna kha chu a khingbâi ru riau thin asin le, tunah zawng KLE hian a vánglai a lo pel ve ta em ni, 'aw khawiah nge an awm ka lenrual lungduh te kha' ka ti ve ta vawng vawng mai. Bangalore zûnzâm zet hi zawng tawrh zawh a lo har a nih hi! Khâng kan hlim lài ni zawng zawng te kha koh kir leh theih ni se ka van ti tehlul em! Kan nun khuarei an lo chang mai tur hi dâwnin lung rêng a áwi lo ve.

Aw Bangalore! Aw Bangalore..