I HNA LEH I HLUTNA A INKALHIN ENGTIN NGE I TIH ANG?

_Tihnghin rual loh

By Rick Warren 

— Oct 15, 2024

“A rulhna roluah tur chu Lalpa hnen ata in hmu dawn tih hriain, in tih apiang chu mihring tan anga ti lo vin, Lalpa tan anga ti zawkin, chak takin ti rawh u.” Kolossa 3:23

Zawlnei Daniela kha a saltannaah khan lal Nebukadnezzara rawngbawlsak turin a inchher a. Chutah chuan lal chaw ei dawhkan kil pawh a tel ve a ni. Nimahsela Daniela chuan lal chawhlui kil chuan amah leh a ṭhiante a tihbawlhhlawh a hlau a ni. Chu vang chuan an ei ang ni lo a dang pe turin a thlen a ni.

Daniela chuan inngaitlawm takin anmahni enkawltu hnenah chuan a thlen a, “Ka ngên a che, i chhiahhlawhte hi ni sâwm min fiah rawh, ei tûr thlai leh in tûr tuisik min pe mai rawh se. Tin, i hmâa kan lan dânte leh lal châw tui hmêl ei tleirâwlte lan dan chu tehkhin ni sela, tin, i hmuh dan angin i chhiahhlawhte chungah hian ti ang che.” (Daniela 1:12-13).

A ngen ang chuan anmahni enkawltu chuan a pawmsaka, eng nge lo thleng le: “Tin, ni sâwm tâwpah chuan lal châw tui hmêl eitu tleirâwlte zawng zawng ai chuan an hmêl a lang mâwi zawkin an lo thâu zawk mah a. Tichuan, enkawltu chuan an ei tûr leh an uain in tûr chu a la bo va, thlai a pe ta zâwk a.” (Daniela 1:15–16).

Daniela leh a ṭhiante chuan lal Nebukadnezzara chu mi dang ai chuan an ti lawm zawk ta tlat mai. Chu vang thlanchhuah an ni ta hlawm a.

Daniel ang mai hian i hnathawhnaah i hlutna tibo thei tur thil ti tura an tih che a awm em? Duhthlanna chu i kutah a awm. Zahpah lo takin i hnawl thei a, zahawm takin ngenna i siam thei bawk.

I dilna chu a hlawhtlin theihna turin hming ṭhat i hlawh ve phawt a ngai a ni. Thuneitute chuan mi rinawm, rintlak leh zahawmah an ngaih ve phawt che a ngai a ni. Chu dinhmun chu Danielaah khan kan hmu a, amah enkawltu khan a ring em em a ni.

Bible chuan, “A rulhna roluah tur chu Lalpa hnen ata in hmu dawn.” (Kolossa 3:23) a ti.

Kristian kan nihnaah hian kan hnathawhnaah pawh hmingṭhatna hi kan zawng ve tur a ni. Kan hnathawhnaah chuan rintlak ber, ṭha ber, taima ber nih kan tum tur a ni.

I hnathawhnaah zahawmna i hlawh loh chuan, i hlutna kalh zawng tih tur an pek che pawhin, "Kristian ka ni sia, hei chu ka ti thei lo," ti mah la. An awih lo vang che. 

Daniela chanchin aṭangin hian rinawmna, zahawmna leh mahni hna ngaihpawimawhna chuan mi dangte zah an hlawh chhuak a ni. Chu zahawmna chu i neih tawh chuan i hlutna kalh zawnga thil an lo ti a nih pawhin a thlakna tur emaw zawngin ngenna i thlen thei tawh ang.

Ngaihtuah zui atan

* I hlutna kalh zawnga thil an lo tih hian zahpah nei lo vin i dodal ṭhin nge? Zahawm takin ngenna i siam ṭhin zawk?

* Hlawh nei emaw nei lo va i hnathawhnaah engtin nge i thawh ṭhin? Pathian tan ti zelin i thawk ṭhin em? Chutianga i thawk lo a nih chuan engnge thlak danglam i mamawh? 

* Kristian ṭhenkhat anmahni ruaitute nena hmingṭha taka hnathawkte ngaihtuah teh? Anmahni ang chu i nih ve theih nan eng kawngah nge ṭan lak i mamawh?

*[Lettu: Sangpuia]*