Ticker

10/recent/ticker-posts

AMFU hruaituten Agriculture Minister C Lalrinsanga lawmpui

Aizawl | Sept 27, 2022:   September Ni 14, 2022-a New Delhi-a neih, ‘Outlook AgriTech Summit & Swaraj Awards 2022’-a ‘OUTSTANDING NORTHEAST STATE IN AGRICULTURE’ Award hlu tak Mizoram-in kan dawn avangin Vawiin September ni 27, 2022 khan All Mizoram Farmers Union (AMFU) hruaituten Agriculture Minister C Lalrinsanga chu a office-ah lawmpuina hun hmang.


AMFU hruaitute hi President Pu Chhuanvawran a ho va, AMFU Office Bearers dangte leh kuthnathawk hruaitute an tel a. AMFU chuan Mizoram-in he Award kan dawn theihna tura chawimawi phu ber ni a a ngaih C Lalrinsanga chu chawimawina thuziak mawi an hlan a ni.

He hunah hian AMFU President Pu Chhuanvawra chuan thu sawiin COVID-19 hrileng avangin duh angin loneituten hna kan thawk thei lova, Lockdown leh a kaihhawih avangin sawrkar tan pawh chet a har em em a. Heti chung chung hian Mizoram chuan Agriculture ah North East State te zinga a ti tha ber chawimawina kan dawng hi a lawmawm dan a thuk bik em em a. Mi hmangchang hria Agriculture Minister kan neih vang niin kan ngai a, kan Minister hi chawimawi a phu kan tih em avangin vawiin hian chawimawna hi kan hlan a ni a ti. AMFU President chuan Mizoram Sawrkarin Grape chingtute harsatna a sutkian avangin AMFU chu a lawm hle a ni a ti bawk.


Mizoramin Agriculture-a Outstanding North East State Award a dawn chungchangah Agriculture Minister Pu C. Lalrinsanga chuan thu sawiin Mizoram chu kum 2021 Good Governance Index ah pawh Hill State category hnuaiah Agriculture and Allied sector ah pakhatna kan lo ni tawh a. Tun tuma Outlook -Swaraj Award pawh hi India rampum huap mithiam tak tak awmna Jury ten an thlan niin Mizoram chu CSS kan implement danah te, Agriculture Technology hman that kawngah te, Farm mechanization kan kalpui chho danah te, Capacity Building kan kalpui danah te, COVID-19 hrileng kara farming lama mipui kan kaihhruai dan bakah Mizoram mipui nawlpuiin farming kan tui dan te leh thil dang tam tak hmanga endik kan nih hnuah Outlook Swaraj Award 2022 for Outstanding Northeast State in Agriculture hi min pe a ni a ti a.

Minister chuan he award hi keimah vang bika la kan ni lova, Secretary leh Department-a thawktute leh kan loneitute thawhrim rah a ni a, Zoram mipuite tanrualna rah a ni bawk. Hetianga thawktu hrang hrangte thawhrimna zarah hian a hmawr bawktuah Minister leh Agriculture Development Board Vice Chairman chu kan awm mai zawk a ni a ti.

Agriculture Minister chuan Agriculture sector ah hian hmabak kan la ngah hle a a ni a ti a. Tuna a tam zawkin kan innghahna chu Tlangram Lo neih a ni. Kan Lo halin Medicinal plants a tihchhiat nasat dan te, pollution a thlen nasat dante kan chhut a ngai a. Kan awmna hi kan tu leh fa lo awm zel tur te tana awmna tlaka kan siam a ngai. Ram tichereu lo zawnga hma lak a tul hle a, chumi tur chuan Sawrkarin Integrated Farming System pawh kan kalpui tan mek a. Chumi ang chuan awmze nei takin Ramngaw, Thlai, Ranvulh leh Sangha di kalpui kan tum a ni a ti.

OP-12 Biofertilizer kan kalpui tur hian min tilawm hle a. Hemi hmang hian kum 2023 atang chuan ramngaw thiata lo vah ti tlem a, Chul rit a, hlawk zawka thlai thar dan kawng a inhawng chho thei turah kan ngai a. Chumi hunah chuan, patlingin ipte puiah ramchang kan ak tawh dawn tihna a ni a ti.

Pu Zoramthanga kaihhruai Mizoram sawrkarin Agriculture lama kan hmalakna hrang hrangah, scientific approach kan neih dan leh kan kalpui dante hian Central lam beng a verh a, hengte hi Award kan dawn theihna kawnga kawngro sutu pawimawh tak a ni a ti.

Alu Chi siam dan thar hmangin, aeroponic technology hmangin boruakah Alu chi siam tumin hma kan la mek a, India rama thawn darh thei tura hmalak kan tum a ni a ti bawk.

Agriculture Minister chawimawina hunah hian AMFU General Secretary Pu Lalhmachhuana leh OB dangte pawhin thu an sawi a. Agriculture Secretary Pu J. Hmingthanmawia pawhin thu sawiin Mizoram Loneitute kan mal tlat thin avanga kan production tha tawk thei lo chu Sawrkarin hria in tunah hian Collective Farming Policy nei turin sawrkar chu a inbuatsaih mek a ni a ti.
Agriculture Minister hi Pu H. Biakzaua MLA, Vice Chairman, Agriculture Development Board bakah hian Agriculture Secretary Pu J. Jmingthanmawia, Agriculture Director Pu James Lalsiamliana leh Agriculture Additional Director Pu James Vanlalluaia ten an tawiawm a ni.



(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)
Post i hmuh dan

Post a Comment

0 Comments