GANC Political Science Study Tour

- ✍🏻 Vidpuia Hrahsel

Columnist,

exploremizoram.com

Govt.Aizawl North College a zirlai, VI Semester Department of Political Science, Class of 2019 te chuan May ni 28 atanga May ni 31 chhung khan Shillong leh Guwahati ah Study tour kan nei a, kan class hi kan vaiin mi 87 kan ni a, mahse he tour a zin zawng zawng zat hi mi kan vaiin mi 35 kan ni a. Sir Jerome K.Lalthanzama (Asst. Professor) in min ho a, kan college a zirlai hi a tam zawk thingtlang a awm kan nih avangin, chhan hrang hrang vangin kan vaiin kan zin thei lo erawh pawi kan ti hle. A kal te chuan hun hlimawm tak tak leh thil chhinchhiah tlak tak tak kan hmu in kan tawng a, kan hringnun lehkhabu phek engemawzat chu he kan zinna  hian a luah ngei ka ring.

May ni 28 chawhnu dar 2:00 p.m. ah college kawt atanga chhuak tur kan ni a, dar 1:00 p.m. aṭangin college ah kan thleng ṭan tawh a, kan va phur tak em, common room ah carrom board te kan han pen leh te te a, dar 2:00 p.m. rik dawn ah, college principal Pu.Vanlalduha'n ṭawngṭaina in min thlahliam a, kan department H.O.D. Miss Ramhmangaihi leh Miss Lalhmingliani (Asso. Professor) ten min thlahliam a ni.

Sawi tawh angin, he tour a zin te hi, mizoram la pel lo hi a tam zawk kan ni a, kan phur dan tur chu in hriatthiam mai ka ring.

He tour kan neih theih nan hian kan class hian kumtir aṭangin theih ang ang in kan inhlawh ve a, Class CR te inpekna leh department professor ten min ṭawiawm ṭhat vang leh min duhsakna avangin kan duhthusam kan ti hlawhtling thei a, class ṭanrualna vang pawh kan ti thei ang chu. A theih ang angin sawi lan loh theihloh chu kan department professor te hian kan tan ṭhahnem an ngai em em a, Sir Hmanmawia leh Miss Hmingi ten exam zawh ah inhlawhna te min siamsak a, miss rami'n min sponsor bawk a, sir jerome-a pawh buai chung chungin min zinpui a, a inseng thei ang zawng zawng chu kan zin chhung hian kan tan a in seng a ni. Kan professor te hian an fate ang tak tak in min enkawl a, kan ṭhatna an duh a, an mi enkawlna hi engtikah nge kan rulh sen dawn ni? tiin ka ngaihtuah thin.

Sam 37:5 thu :-

Aizawl aṭangin kan chhuk zel a, harsatna awm em em lovin, vairengte ah zanriah kan ei a, zanriah kan ei zawh hnu in bus ah kan chuang leh ta sap sap a, kan tum ram lam panin kan chhuak leh ta, zing a lo ni a, dar 7:00 a.m. a rik meuh chuan kan thlenna tur Michaels Home Guwahati kan thleng der mai, he home ah hian mipa zawng kan thleng a, tluang takin kan thleng thei kha a va lawmawm tak em, kan thlenna tur hi atirah chuan Mizoram House a thlen tum kan ni a, mahse zirlai admission tih hun anih avangin, sir jerome-a a lo buai hman hle a  , sir jerome -a'n kan thlenna tur a lo tifel vek hman a, a chungah kan lawm hle. Sir Jerome-a hi kan rualin a chhuk lo a, kan zin hma in a lo chhuk lawk a, kan thlen hma a, a rilru buai dan tur zia kha!

Sam 37 :5

 I awm dan tûr chu LALPA chungah nghat la; Amah chu ring la, aman a ti vek ang.

he chang thu hian a thlamuan hneh hle a, keini engmah hre lawk lova bus a kan chuan laiin, sir a lo buai em em a. Pathian in a manganna te a ṭawngṭaina a chhan avangin rilru buai takin kan tan a ṭawngṭai a, a ṭhatna hi kan rul seng kher lovang.

