YMA BRANCH ZINGA CHESS THIAM BER KHATLA

Aizawl | March 22, 2019: LBS Suzuki 4th Inter Branch YMA Team Chess Championship khelh zawh a ni ta.

Mizoram Chess Association leh Central YMA tena an buatsaih LBS Suzuki 4th Inter Branch YMA Team Chess Championship, 19th -22nd March, 2019 chhunga neih chu tluang taka khelh zawh a ni a, Khatla Branch YMA an champion. Dt. 22.03.2019 (Zirtawpni) khan Dr. Vanlalramsanga IES, Secretary, Planning & Programme Implementation Department chuan khuallian niin kharna hun a hmanpui a ni. 

He Championship-ah hian Team 40 telin, player 230-in hming an pe a, Swiss system hmangin round 7 khelh a ni. Championship hmasa lama champion Team Bethlehem Vengthlang Branch-A chu seeded no 1 an ni a, Dinthar Branch, Mission Veng Branch, Dawrpui Vengthar Branch leh Bawngkawn Branch-A ten dawtin, Dt. 19.03.2019 khan inkhel hi tan a ni.

Final round-ah hian Top table-ah umphak theih tawh loha dinhmun sawhnghet tawh, Khatla Branch leh Aizawl Municipal Area pawn lam atanga khel tha ber, palina hauh mektu Chawngtlai Branch te an inkhel a. Khatla Branch-in hneh loh nei lova, champion trophy chawi an tumna chu, Chawngtlai Branch hian 2½ - 1½ a hnehna an chan zawk avangin a hlawhtling thei ta lo a ni. Table 2-ah Championship-a branch 1 atanga team chhuak tam ber nia team 4 lai rawn thawk chhuak thei leh Champion lai, Bethlehem Vengthlang Branch Team A-in rin phak baka khel tha, last round khelh hmaa pathumna dinhmun hauhtu Sihphir ‘A’ Branch chu 2½ - 1½ -a hnehin pahnihna an ni a, parukna dinhmun luah mektu Chanmary Branch Lunglei hian pathumna dinhmun luah mek Venghlui Branch chu 3½ - ½ a hnehin, pathumna dinhmunah an rawn inhlangkai ve thung a ni.

He Championship-a YMA Branch tel zawng zawng te hnenah participation prize pek a ni a, a titha zual 10 hnenah hetiang hian lawmman pek a ni.

Ranking Team Lawmman

1 Khatla Rs 30000/- Trophy + Certificate

2 Bethlehem Vengthlang-A Rs 15000/- with Certificate

3 Chandmary, Lunglei Rs 10000/- with Certificate

4 Chawngtlai Rs    5000/- with Certificate

5 Leitan Rs    3000/- with Certificate

6 Mission Veng Rs    1500/- with Certificate

    7 Sihphir ‘A’ Rs    1500/- with Certificate

8 Bethlehem Vengthlang ‘B’ Rs    1500/- with Certificate

9 Dinthar Rs    1500/- with Certificate

10 Sihphir ‘B’ Rs    1500/- with Certificate

Individual Prize Board tinah siam a ni bawk a, hetiang hian lawmman pek a ni.

Board Hming Branch Prize

No 1 Cosie Rorelkima Sihphir 'A' Rs. 3,000/- Trophy + Certificate

No 2 Lalbiakmawia Khatla Rs. 2,500/- Trophy + Certificate

No 3 R. Lalruatsanga Khatla Rs. 2,000/- Trophy + Certificate

No 4 BT Romawia Bethlehem VT Rs. 1,500/- Trophy + Certificate