ISUA ANGIN NUNG RAWH: THILPHALNA LEH TIHTUR DIK HRIATNAAH

  I Khawthlir Dan Thlak

-    Rick Warren

-    Sep 2, 2025

“Chung chu in mamawh in Pain a hrereng si a. Ama ram zawng zawk rawh u; tichuan, chung thil pawh chu a pek belchhah dawn che u nia”  Luka 12:30-31

 

Tunlai kan khawvelah chuan mi dang zawng zawng ngaihthahin mahni chauh inngaihtuah a awl khawp mai. Nimahsela Isua chuan danglam turin leh amah anga nung turin a duh che a ni. Thilphal turin leh midang ngaipawimawh turin a duh che a ni.

Pathian chuan a thilphal avangin - amah i an ve theihnan thilphal turin a duh che a ni. Bible chuan, “Pathianin khawvel a hmangaih em em a; chutichuan, a fapa mal neih chhun a pe a,” a ti a ni. Johana 3:16

Thilpek i pek apiangin, Isua i ang zel tihna a ni. Thilpek i pek apiangin, i rilru a zau zel ang. Thilpek i pek apiangin, rosum khawl ringawt hi a ni lo tih i hrethiam thar a. Thilpek i pek apiangin, thlarau lamah hnehna i chang zel tihna a ni.   

Luka 16:9 ah chuan, “Sum lemin in tan thiante siam rawh u; sum a boral huna chatuana awmnaah chuan an awmtir nan che u.”

Heti hian sawi ila, miten Isua an hriat theihnan - chanchin tha an hriat theih nan leh chhandama an awm theih nan i sum hmang turin a duh che a ni. Chutichuan, vanramah i hmuh hunah chuan, “I sum thawh avangin kohhran din a ni a. Chu kohhran avang chuan nunthar neiin keipawh vanramah ka awm ve theih phah a ni. Kumkhuain thian kan ni ta. Ka lawm e!” tiin.

Mite chuan Bible-in sum hi sual tinreng bul a ni tiin an sawi a. Nimahsela a ni lo. Heti hian a sawi zawk, “Tangka sum ngainat hi sual tinreng bul a ni si a.” 1 Timothea 6:10. Sum hi hmanrua - midangte tanpuina hmanrua tangkai tak a ni. 

Isua anga nundan tur kawng dang leh chu, tihtur hriata tih tur tih hmasak hi a ni. 

Isuan a tihtur leh a lo kal chhan a chiang hle a. Kum 12 mi chauh a nih laia a, a nu leh pate hnena a tawngkam hmasaber chu, “Ka Pa ina ka awm tur in hre lo vem ni” a ti a. Luka 2:49. Kum 12 chauh anih khan, a nunah ruahmanna feltak a nei tawh a ni. A tum a chiang a. Tum neiin a kal a ni. Tichuan a tawp a tawpah chuan, “A kin ta,” a ti thei ta a ni. Johana 19:30

Khi tawngkam pahnih atang khian Isua kha a thiltih turah a chiang a. A lokal chhan a man fuh hle a ni.

The Purpose Driven Life bu ah pawh tunlai khawvel hi a danglam tawh em avangin, a tlar hmasa ber ah pawh, “nangma chungchang a ni lo,” tih kan hmu a. Isua pawhin hetiang hian a sawi a, “Chung chu in mamawh in Pain a hrereng si a. Ama ram zawng zawk rawh u; tichuan, chung thil pawh chu a pek belchhah dawn che u nia”  Luka 12:30-31

I nuna kawng hrang hrang ah - i eizawnna, zirna, thian leh inngaihzawnna leh sum leh paiah chungchang te a tha a, khangte kha Pathian atanga lo kal anni. Pathian chuan amah chu dah pawimawh hmasak a duh a ni.

Isua angin nung rawh - thilphalna leh tihtur dik hriatna kawngah. Tichuan chung zawng zawngah chuan a tanpui ang che. 

Ngaihtuah zui atan

* I thilphalna hian thlarau bo engtiangin nge a man tih i ngaihtuah tawh ngai em?

* I nun chhui kir la. Pawisa hmanrua i hmang nge mihring hmanruaah i hmang zawk?

* I lehkhabu chu ziah tawp ngai se, engtin nge rawn sawi che sela i duh le?

[Lettu: Sangpuia]