Bairabi-a tangkhang ei siamtu thlak

Kolasib | June 1, 2020: Bairabi a Special train rawn thleng thin chu a rawn thlen hun tura a rawn thlen ngai loh avangin eisiam tur rawih te thlak an ni.


Bairabi a rel a rawn thlen tirh kha chuan Catering ti thin te hnenah ei tur siam hna hi pek a ni a, Bairabi leh Kolasib a eisiamtute insem tir an ni. Karnataka an rawn thlen tum khan Kolasib a KTP Branch palkhat ei tur siam tura ruat an ni leh a, train rawn kal kawng lakah a tan zin em avangin an ei tur siam tam tak an paih a, tlem te chu Tangkhang rawn thleng te hnenah sem hman a ni a, an siam nawn leh pawh an paih leh deuh vek a ni.

Hetiang a nih tak avang hian Bairabi YMA te chu ei tur siam tura rawih an ni ta a, an ei tur siam man hi Depury Commissioner Office, Kolasib-in an tum vek a, Bairabi YMA tan hian inhlawhna tha tak an siamsak bakah Tangkhang rawn haw te pawhin chaw tharlam zawk an ei theih phah ta a ni.  

Bairabi YMA te hian ei tur pawh an siam thianghlim viau a, an service pawh a hle.

Sawrkar thuchhuah chuan, "Mizoram mi leh sa tangkhang, Bairabi rel chawlhhmun lo thleng te ei leh in tur hi Catering service te kaltlanga buatsaih thin a ni a. Rel lo thlen hun a danglam fo avanga ei tur lo buatsaih lawk kawngah harsatna a awm thin avangin Bairabi North YMA te hnenah ei leh in lo buatsaih hna hi hlanchhawn a ni a, sawrkar rate pangngai angin tlawmngai takin anni hian an buaipui chhunzawm ta a ni." tiin a tarlang bawk.

With inputs from: ZMP Tlau & DIPR

Post a Comment

He post chungchanga i ngaihdan lo sawi ve rawh:

Previous Post Next Post