Medal 36 nen Mizoram Muaythai Team lo haw

India rama Muaythai inelna sang ber UMAI National Muaythai Championship 2024 zawhfel takah Mizoram chuan gold 21, silver 6 leh bronze 9, a vaiin medal 36 an dawng a, a pumpuiah 5-na niin a thlengtu Assam chu team champion an ni.

May 25-31, 2024 chhunga Tepesia, Sonapur, Guwahati, Assam-a khelh National Muaythai Championship-ah hian Mizoram chuan players 40, team official leh coach bakah Referee & Judge te nen mi 46 a tir a, tun tum hi kum 2004-a Mizorama Muaythai Association din a nih hnuah National Championship-a players an tirh hnem ber tum a ni.

Mizoram team manager Lalnuntluanga chuan, " Tun tum National championship-ah hian team champion nih kan tum hle a, team kan intirh len ber tum nimahse state lian dang players 100 chuang tir an tam hle a, weight category a tam avangin overall champioon nih a har hle a ni.

Coach Lalchhuanawma hovin MTC, Edentharah thla hnih dawn inbuatsaihna neih a ni a, chutihlaiin phai khaw lumah kan nauten harsatna an tawk nasa hle a, a bikin players naupang, phaia la zin ngai lo an tam avangin harsatna kan tawk nasa hle a ni.

Kan medal lak danah kan lungawi tawk viau a, heia tha zawk pawha che thei erawh kan ni. Kan harsatna hrang hranga theihtawpa min buaipuitu Guwahati L.O. Dr. Saithangpuia chungah lawmthu kan sawi tak meuh meuh bawk" a ti.