Formosa Foundation luang chhuak, kohhran 100 hnenah music instrument, Forest Deptt hnenah Wildlife Rescue Van hlan!

Aizawl | April 9, 2026: Formosa Foundation chu Anant Ambani piancham pualin vawiin khan Aizawl khawpui leh pawn hmun hrang hrangah an luang chhuak a, tanpuina hrang hrang an pe a, Kohhran 100 hnenah music instrument an hlan a, Forest Deptt tan Wildlife Rescue Van an hlan a, Wildlife Rescue Van hi Forest Minister Lalthansanga'n a dawng a ni.

Wildlife Rescue Van

Wildlife Rescue Van inhlanna hun tawi hi Sihphir VC House-ah hman a ni a, he hun hi Formosa Foundation Chairman Jonathan Lalremruata'n a kaihruai a, Formosa Foundation aiawhin Formosa Foundation Legal Adviser Clinton Sherwood chuan Forest Minister Lalthansanga hnenah Wildlife Rescue Van chahbi hi a hlan a ni.

Synod Hospital tanpuina hlan

Synod Hospital, Durtlang hnenah tanpuina sum - Shed sakna tur leh poor fund-ah mi rethei zawk hospital bill pe thei lo te tan pek a ni a, tanpuina hi Synod Hospital Durtlang Director Dr RL Sanghluna leh Co - ordinator Upa Lalrinmuana te'n an dawng a ni. Naktuk hian, Zoram Medical College (ZMC)-ah pek leh tum a ni.

Bishop-in rimawi bungrua a hlan

Kohhran hrang hrang 100 hnenah music instrument an pe a, he hlanna hun hi St Francis of Assisi School, Durtlangah hman a ni a, Mizoram-a Catholic hotulu ber Bishop Stephen Rotluanga'n a hmanpui a ni.

Anant Ambani hi a piancham pualin kum tin a lo luangchhuak tawh thin a, kumin hian Formosa Foundation kaltlangin Mizoram-ah a rawn luangchhuak ta a ni. he thil hi thil lawmaw tak a ni a. Hemi puala luanchhuahna te hi cheng tam tak man a ni.

1. Forest deptt tan - Animal Rescue Van. Kan ramah rul atanga ramsa te rescue an ngai fo thin. A phurhna, dahna mumal awm lo hi a buaithlak hle awm e. Forest deptt. in an mamawh dan an sawi.

2. Kohhran hrang hrang 100 hnenah music instrument pek.

3. Mizoram a Home / hnuchham hrang hrangah ei chi hrang hrang, buhfai leh chawhmeh te bakah diaper te pek a ni.

4. Synod hospital-ah Shed sakna tur pek a nih bakah poor fund-ah mi rethei zawk hospital bill pe thei lo te tan pek a ni. Naktuk hian, Zoram Medical College (ZMC)-ah pek leh tum a ni.

5. College hrang hrang - Pachhunga University College (PUC), Govt J Thankima, Govt Zirtiri Residential Science College library-ah te lehkhabu pek a ni.

6. Ran enkawlna leh ran vakvai chhawmdawlna hmunah ei tur leh tanpuina pek a ni. Hemi atan hian naktuk hian JB foundation hnenah tanpuina an hlan dawn a ni.