CM leh Union MoS for Road Transport & Highways inkawm

Aizawl | June 3, 2025: Vawiin khan Chief Minister Lalduhoma chuan Mizoram tlawha lo zin mek Union Minister of State for Road Transport & Highways Ajay Tamta, chu a kawm a. Silchar - Aizawl 4 lane laih mekah Kawnpui leh Sairang inkar hnathawhna tur sum pe chhuak rang turin a lo ngen.

Chief Minister chuan, he kawngpui hi India ram laili nena kan inkalpawhna kawngpui pawimawh bik a ni a. Kawnpui leh Sairang inkar hi kutthlak a nih rih loh avangin nikum furah nasa takin harsatna kan tawk tawh a, kuminah hei kan tawk leh mek a. He mi inkar hnathawhna tur sum hi sawrkar laipuiin a la pe chhuak lo va. Rang taka min pek chhuah a, hna tan vat kan ngai a ni, tiin Mizoram chak lakna kawngpui berah hnathawh chak a ngaih thu a lo hrilh.

Chief Minister hian, Mizorama National Highway te chu awlsam zawk leh rang zawka thawh a nih theih nan Strategic Highway a puan tha a tih thu te, fur ruahtui tlak tamna ram a nih vanga concrete zela kawngpui siam tha a tih thute a lo hrilh a. Concrete hi a thawhna senso sang mah se a enkawl zuina man (maintenance cost) a hniam a, a tlo bawk si a ni, a ti. Heliport din tura hmalakna kal mek chanchin a sawipui bawk.

Ajay Tamta hian, Chief Minister thil sawi te chu theihtawp chhuahin a lo bawhzui tih a sawi a. Inkawmna hun tha tak a siamsak avanga lawmthu hrilhin, Mizoram chu nuam a tih thu te a sawi a ni.