PATHIAN CHUAN A ṬHAT EM AVANGIN MIN NGAIDAM

- Rick Warren

- 10 August, 2021



“Kan sualnate angin kan chungah a ti lo va, kan khawlohnate angin min thungrul hek lo. Chhak leh thlang a inhlat ang hian, kan bawhchhiatnate chu kan hnen ata a dah sawn ta daih a.” Sam 103:10, 12.

Pathian chuan i phu vang ni lovin, i mamawh apiang chu a pe zawk fo che a ni.

“Kan sualnate angin kan chungah a ti lo va, kan khawlohnate angin min thungrul hek lo. Chhak leh thlang a inhlat ang hian, kan bawhchhiatnate chu kan hnen ata a dah sawn ta daih a.” Sam 103:10, 12.

Chhak leh thlang hian tawp chin an nei lova, Pathianin i sualna chu lain a thai bo ta daih a ni.

Bible-ah Lal Davidan mi nu a uire khan a khuh nan Bethsebi pasal a thahsak a, Davida khan ngaihdam a phu em? A phu lo. Davida khan lainat a phu em? Phu lo. Mahse Davida chuan Pathian chu Pathian ṭha tak nia a hriat avangin lainatna a dil a ni: “Aw Pathian, i ngilneih em avangin mi khawngaih la; i lainatna nasat avangin ka bawhchhiatnate hi mi sil faisak var la, ka sual hi mi tlen faisak ang che.” Sam 51:1-2.  

Sualnaa i luh changin he ṭawngṭaina hian i ṭawngṭai thei ang. Hei hi Pathian nihphung aṭanga lo chhuak a nih avangin, i nihna leh i thil tihsual tawh chu engpawh ni sela, inringtawk takin i ṭawngṭai thei ang.

Pathian chuan i ṭhat vang ni lovin, a ṭhat vang zawkin a ngaidam che. Mi ṭha tak nih i tum kher a ngai lo, mi ṭha tak chu i nih theih ngai dawn loh avangin. Chu tak chu Pathian khawngaihna mak tak chu a ni.

Pathian hnenah ngaihdam i dil khan, Pathian chuan chawplehchilh mai bakah a famkimin a ngaidam che a ni. Hei hi thil pawimawh tak a ni. Engpawh lo ti sual tawh mah la, i sualna avangin Pathianin a hnawl mai lo che a. Ani chuan inhawng takin a khawngaihna ban chuan a lo dawngsawng che a ni. 

Hei hi kan tan chuan a mak hle mai a chhan chu hei hi mihring tih ṭhin dan nena inletling thawk a ni. Mi tu emaw chungah thil lo tisual la, an lo lawm leh duh che u em? An thei lo. Nangmah hlata awma nawr bo daih che an duh a ni. An dawngsawng duh lo che – a chhan chu i tihnat tawh miau avangin. 

Mahse Pathian chu hmangaihna a ni a, ṭhatnaa khat a ni. A hmangaih che a chhan chu hmangaihna hi a nihphung a nih avangin. A hmangaihna leh ṭhatna chu i phu loh mahse i mamawh i dawn theih phahna a lo ni.

Khawngaihna leh ngaihdamna hi i phu lova – tuman kan phu hek lo. Engpawh nise Pathianin min pek avangin lawmthu i sawi ang.

Han ngaihtuah la

Pathianin a ngaidam daih tawh che tih i hriat hnuah pawh engvangin nge Pathianin a hnen pan tur leh ngaihdam dil turin a duh che?

I tih sual tawh hnua Pathianin a lo dawn sawnna che chu eng nge a awmzia le? Engtin nge i lo tawn hriat ve tawh le? 

Isuan a lainatna i chungah a lantir tawh a, engtiangin nge midang i ngaihdam ve ang?

[Lettu: Sangpuia]

Post a Comment

0 Comments