Tichuan Home ah te kan indah fel a, hmeichhe ho zawng Synod House ah an thleng thung. Kan indah fel a, tukṭhuan kan ei zawh hnuin  khualzin te leh India ram hmun hrang hrang a, intihhlimna hun miten an tlawh nasat em em ACCOLAND lama kal turin kan inbuatsaih a, hemi ni hi kan theihnghilh thei tawh lovang, petrol pump ah min lo nghak ru an ti ringawt mai sia, petrol pump lah a tam ropui mai sia, kan thlenna atanga hla vaklo a, Deorah college chhak a HP filling station ah kan nghak ta ṭhup mai, darkar ½ er awr kan nghak ta, an lo thleng thei silo, bus kan chang ta rup mai le, google map hmangin kan inzawng, kan hmang thiam ṭha silo, bus aṭangin paltan bazar lamah kan chhuk, temple bulah kan awm kan ti, kan inhlat lo an ti leh, a tawp ah mizo pa zaidamna in a tlin ta lo, kan ang ta bawrh bawrh mai, ni a sa bawk si, kan chau bawk, ke in kan phei risk hmiah, a khawpui  a zau si, hindi thiam tha thum lah kan awm silo, a tawp ah Vishal Mega Mart Paltan kawt ah kan ding ta ngawt mai a, kan ṭhiannu pushpa in bus in min rawn hruai ta vang vang a, city bus bawkin kan phei ta a, kan buai rei ve khawp mai.. Mizoram han ni se chuan kan han buailo tur nen, kan chuanna tur bus kan thleng ta, kalkawng ah erawh harsatna awm em em lovin kan thleng tluang a, a hmun nawmzia hi chu ka sawithiam kher lovang, google ah en mai ru...google ah a, awm vek !

Tui chenna chi hrang hrang a awm a, tawlhpahrit sang deuh deuh te, naupang chenna thlengin  a awm a, roller coaster te, Mr.Bean a chuanna Car te thlengin sawi ang aw.. enjoy tur chi hi  awm deuh vek awm e.. 5D Thlengin a en theih a, a hmun hi an enkawl nuam em em a, a thianghim em em bawk.. luhman erawh mizo hmeichhe man aiin a to daih.. kan zinna thlalak pawh ka rawn tarlang e.

Accoland atangin chawhnu dar 4:30 ah kan haw a, guwahati fancy  bazar ah a duh kan bazar a, guwahati a kal ṭhin ten an dawr ziah ti ila kan sawi sual awm love, bag house ah kan kal leh a, chumi zawh ah kan thlenna kan pan khawm leh ta sang sang a, zanriah ei zawhin kan thlenna piah lawk big bazaar ah a then kan bazar a, guwahati a kan zinkawng zawh chu kan zawh zo der mai.

Shillong ah kan sil awng awng!

May ni 30 Ningani tuk zing dar 7:00 a.m. ah kan thlenna aṭangin kan chhuak a, thil ho mai mai ti tur a kal kan nilova, a sapṭawng takin sightseeing tura kal kan ni a, shillong chu 'scotland of the east' tiin an sawi thin kha kan hre kiau a, zin hma aṭang tawhin Sapram a kal  tur te tiin group kan siam nghe nghe kha mawle.. A kal tawh te pawhin la kal ngailo ang maiin kan ennawm thlirin kan thlir a ni ber mai. Kan kal zel a, shillong khaw luh dawn ah traffic a jam ta tlat , a jam chhungin kawngpui ah master-a, apuia, zorema te an lam hman tlat pek, kan hlim a ni, kan inkawm ngeih bawk a, sapṭawng kan thiam lo tih chu kan in hre vek, mahse kan thiam ang ang in kan hmang nasa ve khawp mai, kan thiam chhun ber pawh 'ONE MORE TIME', chupawh chhan a awm, zep rih ang aw.. Kan kal zel a, kan thlenna hmun tur Shillong Pastoral Centre Dhankheti chu chhun dar 12:30 vel ah kan thleng a, kan indah fel a, a hmun hi Catholic Father te enkawl ani a, a thianghlim in a nuam hle  tukṭhuan kan eiloh avangin chaw chhun a ni tawh mai niang chu, shillong mizoram house ah kan ei a. Bus a chuang ta hrep chu shillong ah kan sil awng awng e mawle! chauh avanga sil thum nichuang lovin sil awng awng ve deuh hlek e. Shillong khawpui fang turin mizoram house aṭangin ke in kan chhuk a, kan senior Remruati ( 2015-18) batch a  lo awm hlauh a, aniin min guide zel a, kan lawm hle. Bus in Dhankheti atang Police Bazar lam kan pan a, Don Bosco Musuem pan tura kal kan ni a, a tlai tawh em avangin Wards Lake ah kan kal a ni. Wards Lake hi 1893 - 94 chhung a din a ni a, a dintu hi khatih laia, Chief Commissioner Assam William Ward K.C.S.I. a siam a ni. Wards Lake ah hian lawng chuan tur te a awm a, nuam kan tiin hun hlimawm tak kan hmang ho a ni. Wards Lake piah mai hi Police Bazar a nih avangin kan bazar nghal a, shillong khawpui kan fan chhung hian a mi chengte hi kawm lo mahila, an ram hi chen a nuam hle a, dawr a kan kal na atangin a mi chengte hi an fel in, an hawihawm em em a, sumdawng ta  chu, mi dawr an thiam hle, mi thinlung hneh dan an thiam ka ti hle a, hlim hmel an pu deuh reng bawk, khasi ṭawng kan thiam chhun Khublei (Thank you) kan han ti veleh tawp mai zel a, a hlimawm ṭhin hle.

