Chief Minister-in MHIP General Headquarters Building Lungphum a phum

Aizawl |August 17, 2026: Chief Minister Lalduhoma chuan Vawiin chawhma khan Mizo Hmeichhe Insuihkhawm Pawl (MHIP) General Headquarters Building, Treasury Square-a sak thar tur lungphum a phum.

Lungphum inkhawmah hian Chief Minister chuan thu sawiin, MHIP ten General Headquarters thar, mawi leh changkang tak an nei mai tur chu a lawmpui a. MHIP hi kan rama tlawmngai pawl lian zinga hmeichhia leh naupangte tan bika ding awmchhun in nih bakah, Sawrkar bultuma din in nih bawk avangin a theih ang anga tuamhlawm zui zel che u pawh hi thil tihawm tak a ni. The Mizo Marriage, Divorce and Inheritance of Property Act, 2014 pass a nih theih nan MHIP hian a thawh hlawk hle a. Hna in thawh that avangin kum 2016 khan Ministry of Women & Child Development, Government of India, atangin Nari Shakti Puruskar lawmman in dawng bawk a. In hmalakna hrang hrangte hian nunau a thlamuan hle a ni.

MHIP leh kan tlawmngai pawl hrang hrangte hi kan society thui phuitu, thangtharte kaihruaitu, kan social institution pawimawhte in nih avangin sawrkar pawhin hmunhma tha leh zahawm tawk tak in neih hi tha kan ti a. Hun lo la awm zel tur ngaihtuahin nangmahni leh in hmunhma enkawlna tur pawh hi thawkchhuak thei ula, ngelnghet takin ding thei ula ka duh em em a ni. Tlawmngai pawl dangte tan pawh hma kan la zel a. Thingsulthliahah khian YMA ramah Convention Centre lian tham tak mai Swadesh Dharshan 2.0 atangin kan sa mek a. MUP Office pawh saw vertical extension kan tihsak dawn a, MSU hi Ainawn Vengah an Office hmun tur kan ruahmansak a. Tin, hmeichhiate hamthatna lam bikah hian Working Women Hostel hi hmun hrang hrang pasarihah kan sa mek a ni.

Hmasawnna hna hi tha tak leh chak takin thawh zel ni se kan duh a. Ruahmanna hrang hrang kan siam zingah Financial Advisory System hmangin Finance Department thuneihna tam tak chu Department Secretary-te kuta dah a ni a. Hei hian hna thawh a tihchak lehzual kan beisei a ni. SASCI phei hi chu kum tin a thar a rawn kal zel a, chung a thar lo kalte chu kan lo hman ve zel theih nan kum hluia kan thawhte kha kan inchinfel phawt zel a ngai si a. Kan thawhhona kan tihthat zual deuh deuh a tul dawn a ni. Building thar sak tur pawh hi uluk takin lo vil ula, a tir atangin a tawp thlengin tha taka lo enpui turin ka chah duh che u a ni, a ti.

MHIP President Pi Lalliani pawhin thu sawiin an building hlui chu luah reng tlak a nih tak loh avangin a thar sakna tur an buaipui a. Kawng tinrenga anmahni lo puitu Chief Minister Pu Lalduhoma leh Women and Child Development Minister Pi Lalrinpuii te bakah Sawrkar official-te chungah lawmthu a sawi a ni.

MHIP General Headquarters Building hlui hi April ni 20, 1993 atangin luah tan a ni a. Building thar hi a hmun ngaiah, SASCI 2025-26 sum cheng nuaih zathum leh sawmsarih (Rs. 3.70 crore) senga sak tura ruahman a ni.