Cherrapunjee ah kan che nasa!

He tour a zin ten kan hmuh chak em em , kan zinchhan Meghalaya ram leilung mawi zia, leh khawvel a ruah tui tlak tamna ber tia an sawi, Cherrapunjee tlawh turin May ni 31 zing dar 6:30 ah kan chhuak a, tluang takin kan kal a, Mawsmai Cave kan tlawh hmasa ber a, tukṭhuan kan ei nghal a ni. Cherra ah kan che nasa alawm! Thla kan la nasa khawp mai, zip lining tih theihna a awm a, a nei ve lo ten vaimim kan lei! Cherrapunjee leilung hausakzia leh khuanu'n khawvel a duan mawi zia hmu thei a, kan awm hi vannei kan inti tlang khawp mai, khualzin phur motor kan intlanpel zung zung a, he khua cherrapunjee hian nitin tlawhtu a nei tam thin hle. Mawsmai Cave pûk ah kan lut a, lung mak tak tak, kum 100 chu sawiloh, kum tam tak a mi tawh te, fangfar nen he puk hi a khat a, a mawi dangdai hle, he puk hi tun hnuah chuan khualzin ten an tlawh nasat em avangin an ti danglam nasa tawh hle a, a chhung hi a thim em avangin light an vuah vek a ni, mawsmai cave kan kal hnuah, khualzin te hip em em tu, Nohkalikai Falls, kan tlawh leh a, a hmun han thlen hian kan hahdam sawng sawng mai, tuikhawthla sang tak mai chu thlir theih turin an lo siam a, kan thlir zawh hnuin, elephant falls ah kan kal leh a ni. Meghalaya hi a leilung a hausa a, a ram a mawi em em bawk a, kalkawng sir tawn tawn ah thing an phun teuh a, a ram a ti dai in a nuam hle.

May ni 31 Inrinni zing dar 7:00 ah Aizawl lam panin kan lo chhuak a, Ladrymbai ah tukṭhuan kan ei leh a, zan dar 8:30 vel ah Vairengte ah zanriah kan ei zawh hnuin, dar 1:00 a.m. ah tluang takin Aizawl kan lo thleng a ni. He kan tour chhung hian Pathian min hruaina avangin kan lawm em em a, zanah ṭawngṭai hona te kan nei ṭhin a, he tour hian ṭhianṭha tak tak ahma aia inhriatchian lehzualna te min pe a, kan thenawm ram Assam te, Meghalaya a chengte thawhrim zia te, an taimakna te ka hmuin an ram an tih thianghlmna te kha ka hmu a, ka hlawkpui khawp mai. A tawp ber atan chuan kan zin theihnan a phal taka zin min phalsak tu kan principal te, kan department professor te chungah lawmthu kan sawi e.